"ޕްލާންޓް އަ ޓްރީ ޕްރޮޖެކްޓް" މުޅި ރާއްޖެއަށް

ރާއްޖޭގައި ނެތެމުންދާ ގަސްތައް ދެނެގަނެ އާލާކުރުމަށާއި، ސިއްޙަތަށް ފައިދާހުރި ކާނާ އުފެއްދުމަށް، ވެލްނަސް މެޓާރސް އިން ކުރިއަށްގެންދިޔަ "ޕްލާންޓް އަ ޓްރީ ޕްރޮޖެކްޓް" އަށް ބޮޑު ތަރުހީބެއް ލިބިއްޖެއެވެ. މި ޕްރެޖްކޓް ފެށުތާ 3 މަސްދުވަހުގެ ތެރޭގައި ރާއްޖޭގެ އެކި ކަންކޮޅުތަކުން ލިބުނު ތަރުހީބު އެ ޖަމްޢިއްޔާއިން ފާހަގަކުރެއެވެ.

ވެލްނަސް މެޓާރސްއަކީ މީގެ 5 އަހަރުކުރިން ދުޅަހެޔޮ ސިއްހަތެއްގައި ހުރުމަށް އެ ޖަމްޢިއްޔާގެ ފައުންޑަރ ޒުލްފާ ނަސީރު މެލޭޝިއާގެ ވެލްނަސް އެކްސްޕާރޓްސްގެ ޕްރޮގްރާމެއްގައި ބައިވެރިވެ، ހަށިގަނޑަށް އައި ހެޔޮ ބަދަލުން އާއިލާއާއި ބައެއް މެންބަރުންނާއި ގާތްރަހުމަތްތެރިންނަށް އެ ހެޔޮ ބަދަލު ހޯދައިދިނުމަށް ފެށި ޕްރޮގްރާމެކެވެ. މީގެ 3 އަހަރު ކުރިން ވެލްނަސް މެޓޭރސްގެ ފަރާތުން ރާއްޖެއަށް ފުރަތަމަ ތަޢާރަފްކުރީ 21 ދުވަހުގެ ފިޓްޖެލެންޓެކެވެ. މި ޕްރޮގްރާމްގެ ތެރެއިން މިއަދާއި ހަމައަށް 14 ކޯޗުން ވަނީ ތަމްރީންކޮށްފައެވެ.

ވެލްނަސް މެޓާރސްގެ ސީއެސްއާރުގެ ދަށުން ”ޕްލާންޓް އަ ޓްރީ ޕްރޮޖެކްޓް“ ގެ ނަމުގައި ފަށައިގެން ހިންގާ ޕްރޮޖެކްޓް މުޅި ރާއްޖެއަށް މިހާރު ވަނީ ފުޅާކޮށްފައެވެ. މި ޕްރޮޖެކްޓް ފެށިތާ 90 ދުވަސް ވެފައިވާއިރު ގިނަ ބައެއްގެ އެއްބާރުލުން ޕްރޮޖެކްޓަށް ލިބިފައިވާކަމަށް ވެލްނަސް މެޓާރސްއިން ބުނެއެވެ.

17 ރަށެއްގައި އަމަލީގޮތުން މި ޕްރޮޖެކްޓްގެ މަސައްކަތް ކުރިއަށްގެންދާއިރު 33 އަމިއްލަ ފަރުދުންނާއި 9 މުވައްސަސާގެ އިތުރުން 18 ސްކޫލަކުން ވަނީ ވެލްނަސް މެޓާރސްއާއި ގުޅިފައެވެ.

މި ޕްރޮޖެކްޓްގެ ބޭނުން:

* ހަށިހެޔޮ ދުޅާހެޔޮ ސިއްހަތެއްގައިވާ މާލީގޮތުން ފުދުންތެރި މުޖްތަމައުއެއް ބިނާކުރުން.
* ޤައުމީ މަންހަޖުގެ ތެރެއިން ދަރިވަރުންނަށް ފައިދާހުރި ކާނާއާއިބެހޭ މައުލޫމާތު ފޯރުކޮށްދިނުން.
* އެންމެހައި ފަރުދުންނަށް މިންހެޔޮކޮށް ކެއުން ބައްޓަންކުރަން އުނގަންނައި ދިނުން.
* ރާއްޖޭގައި ނެތެމުންދާ ގަސްތައް ދެނެގަނެ އާލާކުރުމަށް މަސައްކަތްކޮށް ރާއްޖޭގައި އިންދާ، ހެއްދޭ ފައިދާހުރި ކާނާލިބޭ ގަސްތަކުގެ މައުލޫމާތު އިތުރަށް ހޯދާ، ލިބޭ މައުލޫމާތުގެ އަލީގައި މުޖްތަމައު ހޭލުންތެރިކުރުން.
* ބިމުގެ ދަތިކަން ކުރިމަތިވެފައިވާ ރަށަތަކަށް ހައިޑްރޯޕޯނިކްސްގެ މައުލޫމާތު ފޯރުކޮށްދީ ކޮންމެ އަހަރަކު ކަނޑައެޅޭ ވަކިވަކި ރަށްތަކެއްގައި އެފަދަ ސިސްޓަމްތައް ފޯރުކޮށްދިނުން.

މި ޕްރޮޖެކްޓްގައި ބައިވެރިވެ އަމަލީ ގޮތުން މި މަސައްކަތް ކުރަމުންދާ ސްކޫލްތަކުން ދަނީ އެ ސްކޫލްތަކުގެ ކްލަބްތަކާއި ޖަމިއްޔާތަކުން ދަރިވަރުން މި ހަރަކާތްތަކުގައި ބައިވެރިކޮށް މައުލޫމާތު ފޯރުކޮށްދެމުންނެވެ. އެގޮތުން ށ. މިލަންދޫ ސްކޫލް، ތ. ވޭމަންޑޫ ސްކޫލް، އަދި ހދ. އަތޮޅު ތައުލީމީ މަރުކަޒުންވަނީ ފާހަގަކޮށްލެވޭ މަސައްކަތްތަކެއްކޮށް އިންދި ގަސްތަކުން ލިބުނު ތަރުކާރީއާއި މޭވާއިން ނަފާއާއި ފައިދާ ހޯދާފައިކަމަށް އެ ޖަމްއިއްޔާއިން ބުންޏެވެ.