ސިޔާސީ ވިސްނުމަށް އަންނަ ބަދަލެއްގެ ސަބަބުން ސަރުކާރުން ހިންގަމުންގެންދާ މަޝްރޫޢުތައް ހުއްޓުމަކަށް ނުގެނެވޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއެވެ. އެމަނިކުފާނު މިހެން ވިދާޅުވީ ތިނަދޫގައި ބޭއްވި ކެމްޕެއިން ހަރަކާތުގައި ވާހަކަފުޅު ދައްކަވަމުންނެވެ.
ގދ. ތިނަދޫގައި ވާހަކަދައްކަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވީ، ތިނަދުގައި މަސްވެރިކަން އިތުރަށް ފުޅާކޮށް، އެދާއިރާގައި ހުރި ގޮންޖެހުންތައް ހައްލުކުރުމަށް ގިނަ މަސައްކަތްތަކެއް ކުރައްވަމުންދާކަމަށެވެ. ރައީސް ވިދާޅުވީ ތިނަދޫގެ ކޯލްޑް ސްޓޯރޭޖްގެ މަސައްކަތާއި މަސްވެރިކަމުގެ ދާއިރާގެ އިތުރު މަޝްރޫޢުތައް ސަރުކާރުން ކުރައްވަމުންދަނީ އެސްޓީއޯއާއި އެސްޓީއޯގެ ސަބްސިޑަރީ ކުންފުނިކަމަށްވާ މިފްކޯއާއި ގުޅިގެންކަމަށެވެ.
ރައީސް ވިދާޅުވީ އެރަށުގެ ކޯލްޑް ސްޓޯރޭޖްގެ މަސައްކަތް ކުރިއަށްދޭތޯ ބައެއް ފަރާތްތަކުން ސުވާލުކުރާކަމަށެވެ. އެކަމަށް އިޝާރާތްކުރައްވާ ރައީސް ވިދާޅުވީ، އެއްވެސް ހާލަތެއްގައި ސަރުކާރުން ހިންގަމުންދާ މަޝްރޫޢުތައް މަޑުނުޖެހޭކަމުގެ ޔަގީންކަން ދެއްވާކަމަށެވެ.
" ސަރުކާރުގެ ސިޔާސަތެއް ތަންފީޒުކުރުމުގައި ސަރުކާރުގެ އެއްވެސް އޮފީހަކުން އަދި އެއްވެސް ކުންފުންޏަކުން ފަހެއް ނުޖެހޭނެ. އެކަންތައްތައް އަޅުގަނޑުމެން ކުރާނަން. އަދި ކުރެވޭގޮތަށް އެކަންތައްތައް ބަދަލުކުރަމުން ގެންދާނަން. ތިމާގެ ސިޔާސީ ވިސްނުމަށް އަންނަ ބަދަލެއްގެ ސަބަބުން ސަރުކާރުގެ މަޝްރޫޢުތައް ހުއްޓުމަކަށް ނުގެނެވޭނެ. ޔަގީންކަން އަރުވަން. މިއިން އެއްވެސްކަމެއް ހުއްޓުނަ ނުދިނުމަށްޓަކައި އަޅުގަނޑުމެން ކުރަންޖެހޭ ކަންތައްތައް ބަރާބަރަށް ކުރަމުންގެންދާނެ" ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވިއެވެ.
ރައީސް ވިދާޅުވީ ސިޔާސި ވިސްނުމެއްގެ ސަބަބުން ސަރުކާރުގެ މަޝްރޫޢުތައް ކުރިއަށްގެންދިއުމުގައި ފަހަތައްޖެހެން ނުޖެނހޭނެކަމަށެވެ. އަދި ވަޒީފާގެ ފުރުސަތު ފަހިކޮށްދިނުމާއި މަސްވެރިކަމުގެ ދާއިރާއާއި އެހެން ދާއިރާތަކުން ކުރިއެރުން ގެނެސްދިނުމަށް ސަރުކާރުން އަބަދުވެސް މަސައްކަތް ކުރައްވަމުންދާނެކަމަށް އެމަނިކުފާނު ވިދާޅުވިއެވެ.
"ކޯލްޑް ސްޓޯރޭޖް ހެދުންކަމަސްވިޔަސް، ބަނދަރު ހެދުންކަމަށް ވިޔަސް. އަދި މަގު ހެދުންކަމަށްވިޔަސް. މިހުރިހާ ކަމެއް ސަރުކާރުގެ ސިޔާސަތުތަކާއި އެއްގޮތަށް ކުރަން އަޅުގަނޑުމެން ފަހެއް ނުޖެހޭނަން. އެއްވެސްކަމެއް މަޑުޖެހުނަކަ ނުދޭނަން. " އެމަނިކުފާނު ވިދާޅުވިއެވެ.
ރައީސް ވިދާޅުވީ މިވީ 4 އަހަރު ތެރޭގައި ތިނަދޫގެ ތަރައްޤީއަށް ޖުމްލަ 211 މިލިއަން ޚަރަދުކޮށްފައިވާކަމަށެވެ. ކޯލްޑް ސްޓޯރޭޖްގެ މަޝްރޫގެ އިތުރުން ސަރުކާރުން ދަނީ ތިނަދޫގެ އައިސްޕްލާންޓްހުރި ސަރަޙައްދުގެ ޖެޓީ ހެދުމުގެ މަސައްކަތްވެސް ކުރައްވަމުންނެވެ. މިއީ ދަޢުލަތުގެ ބަޖެޓުން ގާތްގަނޑަކަށް 17.3 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.
މީގެއިތުރުން، ތިނަދޫގައި 25 ޓަނުގެ ދަޅުމަސް ބަންދުކުރެވޭ ކާރުޚާނާއެއް އެޅުމުގެ މަސައްކަތްވެސް ސަރުކާރުންދަނީ ކުރައްވަމުންނެވެ. މި ފެސިލިޓީ ޤާއިމުކުރުމަށް 230000 (ދެ ލައްކަ ތިރީސް ހާސް) އަކަފޫޓުގެ ބިމެއް ރަށުގެ އިންޑަސްޓްރިއަލް ޒޯނުންވަނީ ކަނޑައަޅާފައެވެ. މި ޕްރޮޖެކްޓްގައި ތެރޭގައި ހިމަނައިގެން 1500 ޓަނުގެ މަސް ފިނިކުރާ ނިޒާމެއްވެސް ޤާއިމުކުރާނެއެވެ.