އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ މެޑިކަލް އިންޓަރންޝިޕް ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފިއެވެ.
މާރިޗު މަހުގެ 18ގައި ފެށުމަށް ހަމަޖެހިފައިވާ އިންޓަރންޝިޕަށް ކުރިމަތިލުމުގެ ފުރުސަތު އަންނަ މަހުގެ 15 ގެ ނިޔަލަށް އައިޖީއެމްއެޗުން ވަނީ ހުޅުވާލާފައެވެ. މިފަހަރު އިންޓަރ ޕްރޮގްރާމަށް އައިޖީއެމްއެޗުން ކަނޑައަޅާފައިވަނީ 32 ޖާގައެވެ.
އިންޓަރންޝިޕަށް އެދި ހުށަހެޅުމުގެ ޝަރުތުތަކުގެ ތެރޭގައި މެޑިކަލް ކޮލެޖަކުން ނުވަތަ ޔުނިވަރސިޓީއަކުން އެމްބީބީއެސް ފުރިހަމަކޮށްފައި އޮންނަން ޖެހެވެ. އަދި މޯލްޑިވްސް މެޑިކަލް އެންޑް ޑެންޓަލް ކައުންސިލްގެ "ސެޓްފިކެޓް އޮފް ޕްރޮވިޝަނަލް މެޑިކަލް ރެޖިސްޓްރޭޝަން" ވެސް އޮންނަންޖެހެއެވެ. މީގެއިތުރުން ވޭތުވެދިޔަ 5 އަހަރު ދުވަހުގެތެރޭގައި ޕޮލިސް ރެކޯޑެއް ނެތުމަކީވެސް މި އިންޓަރން ޕްރޮގްރާމްގެ ޝަރުތެކެވެ.
މެޑިކަލް އިންޓަރންޝިޕް ޕްރޮގްރާމްގައި ބައިވެރިވުމަށް އެދޭ ފަރާތްތަކަށް އެކަމަށް އެދޭ ފޯމް ފުރިހަމަކޮށް ހުށައަޅަންޖެހެއެވެ. ރަސްމީ ބަންދު ނޫން ކޮންމެ ދުވަހެއްގެ ހެނދުނު 09:00 ން 12:00 އަށް މި ފޯމް އައިޖީއެމްއެޗްގެ ވެބްސައިޓް www.igmh.gov.mv އާއި މެޑިކަލް އިންޓަރންޝިޕް އޮފީހުން ލިބެން ހުންނާނެކަމަށް އައިޖީއެމްއެޗުން ވިދާޅުވެއެވެ.
އިންޓަރންޝިޕަށް ކުރިމަތިލާ ފަރާތްތަކުގެ އަދަދު ކަނޑައެޅިފައިވާ ޖާގައަށްވުރެ އިތުރުވާނަމަ ޕްރޮގްރާމަށް ބައިވެރިން ހޮވުމުގައި އިސްކަން ދެވޭނީ އެމް.ބީ.ބީ.އެސް ފުރިހަމަ ކޮށްފައިވާ ތާރީހަށް ބަލައި، ކޯސް ފުރިހަމަ ކުރުމަށްފަހު އެންމެ ގިނަދުވަސްވެފައިވާ އަހަރުގެ ތަރުތީބުންކަމަށްވެސް އައިޖީއެމްއެޗުން ވިދާޅުވެއެވެ. އަދި މި ޕްރޮގްރާމަށް ހޮވޭ ފަރާތްތަކަށް އެއްވެސް މުސާރައެއް، އެލަވަންސެއް ނުވަތަ އިނާޔަތެއް ދިނުމަށް ހަމަޖެހިފައިނުވާކަމަށްވެސް އައިޖީއެމް ހޮސްޕިޓަލުން ވިދާޅުވެއެވެ.