މިދިޔަ ހަފްތާގެ ތެރޭގައި ރާއްޖެއިން ކޯވިޑް ޖެހުނު މީހުންގެ ތެރެއިން އެކަކަށް ހޮސްޕިޓަލްގައި އެޑްމިޓްކޮށްގެން ފަރުވާދެމުން އަންނަކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވިދާޅުވެއްޖެ. އެޗްޕީއޭއިން އާއްމުކުރި ތަފާސް ހިސާބުތައް ދައްކާގޮތުން މިމަހުގެ 15އިން 21 ގެ ނިޔަލަށް ރާއްޖެއިން 5 މީހަކަށް ވަނީ ކޮވިޑް ޖެހިފައެވެ. މި އެންމެނަކީވެސް ދިވެހިންނެވެ.
މިދިޔަ ހަފްތާގެ ކޭސްތައް ފެނުނު ގޮތް
- 3 މާލޭ ސަރަހައްދުން
- 1 މީހުން ދިރިއުޅޭ ރަށްރަށުން
- 1 އެހެނިހެން ސަރަހައްދުން
ރާއްޖެއިން ކޮވިޑް ޖެހުނު މީހުންގެ އަދަދު ވަނީ 185،713 އަރާފައެވެ. މި ބަލީގައި މަރުވި މީހުންގެ އަދަދަކީ 311 އެވެ. ކޮވިޑްގެ ވެކްސިންގެ ފުރަތަމަ ޑޯޒް 399،174 މީހަކު ވަނީ ޖަހާފައެވެ. އަދި ދެވަނަ ޑޯޒް 385،090 މީހުން ފުރިހަމަކުރިއެވެ. ކޯވިޑް ވެކްސިންގެ ބޫސްޓަރ ޑޯޒް ޖަހަން ހުޅުވާލުމުން 167،627 މީހުންވަނީ ފުރަތަމަ ބޫސްޓަރ ޑޯޒް ޖަހާފައެވެ. އަދި ދެވަނަ ބޫސްޓަރ ޑޯޒް ޖެހި މީހުންގެ އަދަދަކީ 1523 އެވެ.
ކޮވިޑުން ރައްކާތެރިވުމަށް ސަރުކާރުން މުހިއްމު ފިޔަވަޅުތަކެއް އޭރު އެޅިއެވެ. އެފިޔަވަޅުތަކުގެ ނަތީޖާތައް ފެންނަން ފަށާ ރާއްޖޭގެ އިގްތިސާދު ހީކުރި މިންވަރަށްވުރެ ބާރަށް ކުރިއަރަމުން އަންނަކަން ދުނިޔޭގެ މާލީ އިދާރާތަކުން ވަނީ ފާހަގަކޮށްފައެވެ. އަދި މި ސަރަހައްދުގައި އެންމެ އަވަހަށް އެންމެ ބާރަށް އިގްތިސާދު ރަނގަޅުވެގެންދާނެ ޤައުމަކީ ރާއްޖެކަން ދާދިފަހުން ވޯލްޑް ބޭންކުވަނީ ހާމަކޮށްފައެވެ.
2019 ވަނައަހަރު ހަލުވިކަމާއި އެކު ދުނިޔޭގައި ފެތުރެން ފެށި ކޮވިޑް މިހާރު ވަނީ ކޮންޓްރޯލްކޮށްފައެވެ. އެހެންނަމަވެސް މި ބަލި ފެނުނު ޗައިނާއި މި ބަލީގެ މީހުން ފެންނަ އަދަދު އަދިވެސް ގިނައެވެ. ބަލިން ރައްކާތެރިވުމަށް އަޅާފައިވާ ފިޔަވަޅުތައް އެޤައުމުން ދޫކޮށްލާ ދަތުރުކުރުމުގެ ހުއްދަތައް ދިނީ މިދިޔަ މަހުގެ ކުރީކޮޅެވެ. އެއާއި އެކު ބަލި އަނެއްކާވެސް ފެތުރެން ފެށިއެވެ.
ޗައިނާގެ ތަފާސް ހިސާބުތައް ދައްކާގޮތުން މިިދިޔަ ހަފްތާގައި އެކަނިވެސް ކޮވިޑް ޖެހިގެން އެ ޤައުމުން މަރުވި މީހުންގެ އަދަދު ވަނީ 13000 އަރާފައެވެ. މިދިޔަ ޑިސެމްބަރު މަހު ޤައުމު ހުޅުވާލިފަހުން މިހާތަނަށް މަރުވި މީހުންގެ އަދަދު 73,000 ގާތްކުރެއެވެ. މީ ހޮސްޕިޓަލްގައި ފަރުވާދެމުން ދަނިކޮށް މަރުވި މީހުންގެ އަދަދުކަމުން ބަލީގައި އަސްލު މަރުވި މީހުންގެ އަދަދެއް ސާފުކޮށް ނޭގެއެވެ.