މިދިޔަ ޑިސެމްބަރުމަހުގެ ތެރޭގައި ބޭންކުތަކުން ލޯނުގެ ގޮތުގައި ދޫކޮށްފައިވާ އަދަދު އޭގެ ކުރީ މަހާއި އަޅާބަލާއިރު އިތުރުވެފައިވާކަމަށް މޯލްޑިވްސް މަނިޓަރީ އޮޓޯރިޓީ، އެމްއެމްއޭގެ ތަފާސް ހިސާބުތަކުން ދައްކައިފިއެވެ.
ޖަނަވަރީމަހު އެމްއެމްއޭއިން ނެރެފައިވާ އިކޮނޮމިކް އަޕްޑޭޓް ރިޕޯޓް ދައްކާގޮތުން މިދިޔަ އަހަރުގެ ނޮވެމްބަރުމަހު ބޭންކުތަކުން ދޫކޮށްފައިވާ ލޯނުގެ އަދަދު ހުރީ %1 ގައެވެ. ނަމަވެސް ޑިސެމްބަރުމަހު އެ އަދަދު ވަނީ %5އަށް އިތުރުވެފައެވެ.
ރިޕޯޓުން ދައްކާގޮތުން އިމާރާތްކުރުމުގެ ސިނާއަތް ފިޔަވައި މައިގަނޑު ގޮތެއްގައި ހުރިހާ ސިނާއަތަކަށްވެސް ދޫކޮށްފައިވާ ލޯނުގެ އަދަދު ވަނީ އިތުރުވެފައެވެ.
މި މުއްދަތުގައި އެންމެ ގިނަ އަދަދެއްގެ ލޯނު ދޫކޮށްފައިވަނީ ޕާސަނަލް ލޯނު ނުވަތަ ވަކި ފަރުދުންގެ އަމިއްލަ ބޭނުމަށެވެ.
ފަތުރުވެރިކަމަށް ދޫކޮށްފައިވާ ލޯނުގެ އަދަދުވެސް ވަނީ އިތުރުވެފައެވެ. ފަތުރުވެރިކަމުގެ ބޭނުމަށް މި މުއްދަތުގައި ދޫކޮށްފައިވާ ލޯނުގެ އަދަދު 10 ބިލިއަން ރުފިޔާއަށް އަރައެވެ. އަދި އަމިއްލަ ބޭނުންތަކަށް ވަކި ފަރުދުންނަށް ދޫކޮށްފައިވާ ލޯނުގެ އަދަދު 25 ބިލިއަން ރުފިޔާއަށްވުރެ އިތުރެވެ.
އެމް.އެމް.އޭގެ ރިޕޯޓުގައިވާގޮތުން މިދިޔަ އަހަރުގެ 4 ވަނަ ކުއާޓަރުގައި އިޤްތިޞާދު ހިއްސާވާ މައިގަނޑު ހުރިހާ ސިނާޢަތްތައްވެސް ވަނީ ކުރިއަރާފައެވެ. އޭގެތެރޭގައި ޢިމާރާތްކުރުމުގެ ސިނާޢަތް، ފަތުރުވެރިކަން، ހޯލްސޭލް އަދި ރީޓެއިލް ވިޔަފާރި، ހިމެނެއެވެ. އެގޮތުން، އެންމެ ބޮޑަށް ކުރިއަރާފައިވަނީ ފަތުރުވެރިކަމުގެ ސިނާޢަތްކަމަށް އެމް.އެމް.އޭގެ ރިޕޯޓުގައިވެއެވެ.
އެމް.އެމް.އޭގެ ރިޕޯޓުގައިވާގޮތުން މިދިޔަ އަހަރުގެ 4 ވަނަ ކުއާޓަރުގައި ފަތުރުވެރިކަމުގެ ސިނާޢަތް އެންމެ ބޮޑަށް ކުރިއެރި މައިގަނޑު އެއް ސަބަބަކީ ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުވެ، އެދާއިރާއިން ދައުލަތަށް ލިބުނު އާމްދަނީ އިތުރުވުމުންނެވެ. މިދިޔަ އަހަރުގެ 4 ވަނަ ކުއާޓަރުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެފައިވަނީ، އެދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ސީޒަންކަމަށްވުމުންނެވެ.