ރާއްޖޭގެ ދެކުނުން އީއީޒެޑް، ނުވަތަ ދިވެހިރާއްޖެއަށް ޚާއްޞަ އިޤްތިޞާދީ ސަރަޙައްދު ކަނޑައެޅިގެން ދިއުމާއެކު، އެ ސަރަހައްދުގައި ކުރެވޭނެ އިޤްތިޞާދީ މަސައްކަތްތައް ބައްލަަވައި، އެކަންކަން ކުރައްވާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވެއްޖެއެވެ.
ފައްޔާޟް މިހެން ވިދާޅުވީ ޗާގޯސް އައިލެންޑްސް އާއި ރާއްޖެއާ ދެމެދު އިން ކަނޑައަޅަން މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަަޅާފައިވާ މައްސަލަ ނިމުމާއެކު ރާއްޖެއަށް ލިބުނު ފައިދާތަކުގެ މައްޗަށް އަލިއަޅުއްވާލައްވައި ވާހަކަފުޅުދައްކަވަމުންނެވެ.
އެކްސްކްލޫސިވް އިކޮނޮމިކް ޒޯން، އީއީޒެޑްއަކީ ކޮންމެ ޤައުމެއްގެވެސް ކަނޑުގެ ސަރަަޙައްދުން 200 ނޯޓިކަލް ބޭރާއި ހަމައަށް އެޤައުމަކަށް ޚާއްޞަވެފައިވާ އޮންނަ ސަރަޙައްދެވެ. ޤައުމެއްގެ އީއީޒެޑް ނުވަތަ ޚާއްޞަ އިޤްތިޞާދީ ސަރަޙައްދެއްގައި އެ ޤައުމެއްގެ ހުއްދަ ނެތި އެއްވެސް މަސައްކަތެއް ނުކުރެވޭނެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޞް އިސްމާއިލް ވިދާޅުވީ އިންވަކިކޮށް، އީއީޒެޑް މިހާތަނަށް ކަނޑައެޅިފައި އޮތީ ރާއްޖޭގެ އުތުރުގައިކަމަށެވެ. ނަމަވެސް ދެކުނުގައި އީއީޒެޑް ކަނޑައެޅިފައި ނުވާކަމަށާއި، އެކަމުގެ ސަބަބުން ބޭރުގެ މަސް ބޯޓުފަހަރު ދާއަޅައިގެން މަސްވެރިކަން ކުރިޔަސް ކުރެވޭނެ މާބޮޑުކަމެއް ނޯންނަކަމަށެވެ. ނަމަވެސް އިޓްލޮސްގެ ނިންމުމާއެކު ރާއްޖެއަށް ބާރުތަކަކާއި އިތުރު ސަރަޙައްދެއް ވެސް ލިބިފައިވާކަން ފައްޔާޟް ފާހަގަކުރެއްވިއެވެ.
"އެއްވެސް އިރެއްގައި 200 މޭލު ކަނޑައެޅިފައެއް ނެތް. އެއީ ވަރަށް ބޮޑު އޮޅުވާލުމެއް. އީއީޒެޑް ކަނޑައެޅިފައި އޮތީ އުތުރުގައި. ދެކުނުގައި 24 މޭލާ ހިސާބަށް އެތާނގައި ދާވެސް އެޅޭ، އަޅަމުންދަނީވެސް. އަޅުގަނޑުމެންނަށް ކުރެވޭނެ ހަމައެއްވެސް ކަމެއް ނެތް. އެކަމަކު ދެން 25 މޭލާ ހިސާބުން ދެން ދަލެއް ނޭޅޭނެ. އަލަށް ރާއްޖެއަށް ބާރު ލިބިގެން މިދިޔައީ އަޅުގަނޑުމެންގެ އީއީޒެޑް ކަނޑައެޅިގެން، އެ އީއީޒެޑްގެ ތެރޭގައި އަޅުގަނޑުމެންގެ ހުއްދަ ނެތި އިޤްތިޞާދީ ކަންކަން، މަސް ބޭނުންވިޔަސް ދާ އެޅުންކަމަށްވިޔަސް އެހެންކަމެއްވެސް ކުރެވޭނީ" ފައްޔާޟް ވިދާޅުވިއެވެ.
މިނިސްޓަރ ފައްޔާޟް ވިދާޅުވީ މޮރިޝަސް އާއި ރާއްޖެއާ ފުށު އަރާ ސަރަޙައްދު ހަަމަހަމަކޮށް ބެހިނަމަ ރާއްޖެއަށް ލިބޭ ސަރަޙައްދު ކުޑަވާނެކަމަށާއި، އެހެންކަމުން ރާއްޖެއިން ވަކާލާތުކޮށް، ކާމިޔާބުކުރީ ހަމަހަމަ މިންވަރަށްވުރެ އިތުރަށް ހޯދަން ކުރި ދަޢުވާއެއް ކަމަށެވެ. އަދި އެއާއެކު މިހާރު އޮތް ރާއްޖޭގެ ސަރަޙައްދުން ބައެއް ނުގެއްލި، އިތުރު ސަރަޙައްދެއް ލިބިފައިވާކަން މިނިސްޓަރ ފާހަގަކުރެއެވިއެވެ.
އިކޮނޮމިކް މިނިސްޓަރ ވިދާޅުވީ އަލަށް ރާއްޖެއަށް ލިބުނު ސަރަޙައްދުގައި ކުރެވޭނެ އިޤްތިޞާދީ މަސައްކަތްތައް ދިރާސާކުރައްވާނެ ކަމަށެވެ.
"މި ލިބުނު 200 މޭލުގައި އިޤްތިޞާދީ ގޮތުން ކުރެވެން ހުރި ކަންކަން ބަލާނަން. އެތަނުގެ އަޑީގައި މައުދަނެއް ހުރިއްޔާ އެކަމެއްވެސް ބެލޭނެ. އަދި ކިރިޔާ މިލިބުނީ އެތަނުގައި އިޤްތިޞާދީ މަސައްކަތެއްކުރަން. 12 މޭލު ބޭރުން އަދި ކިރިޔާ މި ލިބުނީ.. ލިބިފައި އޮތް ތަނަކުން އެއްޗެއް ގެއްލުނީއެއް ނޫން. އަޅުގަނޑުމެންނަށް އަލަށް އެއްޗެއް ލިބިގެން މިއުޅެނީ" ފައްޔާޟް ވިދާޅުވިއެވެ.
ބައިނަލްއަޤްވާމީ ޤާނޫނުތައް ބުނާގޮތުން ކޮންމެ ޤައުމަކަށް ވެސް އެ ޤައުމެއްގެ ވަށައިގެންވާ ކަނޑުގެ ސަރަޙައްދުން 200 މޭލު އީއީޒެޑްގެ ގޮތުގައި ބަލާއިރު، މޮރިޝަސްގެ ބައެއްކަމަށް އދ.ން ޤަބޫލުކުރާ ޗާގޯސް އައިލެންޑްސް އާއި ރާއްޖެއާ ދެމެދު އޮތް ސަރަޙައްދުން ބައެއް ފުށުއަރައެވެ. މިހާތަނަށް އައިއިރު ރާއްޖޭގެ ދެކުނުން އީއީޒެޑް ކަނޑައެޅިފައެއް ނުވެއެވެ. ނަމަވެސް އިޓްލޮސްގެ ނިންމުމާއެކު އެ 58 އަހަރަށްވުރެ ގިނަ ދުވަސްވެފައިވާ މައްސަލަ ޙައްލުވެ، ރާއްޖޭގެ ސިޔާދަތީ ބާރު ހިނގާ ސަރަޙައްދު ނުވަތަ ބޯޑަރު ލައިން ކަނޑައެޅިގެންދިޔައީއެވެ. އަދި އެކަން ހާސިލުވެގެންދިޔައީ ރާއްޖެއިން ބޭނުންވި ގޮތަކަށް، ރާއްޖޭގެ ސަރަހައްދެއް ނުގެއްލި، އިތުރު ސަރަޙައްދެއް ވެސް ހޯދައިގެންކަން ފާހަގަކޮށްލެވެއެވެ.