ދުނިޔޭގެ މަޝްހޫރު ރޯޒްވުޑް ހޮޓެލްސްގެ ރިސޯޓެއް ރާއްޖޭގައި ހުޅުވުމުގެ މަސައްކަތް ފަށައިފިއެވެ. މިއީ މާލެ އަތޮޅުގައި ތަރައްޤީކުރާ ރިސޯޓެކެވެ. މިރިސޯޓަށް ވެލާނާ އިންޓަނޭޝަނަލް އެއަރޕޯޓުން ފުރައިގެން ލޯންޗެއްގައި 35 މިނެޓުން އަދި ސީޕްލޭންގައި 10 މިނެޓުން ދެވޭނެއެވެ.
މި ރިސޯޓަށް ދީފައިވާ ނަމަކީ ”ރޯޒްވުޑް ރަންފަރު“އެވެ. މިރިސޯޓް ހުޅުވުމަށް ތައްޔާރުވަމުން އަންނަނީ 2027 ވަނަ އަހަރުއެވެ.
މި ރިސޯޓްގައި 120 ވިލާ ހުންނާނެއެވެ. އޭގެތެރޭގައި ބީޗް ފްރޮންޓް އަދި އޯވަރ ވޯޓަރ ވިލާތައް ހިމެނެއެވެ. ރޯޒްވުޑް ހޮޓެލް އެންޑް ރިސޯޓްސްއިން މައުލޫމާތުދޭ ގޮތުގައި ކޮންމެ ވިލާއެއްގައި ޕްރައިވެޓް ޕޫލެއް ހުންނާނެއެވެ.
މި ރިސޯޓްގައި ފަތުރުވެރިންނަށް ތަފާތު ގިނަ ޚިދުމަތްތަކެއް ލިބޭނެކަމަށް ރޯޒްވުޑް ހޮޓެލްސް އެންޑް ރިސޯޓްސްއިން މައުލޫމާތުދެއެވެ. އޭގެތެރޭގައި ދުނިޔޭގެ އެކި ކަންކޮޅުތަކުގެ ކެއުންތައް ލިބެންހުންނަ ރެސްޓޯރަންޓްތަކާއި، ބީޗް ކްލަބާއި، ފިޓްނަސް ސެންޓަރާއި، ސްޕާއާއި، ބޮޑެތި މީހުންނާއި އަދި އާއިލާތަކަށް ޚާއްސަ ޕޫލްތައް ހުންނާނެއެވެ.
ރޯޒްވުޑް ހޮޓެލްސް އެންޑް ރިސޯޓްސްގެ ރައީސް ރާދަ އަރޯރާ ބުނީ ރާއްޖެފަދަ ފަތުރުވެރިންގެ މެދުގައި މަޤްބޫލު މަންޒިލެއްގައި އެ ބްރޭންޑްގެ ރިސޯޓެއް ހުޅުވޭތީ އެއީ އެ ކުންފުންޏަށް ލިބޭ ވަރަށް ބޮޑު އުފަލަކާއި ފަޚުރެއް ކަމަށެވެ.
ރޯޒްވުޑް ހޮޓެލްސް އެންޑް ރިސޯޓްސްއިން ދުނިޔޭގެ 18 ގައުމެއްގައި 30 ތަނެއް އަންނަނީ ހިންގަމުންނެވެ. އޭގެތެރޭގައި އެމެރިކާ، ފްރާންސް ފަދަ މަޝްހޫރު މަންޒިލްތައްވެސް ހިމެނެއެވެ.