މިއަހަރުގެ ފުރަތަމަ ކުއާޓަރުގައި ބޭންކް އޮފް މޯލްޑިވްސް، ބީއެމްއެލްއަށް ފައިދާގެ ގޮތުގައި 504.2 މިލިއަން ރުފިޔާ ލިބިއްޖެއެވެ. މިއީ ކުރީ ކުއާޓަރު ކަމަށްވާ 2022 ވަނަ އަހަރުގެ 4 ވަނަ ކުއާޓަރާއި އަޅާބަލާއިރު ބޮޑު ކުރިއެރުމެކެވެ. އެ ކުއާޓަރުގައި ބީއެމްއެލްއަށް ސާފު ފައިދާގެ ގޮތުގައި ލިބިފައިވަނީ 352 މިލިއަން ރުފިޔާއެވެ.
ބޭންކް އޮފް މޯލްޑިވްސްގެ މިއަހަރުގެ ފުރަަތަމަ ކުއާޓަރުގައި އާމްދަނީގެ ގޮތުގައި ލިބިފައިވަނީ 1.1 ބިލިއަން ރުފިޔާއެވެ. މިއީ މިދިޔަ އަހަރުގެ ފުރަތަމަ ކުއާޓަރާއި އަޅާބަލާއިރު އިތުރު ޢަދަދެކެވެ. މިދިޔަ އަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި ބީއެމްއެލްއަށް ލިބިފައިވަނީ 983.1 މިލިއަން ރުފިޔާއެވެ.
މިއަހަރުގެ ފުރަތަމަ ކުއާޓަރުގައި ބީއެމްއެލްގެ ހިންގުމުގެ ޚަރަދަކީ 164.5 މިލިއަން ރުފިޔާއެވެ. މިއީ އޭގެ ކުރީގެ ކުއާޓަރާއި އަޅާބަލާއިރު ދަށް ޢަދަދެކެވެ. އޭގެކުރީ ކުއާޓަރުގައި ހިންގުމުގެ ޚަރަދުގެ ގޮތުގައި ހިނގާފައިވަނީ 256.6 މިލިއަން ރުފިޔާއެވެ.
ނިމުނު ކުއާޓަރުގައި ޓެކުހަށް ކެނޑުމުގެ ކުރިން ފައިދާގެ ގޮތުގައި ލިބިފައިވަނީ 690 މިލިއަން ރުފިޔާއެވެ. މިދިޔަ ކުއާޓަރުގައި ޓެކުހަށް ކެނޑުމުގެ ކުރިން ބީއެމްއެލްގެ ފައިދާއަކީ 380 މިލިއަން ރުފިޔާއެވެ. އެހެންކަމުން މާލީ ރިޕޯޓުން ދައްކާގޮތުން މިއަހަރުގެ ފުރަތަމަ ކުއާޓަރުގައި ބީއެމްއެލުން ވަނީ ރަނގަޅު ކާމިޔާބީއެއް ހާސިލްކޮށްފައެވެ.
މުޅި ރާއްޖެއަށް ބޭންކިންގ ނިޒާމް ފުޅާކުރުމަށް ބީއެމްއެލްއިން ކުރަމުންދާ މަސައްކަތުގެ ދަށުން މިހާރު 20 ބްރާންޗް އެބަހުއްޓެވެ. އަދި 141 އޭޓީއެމްއާއި، 85 ސެލްފް ސަރވިސް ބޭންކިންގ ސެންޓަރު ހުރިކަމަށް ބީއެމްއެލްއިން ބުނެއެވެ.