ރާއްޖޭގައި ރުކުގެ އާޖީލެއް ބިނާކުރުމަށް ސަރުކާރުން ހިންގަވާ ރުއް އާލާކުރެއްވުމުގެ ޤައުމީ ޕްރޮގްރާމް މިއަދު ހެނދުނު ފަށްޓަވައިފިއެވެ.
މި ޕްރޮގްރާމް ފަށާފައިވަނީ ހދ. ވައިކަރަދޫގައެވެ.
ރުއް އާލާކުރުމުގެ ޤައުމީ ޕްރޮގްރާމް ފަށްޓަވައިދެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަނެވެ. އެގްރިކަލްޗަރ މިނިސްޓްރީން ގްރީން ފަންޑުގެ މާލީ އެހީތެރިކަމާއެކު ހޯއްދަވައިފައިވާ މި 5000 ރުކަކީ 3 ނުވަތަ 4 އަހަރުގެ ތެރޭގައި ފޯދޭނެ ރުއްތަކެއްކަމަށް މިނިސްޓްރީން ވިދާޅުވެއެވެ.
ރާއްޖޭގައި ރުއް އާލާކުރެއްވުމުގެ ޤައުމީ ޕްރޮގްރާމެއް ފަށާފައި މިވަނީ ރާއްޖޭގެ ރުއްގަހަށް ޖެހޭ ބަލިތައް އިތުރުވެ ކާށްޓާއި ކުރުނބާ ލިބުން ދަތިވުމާ ގުޅިގެންނެވެ. އަތޮޅުތަކުގެ ތެރެއިން 7 އަތޮޅެއްގެ 11 ރަށަކަށް މި ރުއްތައް ބެއްސެވުމަށް ވަނީ ހަމަޖެހިފައެވެ.
ރާއްޖޭގައި #ރުކުގެއާޖީލެއް ބިނާކުރުމަށް ސަރުކާރުން ހިންގާ ‘ރުއް އާލާކުރުމުގެ ޤައުމީ ޕްރޮގްރާމްގެ ތެރެއިން ހދ. ވައިކަރަދޫގައި މިއަދު ވަނީ ރުއް އިންދާފައި .މިމަސައްކަތް ފައްޓަވައި ދެއްވާފައިވަނީ މިނިސްޓަރ އޮފް ފިޝަރީޒް މެރިންރިސޯސަސް އެންޑް އެގްރިކަލްޗަރ @DrHussainHassan pic.twitter.com/ZtOZ8zDZZg
— Min. of Fisheries, Marine Resources & Agriculture (@MoFMRAmv) May 5, 2023
މި ރުއްތައް ބެއްސެވުމަށް ހަމަޖެހިފައިވަނީ އެގްރިކަލްޗަރ މިނިސްޓްރީގެ ބެއްލެވުމުގެ ދަށުން އަތޮޅުތެރެއަށް، 3 ބުރަކަށް ބައްސަވައިލައްވައިގެން ކަމަށް އެ މިނިސްޓްރީއިން ވިދާޅުވިއެވެ.
އެގްރިކަލްޗަރ މިނިސްޓްރީން ރަށްރަށަށް ރުއްތައް ބެއްސެވުމަށް ނިންމާފައިވާއިރު، ރަށްރަށަށް އެ ރުއްތައް ބަހާނީ، ދާއިމީ ގޮތެއްގައި ބެލެހެއްޓޭނެ އިންތިޒާމުތަކެއް ހަމަޖެއްސޭތޯ ބެލުމަށްފަހުގައެވެ. އެގޮތުން ރަށްރަށުގެ ރަށު ކައުންސިލްތަކާ މަޝްވަރާކުރައްވައި ރުއްތައް ބެލެހެއްޓުމަށް ވަކި ބަޔަކު ޚާއްޞަކުރުމަށް މަސައްކަތްކުރައްވާނެ ކަމަށް އެގްރިކަލްޗަރ މިނިސްޓްރީން ވިދާޅުވެއެވެ.
އެގްރިކަލްޗަރ މިނިސްޓްރީން ލަފާކުރައްވަނީ ރަށްރަށް ބެއްސެވުމަށް ރައްޖެއަށް ގެނައި ރުއްތަކުން 2 ނުވަތަ 3 އަހަރުތެރޭ ކުނރުބާ ލިބި، ނަފާ ހޯދަން ފެށޭނެކަމަށެވެ. އެ މިނިސްޓްރީގެ އަމާޒަކީ ރާއްޖޭގެ ހުރިހާ އަތޮޅުތަކެއްގައި ވެސް ރުއްދަނޑުތައް ހެއްދުންކަމަށް ވިދާޅުވެއެވެ.