މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން އެމްއެމްޕީއާރުސީން ދެކުނު އިރުމަތީ އޭޝިއާގެ މަޝްހޫރު ލަގްޒަކީ ލައިފްސަޓައިލް ޕަބްލިކޭޝަނެއް ކަމަށްވާ ރޮބް ރިޕޯޓާއެކު ކެންޕޭނެއް ފަށައިފިއެވެ. ރޮބް ރިޕޯޓް ކިޔާ މީހުންގެ އަަދަދު 220 މިލިއަނަށް އަރާކަމަށް އެމްއެމްޕީއާރުސީން ބުނެއެވެ.
މި އަހަރުގެ މެއި މަހުން ފެށިގެން ޖުލައި މަހުގެ ނިޔަލަށް ކުރިއަށްގެންދާ މި ކެމްޕޭނުގެ މަޤްޞަދަކީ ދެކުނު އިރުމަތީ އޭޝިޔާ މާރކެޓުގައި ދިވެހިރާއްޖެ އިތުރަށް އިޝްތިހާރުކޮށް، ރާއްޖޭގެ ބްރޭންޑް ހަރުދަނާކުރުމެވެ. މި ކެންޕޭނުން ޓާގެޓް ކުރަމުންދަނީ ޚާއްޞަކޮށް މި މާކެޓުގެ މަތީ ފަންތީގެ ތަނަވަސް ފަރުތުވެރިންނަށް ކަމަށް އެމްއެމްޕީއާރުސީން ބުނެއެވެ.
އެމްއެމްޕީއާރުސީން ރޮބް ރިޕޯޓާއެކު ކުރިއަށްގެންދާ މި ކެންޕެއިންގެ ދަށުން ރޮބް ރިޕޯޓުގެ ފަރާތުން 2 ޕްރިންޓް އެޑްވަޓޯރިއަލްއަކާއި 6 ސިންގަލް ޕޭޖް ޕްރިންޓް އިޝްތިހާރު ހަދާނެކަމަށް އެމްއެމްޕީޢާރުސީން ބުނެއެވެ. މީގެއިތުރުން ރާއްޖެއިން ފަތުރުވެރިންނަށް ލިބޭ ތަފާތު ޚިދުމަތްތަކާ ގުޅޭގޮތުންވެސް ފަތުރުވެރިންނަށް މައުލޫމާތުދޭނެއެވެ. މި ކެންޕެއިންގެ ދަށުން 180،000 މީހުންނަށް ރާއްޖެ އިޝްތިހާރުވެގެންދާނެ ކަމަށް އެމްއެމްޕީއާރުސީ ލަފާކުރައްވައެވެ.
ދެކުނު އިރުމަތީ އޭޝިއާ މާރކެޓަކީ ރާއްޖޭގެ ފަތުރުވެރިކަމުގައި ވަރަށް މުހިންމު މާރކެޓެކެވެ. އެހެންކަމުން އެމްއެމްޕީއާރުސީން ދަނީ މި މާރކެޓުގައި ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކުރަމުންނެވެ.
މި މާރކެޓަށް އަމާޒުކޮށްގެން އެމްއެމްޕީއާރުސީން މިއަހަރު ކުރިއަށްގެންދިއުމަށް ހަމަޖެހިފައިވާ އިތުރު ޙަރަކާތްތަކަށް ބަލާއިރު ތައިލޭންޑްގެ މީޑިއާ ޓީމަކަށް ފެމިލިއަރައިޒޭޝަން ދަތުރެއް ކުރިއަށް ގެންދިއުމާއި، ދެކުނު އިރުމަތީ އޭޝިއާގައި ރޯޑްޝޯއެއް ބޭޭއްވުމާއި، މެލޭޝިއާގައި ބާއްވާ މާޓާ ފެއަރ އާއި ސިންގަޕޫރުގައި ބާއްވާ އެޑެކްސް އޯޝަން މިޝަންގައި ބައިވެރިވުން ހިމެނެއެވެ.