ރާއްޖޭގައި އެންމެ ކުރިއަރާފައިވާ 100 ކުންފުނި ހޮވުމަށް ބާއްވާ "ގޯލްޑް 100 ގާލާ" މި މަހު އޮންނާނެ ކަމަށް އިވެންޓް އިންތިޒާމްކުރާ ކޯޕަރޭޓް މޯލްޑިވްސްއިން ބުނެފިއެވެ. މި އިވެންޓް އޮންނާނީ މިމަހުގެ 16 ވަނަ ދުވަހުއެވެ.
މިހަފްލާގައި “ގޯލްޑް 100” މެގަޒިން އިފްތިތާހުކުރުމާއި އަދި އެންމެ ގަދަ 100 ކުންފުންޏަށް އެވޯޑް ދިނުން އޮންނާނެކަމަށް ކޯޕަރޭޓް މޯލްޑިވްސްއިން ބުނެއެވެ. “ގޯލްޑް 100” އަކީ ކޯޕަރޭޓް މޯލްޑިވްސް އިން ކޮންމެ އަހަރަކުވެސް ނެރޭ ރާއްޖޭގެ އެންމެ ކާމިޔާބު 100 ވިޔަފާރި ކުންފުނީގެ ލިސްޓެކެވެ.
ރާއްޖޭގެ އެކި ސިނާއަތްތައް ކުރިއެރުވުމަށް ގިނަ މަސައްކަތްތައްކޮށް، ވިޔަފާރި މައިދާނުގައި ކާމިޔާބާއި ކުރިއެރުން ހޯދާފައިވާ އަދި މުޖުތަމައަށް ގިނަ ހިދުމަތްތަކެއް ކޮށްފައިވާ ފަރާތަކަށް “ލައިފްޓައިމް އެޗީވްމަންޓް އެވޯޑް” ދިނުންވެސް މި ހަފްލާގައި އޮންނާނެއެވެ.
މިހަފްލާގައި ބައިވެރިވެވޭނީ ހަމަ އެކަނި ކޯޕަރޭޓް މޯލްޑިވްސްއިން ދައުވަތު ފޮނުވާ ފަރާތްތަކަށެވެ. މިއީ އެންމެން އެކީ ބައްދަލުވެލާ ގުޅުން ބަދަހިކުރުމަށް ވިޔަފާރިވެރިންނަށް ލިބޭ ފުރުސަތެއް ކަމަށް އިވެންޓް އިންތިޒާމްކުރާ ފަރާތުން ބުނެއެވެ. ކުންފުނިތަކުގެ ޗެއަރމަނުންނާއި، މެނޭޖިން ޑިރެކްޓަރުންނާއި، ސީއީއޯ އަދި ކުންފުނިތަކުގެ މުހިންމު ނިންމުންތައް ނިންމާ މަގާމުތަކުގައި ތިއްބަވާ ބޭފުޅުން މިހަފްލާގައި ބައިވެރިވާނެއެވެ.
ގޯލްޑް100 އަށް ހުށައަޅާ ކުންފުނިތަކުގެ ތެރެއިން 100 ކުންފުނި ހޮވަނީ މިނިވަން ކޮންސަލްޓަންސީ ފާމެއް މެދުވެރިކޮށް ކަމަށް ކޯޕަރޭޓް މޯލްޑިވްސްއިން ބުނެއެވެ. އެންމެ ފުރަތަމަ "ގޯލްޑް 100"ގެ ނަމުގައި އެވޯޑެއް ދޭންފެށީ 2017ވަނަ އަހަރުއެވެ.