މިދިޔަ އަހަރާއި އަޅާބަލާއިރު މިއަހަރު މިފްކޯއިން މަސް ގަނެފައިވާ އަދަދާއި މަސްވެރިންނަށް ދޫކޮށްފައިވާ ފައިސާގެ އަދަދު އިތުރުވެފައިވާކަމަށް ތަފާސް ހިސާބުތަކުން ދައްކައިފިއެވެ.
މިދިޔަ އަހަރަކީ މިފްކޯގެ ތާރީހުގައިވެސް އެ ކުންފުނިން އެންމެ ގިނަ އަދަދަކަށް މަސްވެރިންގެ އަތުން މަސްގަނެ މަސްވެރިންނަށް ފައިސާ ދޫކޮށްފައިވާ އަހަރެވެ. ނަމަވެސް މިދިޔަ އަހަރާއި އަޅާބަލާއިރު މިއަހަރު މިއަދަދު އަދަދު ވަނީ އިތުރުވެފައެވެ.
މިފްކޯގެ ތަފާސް ހިސާބުތައް ދައްކާގޮތުން 1 ޖަނަވަރީން ފެށިގެން މޭމަހުގެ 5 ވަނަ ދުވަހާއި ހަމައަށް މިއަހަރު ކިރާފައިވަނީ 30425 މެޓްރިކް ޓަނުގެ މަހެވެ. މިދިޔަ އަހަރު މި އަދަދު އުޅުނީ 25178 މެޓްރިކް ޓަނުގައެވެ. މިއީ %21 އިތުރުވުމެކެވެ.
މިއަހަރުގެ މި މުއްދަތުގައި މިފްކޯއަށް އެންމެ ގިނައިން މަސް ކިރާފައިވަނީ ކޫއްޑޫ ފިޝަރީޒް ކޮންޕްލެކްސްއަށެވެ. އެއީ މުޅި ޖުމްލަ 22923 މެޓްރިކް ޓަނުގެ މަހެވެ. މިދިޔަ އަހަރު ކޫއްޑޫ ފިޝަރީޒް ކޮންޕްލެކްސްއަށް ކިރާފައިވަނީ 19198 މެޓްރިކް ޓަނެވެ. އެހެންކަމުން މިއީ %19 އިތުރުވުމެކެވެ.
ދެން އެންމެ ގިނައިން މަސް ކިރާފައިވަނީ ފެލިވަރު ފިޝަރީޒް ކޮންޕްލެކްސްއަށެވެ. ފެލިވަރު ފިޝަރީޒް ކޮންޕްލެކްސްއަށް މިއަހަރު 3821 މެޓްރިކް ޓަނުގެ މަސް ކިރާފައިވާއިރު މިދިޔަ އަހަރު އުޅުނީ 3483 މެޓްރިކް ޓަނުގައެވެ. މިއީ %10 އިތުރުވުމެކެވެ.
އައްޑޫ ފިޝަރީޒް ކޮންޕްލެކްސްއަށް މިއަހަރު ކިރާފައިވަނީ 3681 މެޓްރިކް ޓަނުގެ މަހެވެ. ނަމަވެސް މިދިޔަ އަހަރުގެ މި މުއްދަތުގައި 2498 މެޓްރިކް ޓަނުގެ މަސްކަމަށް މިފްކޯގެ ތަފާސްހިސާބުތަކުން ދައްކައެވެ. މިއީ %47 އިތުރުވުމެކެވެ.
1 ޖަނަވަރީން ފެށިގެން މޭމަހުގެ 5 ވަނަ ދުވަހުގެ ނިޔަލަށް މިފްކޯއިން ވަނީ މަސްވެރިންނަށް 505 މިލިއަން ރުފިޔާއެވެ. މިދިޔަ އަހަރުގެ މި މުއްދަތުގައި މަސްވެރިންނަށް ދޫކޮށްފައިވާ ފައިސާގެ އަދަދަކީ 405 މިލިއަން ރުފިޔާކަމަށް މިފްކޯގެ ތަފާސް ހިސާބުތަކުން ދައްކައެވެ.
މަސްވެރިންނަށް އެންމެ ގިނައިން ފައިސާ ދޫކޮށްފައިވަނީވެސް ކޫއްޑޫ ފިޝަރީޒް ކޮންޕްލެކްސްެއިންނެވެ. އެއީ 384 މިލިއަން ރުފިޔާއެވެ. މިދިޔަ އަހަރު ކޫއްޑޫއިން މަސްވެރިންނަށް ދޫކުރި ފައިސާގެ އަދަދަކީ 311 މިލިއަން ރުފިޔާއެވެ.
މިފްކޯއިން އަންނަނީ ގޮންޖެހުންތަކާއެކުވެސް މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް މަސައްކަތް ކުރަމުންނެވެ. އެގޮތުން މިފްކޯގެ މަސް ކާރުޚާނާތައް އަޕްގްރޭޑުކުރުމުގެ މަސައްކަތް އަންނަނީ ކުރަމުންނެވެ. އަދި މަސް ގަންނާނެ އިތުރު ބޯޓެއްވެސް މިހާރު ވަނީ ރާއްޖެ ގެނެސްފައެވެ. މީގެއިތުރަށް ތ.އަތޮޅު ފުނައްޑޫ އޮޕަރޭޝަނަށް ގެނެސް އެތަން ހިންގުމަށް ފިޝަރީޒް މިނިސްޓްރީން މިހާރު ވަނީ މިފްކޯއަށް ހަވާލުކުރައްވާފައެވެ.
ތ. ފުނައްޑޫ އޮޕަރޭޝަނަށް ގެނެސް، މަސް ގަތުމުގެ މަސައްކަތް ފެށުމަށް، 236 މިލިއަން ރުފިޔާ އިންވެސްޓް ކުރަންޖެހޭ ކަމަށް މިފްކޯއިން ވަނީ ބުނެފައެވެ. ރަށުގެ ތަންތަން މަރާމާތުކޮށް، ބޭނުންވާ ވަޞީލަތްތައް ޤާއިމްކުރުމަށް 90 މިލިއަން ރުފިޔާ ޚަރަދުވާނެކަމަށާއި އަދި ފުނައްޑޫ ބަނދަރު މަސްގަނެވޭ ފެންވަރަށް ތަރައްޤީކުރުމަށް 146 މިލިއަން ރުފިޔާ ޚަރަދުވާނެކަމަށްވެސް މިފްކޯއިން ލަފާކުރެއެވެ.