ކުދި ވިޔަފާރިތައް ކުރިއެރުވުމަށް 600 މިލިއަން ރުފިޔާގެ އިންވެސްޓްމަންޓް ފަންޑެއް ޤާއިމްކުރައްވަނީ
އިސްލާމިކް ޑިވެލޮޕްމަންޓް ބޭންކު، އައިޑީބީ އާ ގުޅިވަޑައިގެން ކުދި ވިޔަފާރިތަކާއި މެދުފަންތީގެ ވިޔަފާރިތަކަށް މާލީ އެހީ ފޯރުކޮށްދެއްވުމަށް 600 މިލިއަން ރުފިޔާގެ އެސްއެމްއީ އިމްޕެކްޓް ފަންޑެއް ޤާއިމްކުރެއްވުމާ ގުޅޭ ފަހުނާމާއެއްގައި އެ ބޭންކާއެކު ދިވެހި ސަރުކާރުން ސޮއިކުރައްވައިފިއެވެ.
ކުދި ވިޔަފާރިތަކާއި މެދުފަންތީގެ ވިޔަފާރިތަކަށް، ބޭނުންވާ މާލީ އަދި ފަންނީ އެހީތެރިކަން ދެއްވުމަށް އިސްލާމިކް ފައިނޭންސްގެ އުޞޫލުތަކާ އެއްގޮތަށް ޤާއިމްކުރައްވާ މި ފަންޑުން ކުދި ވިޔަފާރިތަކާއި މެދުފަންތީގެ ވިޔަފާރިތައް ނުވަތަ އެސްއެމްއީތައް ކުރިއަރުވަން ބޭނުންވާ ފައިސާއާއި ފަންނީ އެހީތެރިކަން ދެއްވާނެއެވެ.
ފިނޭންސް މިނިސްޓްރީން ވިދާޅުވީ މި ފަންޑު ޤާއިމްކުރެއްވުމަށް އައިޑީބީން 40 މިލިއަން ޑޮލަރު ނުވަތަ 616 މިލިއަން ރުފިޔާގެ ކެޕިޓަލެއް ދޭނެކަމަށެވެ. އަދި އިންވެސްޓްމަންޓްތަކުގެ ފައިދާއިން ފަންޑު އިތުރަށް ފުޅާކުރެވޭނެކަމަށްވެސް ފިނޭންސް މިނިސްޓްރީން ވިދާޅުވެއެވެ.
މި ފަންޑު ހިންގައި ބަލަހައްޓާނީ މޯލްޑިވްސް ފަންޑު މެނޭޖްމަންޓް ކޯޕަރޭޝަން، އެމްއެފްއެމްސީއާއި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީންނެވެ.
ފިނޭންސް މިނިސްޓްރީން ވިދާޅުވީ ފަންޑު ޤާއިމްކުރެއްވުމަށް ކުރަންޖެހޭ މަސައްކަތްތައް އައިޑީބީއާ ގުޅިވަޑައިގެން ކުރިއަށް އޮތް މަދުދުވަސްކޮޅެއްގެ ތެރޭގައި ނިންމެވުމަށްފަހު ފަންޑު ހިންގަވަން ފަށްޓަވާނެކަމަށެވެ.
Minister @iameeru and the Chairman and President of @isdb_group H.E. Dr. Muhammad Al Jasser signed a MOU for a USD40 million project on establishing a SME Impact Fund at the #IsDB2023AM. 1/2 pic.twitter.com/OnclebklKs
— Ministry of Finance (@MoFmv) May 15, 2023
އެސްއެމްއީ އިމްޕެކްޓް ފަންޑު ޤާއިމްކުރެއްވުމާގުޅޭ ފަހުމުނާމާގައި ސޮއިކުރައްވެއްވީ ސަޢޫދީ ޢަރަބިއްޔާގެ ޖިއްދާގައި ބޭއްވި އައިޑީބީގެ އަހަރީ ބައްދަލުވުމުގެ ހަވާސާގައެވެ. މި ފަހުނާމާގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރ އިބްރާހީމް އަމީރެވެ. އައިޑީބީގެ ފަރާތުން އެ ބޭންކުގެ ރައީސް ޑރ. މުޙައްމަދު އަލްޖައްސަރެވެ.
ފިނޭންސް މިނިސްޓްރީން ވިދާޅުވީ އެސްއެމްއީތަކަށް މިވަގުތު ކުރިމަތިވާ އެކިއެކި މާލީ އަދި ފަންނީ ދަތިތަކަށް އައިޑީބީއާ ގުޅިގެން ޤާއިމްކުރައްވާ އެސްއެމްއީ އިމްޕެކްޓް ފަންޑުން އެހީތެރިކަން ލިބޭނެކަމަށެވެ.
ސިންދަފާތު އިޤްތިޞާދެއް ބިނާކުރެއްވުމަށް ކުދި ވިޔަފާރިތަކާއި މެދުފަންތީގެ ވިޔަފާރިތައް ކުރިއެރުވުމަކީ ވަރަށް މުހިއްމު ކަމެއްގެ ގޮތުގައި ސަރުކާރުން ދެކެވަޑައިގެން، އެކަމަށް ގިނަ މަސައްކަތްތަކެއް ގެންދަވަނީ ކުރައްވަމުންނެވެ. އަދި އެސްއެމްއީތައް ކުރިއެރުވުމުން ރަށްރަށުގައި ވަޒީފާގެ އިތުރު ފުރުޞަތުތަކާއި އިޤްތިޞާދީ ޙަރަކާތްތައް އިތުރުވާދާނެކަމަށް ވެސް ސަރުކާރުން ޤަބޫލުކުރައްވައެވެ.
ސަރުކާރުން މިހާރުވެސް ވަނީ ކުދި ވިޔަފާރިތަކާއި މެދުފަންތީގެ ވިޔަފާރިތައް ކުރިއެރުވުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީގެ ނަމުގައި ޚާއްޞަ ބޭންކެއްވެސް ޤާއިމްކުރައްވައިފައެވެ. އެ ބޭންކުން ވަނީ އެސްއެމްއީތަކަށް މިހާތަނަށް އެތައް ބިލިއަން ރުފިޔާއެއްގެ ފައިނޭންސް ދެއްވައިފައެވެ.