ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓްކުރުމާ ގުޅޭ ގޮތުން ރަޝިޔާއާ އެކު ހަދާފައިވާ އެއްބަސްވުމުގެ މުއްދަތު އިތުރުކުރަން ދެ ފަރާތުން އެއްބަސްވެފައިވާ ކަން އިޢުލާނުކޮށްފިއެވެ. މި ކަން އިޢުލާނު ކުރައްވާފައި ވަނީ، އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާކުރައްވާފައިވާ ތުރުކީވިލާތުގެ ރައީސް ރަޖަބް ޠައްޔިބް އުރުދުޣާނެވެ. އެއްބަސްވުން ހަދާފައި ވަނީ އ.ދއާ ވެސް ގުޅިގެންނެވެ.
އެއްބަސްވުމުގެ މުއްދަތު އިތުރު ދެ މަސް ދުވަހުގެ މުއްދަތަށް އިތުރުކޮށްފައި މި ވަނީ އެއްބަސްވުމުގެ މުއްދަތު މޭ 18 ވަނަ ދުވަހު ހަމަވެފައި ވަނިކޮށެވެ. މިއީ، ތުރުކީވިލާތުގެ ރިޔާސީ އިންތިޚާބުގައި އިތުރު ދައުރަކަށް ވާދަކުރައްވާ އުރުދުޣާނަށް ޚާރިޖީ ދާއިރާއިން ލިބުނު ބޮޑު ކާމިޔާބީއެއްގެ ގޮތުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. އެ ޤައުމުގެ ރިޔާސީ އިންތިޚާބުގެ ދެވަނަ ބުރުގެ ވޯޓުލުން އޮންނާނީ މޭ 28 ވަނަ ދުވަހުއެވެ.
އެއްބަސްވުމުގެ މުއްދަތު އިތުރުކުރުމަށް ރަޝިޔާއާއި ޔޫކްރެއިނުން އެއްބަސްވުމުން އުރުދުޣާން ވަނީ ރައީސް ވްލަޑިމިޔަރ ޕުޓިންއާއި ރައީސް ވޮލޮޑޮމީރް ޒެލެންސްކީގެ އިތުރުން އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝަށް ޝުކުރު އަދާކުރައްވާފައެވެ. އަދި، ޔޫކްރެއިނުގެ ބަނދަރުތަކުން ފުރާ ބޯޓުފަހަރަށް ހުރަސްއެޅުން ހުއްޓައިލުމަށް ޕުޓިން އެއްބަސްވެ ވަޑައިގަންނަވާފައިވާ ކަން ވެސް އުރުދުޣާން ހާމަކުރެއްވިއެވެ.
"ރަޝިޔާގައި ތިބި އަޅުގަނޑުމެންގެ ރަޙުމަތްތެރިންގެ މަސައްކަތާއި ޔޫކްރެއިނުގައި ތިބި އަޅުގަނޑުމެންގެ ރަޙުމަތްތެރިންގެ އެހީތެރިކަމާ އެކު ގޮވާން އެކްސްޕޯޓް ކުރުމާ ގުޅޭ އެއްބަސްވުމުގެ މުއްދަތު މި ވަނީ އިތުރު ދެ މަސް ދުވަހުގެ މުއްދަތަކަށް އިތުރުކުރެވިފައި،" ތުރުކީވިލާތުގެ ޤައުމީ ޓީވީ މެދުވެރިކޮށް ރައްޔިތުންނާ މުޚާތަބު ކުރައްވާ ވާހަކަފުޅު ދައްކަވަމުން އުރުދުޣާން ވިދާޅުވިއެވެ.
އެއްބަސްވުމުގެ މުއްދަތު އިތުރު ކުރުމުން ޔޫކްރެއިނުން ވަނީ ތުރުކީވިލާތާއި އ.ދއަށް ޝުކުރު އަދާކޮށްފައެވެ. "މި އެއްބަސްވުމަކީ މުޅި ދުނިޔޭގެ ކާބޯތަކެތީގެ ރައްކާތެރިކަން ކަށަވަރު ކުރުމަށް މުހިންމު އެއްބަސްވުމެއް. ދުނިޔޭގެ އެކި ކަންކޮޅުތަކުގައި ދިރިއުޅޭ އެތަކެއް މިލިޔަން މީހުން ޔޫކްރެއިނާއި ރަޝިޔާގައި އުފައްދާ ކާބޯތަކެތީގެ ބާވަތްތަކަށް ބަރޯސާވޭ،" ގުތެރޭޝް ވިދާޅުވިއެވެ. ދިގު މުއްދަތަކަށް މި އެއްބަސްވުން ދެމެހެއްޓުމަށް މަސައްކަތް ކުރުމަށް ވެސް ގުތެރޭޝް ގޮވައިލެއްވިއެވެ.
ނަމަވެސް، ރަޝިޔާއިން ވަނީ މި އެއްބަސްވުން ތަންފީޒު ކުރުމުގައި އެ ޤައުމާއި ޔޫކްރެއިނާ ދެމެދު ތަފާތުކުރުންތައް ގެންގުޅޭ ކަމަށް ތުހުމަތުކޮށް އެ ކަމަށް ފާޑުކިޔާފައެވެ. އަދި، އެ ކަން ވީ އެންމެ އަވަހަކަށް ހައްލު ކުރުމަށް ރަޝިޔާއިން ވަނީ ގޮވައިލާފައެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ޔޫކްރެއިނުގައި ހަނގުރާމަ ފެށުމުގެ ކުރިން ޔޫކްރެއިނަކީ ދުނިޔޭގެ ބާޒާރަށް އެންމެ ގިނަ ޢަދަދަކަށް ގޮވާމުގެ ބާވަތްތައް ފޯރުކޮށްދޭ ޤައުމެކެވެ. ނަމަވެސް، ހަނގުރާމަ ފެށުމަށް ފަހު ރަޝިޔާއިން ވަނީ ޔޫކްރެއިންގެ ބަނދަރުތަކުން ފުރާ ބޯޓުފަހަރަށް ހުރަސް އަޅަން ފަށާފައެވެ. އެއާއެކު، ދުނިޔޭގެ ބާޒާރުގައި ކާބޯތަކެތީގެ އަގުތައް އިންތިހާއަށް އުފުލިގެން ދިޔައެވެ. އަދި، ފަގީރު ޤައުމުތަކުގައި ދިރިއުޅޭ އެތަކެއް މިލިޔަން މީހުންނެއް ކާބޯތަކެއްޗަށް ޖެހުނެވެ.
އެއްބަސްވުމެއްގެ ދަށުން ޔޫކްރެއިންގައި އުފައްދާ ގޮވާމުގެ ބާވަތްތައް އަލުން އެކްސްޕޯޓް ކުރަން ފަށާފައި ވަނީ 2022 ވަނަ އަހަރުގެ ޖުލައި މަހުއެވެ. އެ އެއްބަސްވުމުގެ ދަށުން ޔޫކްރެއިނުން ގޮވާން ބަރުކޮށްދެން ދަތުރުކުރާ ބޯޓުފަހަރަށް ޚާއްޞަ މަގެއް ވަނީ ކަނޑައަޅާފައެވެ. މި އެއްބަސްވުމުގެ ދަށުން ޔޫކްރެއިނުން 30 މިލިޔަން ޓަނުގެ ގޮވާމުގެ ބާވަތްތައް މިހާތަނަށް ވަނީ ބޭރުކޮށްފައެވެ.