އައްޑޫ ސިޓީ މީދޫގައި އައު މިސްކިތެއް ޢިމާރާތްކުރުމުގެ މަސައްކަތް ސަރުކާރުން ބަޔަކާއި ޙަވާލުކުރައްވައިފިއެވެ.
މިނިސްޓްރީ އޮފް އިސްލާމިކް އެފެއާޒްގެ ފަރާތުން މިމަސައްކަތް ޙަވާލުކުރައްވާފައިވަނީ، ނޫރައްދީން އިންވެސްޓްމަންޓްއާއެވެ.
އެއްފަހަރާ 700 މީހުންނަށް ނަމާދުކުރެވޭ ޖާގައިގެ މިމިސްކިތުގެ މަސައްކަތް އެކުންފުންޏާއި ޙަވާލުކުރައްވާފައިވަނީ އަހަރެއްހާ ދުވަހުގެ ތެރޭގައި މަސައްކަތް ނިންމާގޮތަށެވެ. ޒަމާނީ ފަރުމާއަކަށް ތަރައްޤީކުރާ މިމިސްކިތުގައި އަންހެނުންނަށް ވަކިން ނަމާދުކުރެވޭނެ ސަރަޙައްދެއްވެސް ޤާއިމުކުރުމަށް ވަނީ ހަމަޖެހިފައެވެ.
މިމަސައްކަތް ނޫރައްދީން އިންވެސްޓްމަންޓާއި ޙަވާލުކުރުމާއި ގުޅޭ އެއްބަސްވުމުގައިމިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީއެވެ. އަދި ރައްދީން އިންވެސްޓްމަންޓްގެ ފަރާތުން ސޮއިކުރެއްވީ މެނޭޖަރ ޢަބްދުﷲ ސާލިހެވެ.
އައްޑޫ ސިޓީ މީދޫގައި 700 މީހުންގެ ޖާގައިގެ މިސްކިތެއް ޢިމާރާތްކުރުމަށް އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން.
— Ministry of Islamic Affairs (@MVIaffairs) June 7, 2023
މިއީ ސަރުކާރުގެ ޕީއެސްއައިޕީގެ ދަށުން ކުރިއަށްގެންދިއުމަށް ހަމަޖެހިފައިވާ މަޝްރޫޢެއް. pic.twitter.com/U5Ssw2fRHQ
މިރަސްމިއްޔާތުގައި ވާހަކަފުޅުދައްކަވަމުން އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވަނީ މިމަސައްކަތް ކަނޑައެޅިފައިވާ މުއްދަތުގެ ތެރޭގައި ނިންމަވައިދެއްވުމަށް އެދިވަޑައިގަންނަވާފައެވެ.
މިރަސްމިއްޔާތުގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމްވެސް ވަނީ ބައިވެވެވަޑައިގެންނެވިއެވެ. މިރަސްމިއްޔާތުގައި ރޮޒައިނާވަނީ މިއީ މީދޫގައި ސަރުކާރުގެ ފަރާތުން ތަރައްޤީކޮށްދެއްވާ ފުރަތަމަ މިސްކިތްކަން ފާހަގަކުރައްވާފައެވެ. އަދި މިއީ އެރަށުގެ ރައްޔިތުންގެ ވަރަށް ބޮޑު އުންމީދެއްކަމަށާއި، އެހެންކަމުން މިސްކިތުގެ މަސައްކަތް އަވަސްކޮށްދެއްވުމަށް ރޮޒައިނާ އެދިވަޑައިގެންނެވިއެވެ.
މީދޫގައި ތަރައްޤީކުރާ މިސްކިތަކީ ސަރުކާރުގެ ބަޖެޓުން ޚަރަދުކޮށްގެން ތަރައްޤީކުރާ މިސްކިތެކެވެ. މިމަޝްރޫޢަށް ގާތްގަނޑަކަށް 14 މިލިއަން ރުފިޔާ ހަރަދުވެއެވެ.