ޖަޕާނުން ދިވެހިރާއްޖޭގެ ޤައުމީ ޔުނިވަރސިޓީއަށް 127 ފޮތް ހަދިޔާކޮށްފި

ޖަޕާނުން ދިވެހިރާއްޖޭގެ ޤައުމީ ޔުނިވާސިޓީއަށް 127 ފޮތް ހަދިޔާކޮށްފިއެވެ.

މި ފޮތްތައް ހަދިޔާ ކޮށްފައިވަނީ ދިވެހިރާއްޖޭގެ ޤައުމީ ޔުނިވާސިޓީގެ ލަބްރަރީގައި ބޭއްވި ޙަފްލާއެއްގައި ޖަޕާނުން ރާއްޖެއަށް ކަނޑައަޅާފައިވާ ސަފީރު ޓިކޫޗީ މިޑޯރީއެވެ. ރާއްޖޭގެ ޤައުމީ ޔުނިވާސިޓީގެ ފަރާތުން ފޮތްތަކާއި ޙަވާލުވީ އެޔުނިވަރސިޓީގެ ޗާންސެލަރ ޑރ. ޙަސަން ޙަމީދެވެ.

މި ފޮތްތައް ރާއްޖެއަށް ހަދިޔާކޮށްފައިވަނީ ޖަޕާނުގެ ޖަމިއްޔާއެއް ކަމުގައިވާ "ދި ނިޕޯން ފައުންޑޭޝަން"ގެ އިސްނެގުމަކަށް 2008 ވަނަ އަހަރުން ފެށިގެން ހިންގާ "ރީޑް ޖަޕާން" ޕްރޮޖެކްޓުގެ ދަށުންނެވެ. މި ޕްރޮޖެކްޓުގެ މަޤުޞަދަކީ މިއަދުގެ ޖަޕާނާއި ބެހޭ މަޢުލޫމާތު ދުނިޔޭގެ އެކި ކަންކޮޅުތަކުގައި "ރީޑް ޖަޕާން" ޕްރޮޖެކްޓުގެ ދަށުން ނެރޭ ފޮތްތަކުގެ ކިޔުންތެރީންނަށް ފޯރުކޮށްދިނުމެވެ.

މި ފޮތްތަކުގައި ޖަޕާނާއި ބެހޭ ގޮތުން ތަފާތު މަޢުލޫމާތު ހިމެނިފައިވާނެކަމަށް ރާއްޖޭގައި ހުންނަ ޖަޕާނުގެ އެންބަސީއިން ހާމަކޮށްފާވެއެވެ. އެގޮތުން ޖަޕާނުގެ ސިޔާސީ ކަންކަމާއި، ބޭރުގެ ގުޅުންތަކާއި، ޖަޕާނުގެ އިޤުތިޞާދާއި ވިޔަފާރި އާއި ފަންނާއި ތާރީޚާއި ގުޅޭ ތަފާތު މަޢުލޫމާތުތައް މި ފޮތްތަކުން ލިބިގެންދާނެއެވެ.

ނިޕޯން ފައުންޑޭޝަނުން މީގެ ކުރިންވެސް ވަނީ "ރީޑް ޖަޕާން" ޕްރޮޖެކްޓުގެ ދަށުން 2010 ވަނަ އަހަރު ރާއްޖޭގެ ޤައުމީ ކުތުބުޚާނާ އަށާއި 2017 އަހަރު ހިރިޔާ ސްކޫލަށާއި، 2018 އަހަރު ސިވިލް ސަރވިސް ޓްރެއިނިންގ އިންސްޓިޓިއުޓަށް ހަދިޔާކޮށްފައެވެ.

ދިވެހިރާއްޖެ އާއި ޖަޕާނާއި ސިޔާސީ ގޮތުން ގުޅުން ޤާއިމް ކުރިފަހުން ޖަޕާނުން އަންނަނީ ރާއްޖޭގެ އިޖުތިމާޢީ އިޤްތިޞާދީ އެކި ދާއިރާތަކުން ބޭނުންވާ އެހީތެރިކަން ފޯރުކޮށްދެމުންނެވެ.