އަބުދުލްޣަފޫރު އަލީ ގައްބެ މީގެ މަހެއްހާ ދުވަސްކުރިން ފެށި ދަތުރު މިއަދު ނިންމާލިއިރު މާލެއިން ވަރަށް ގިނަ ބަޔަކު ގައްބެއަށްވަނީ ހޫނު މަރުހަބާއެއް ކިޔާފައެވެ. އިއްޒުއްދީން ފާލަމުން ފުރަތަމަ ވެސް ގައްބެއަށް މަރުހަބާކީ ގައްބެގެ ދަރިފުޅާ އަންހެނުންނެވެ. ގިނަ ދުވަސްތަކަށްފަހު ގައްބެ އާއިލާއާ ދިމާވުމުން ގައްބެ ބުނީ އާއިލާއާ އެކުވެރިންނާ ދިމާވުމުން ބުނެދޭން ނޭނގޭ އިހުސާސްތަކެއް ކުރެވުނު ކަމަށެވެ. ގައްބެގެ އަންހެނުން ފިލީޝިއާ ބުނީ މިއީ ގައްބެގެ ވަރަށް ބޮޑު ހުވަފެނެއް ހަޤީގަތަކަށްވީ ދުވަސް ކަމަށާއި، މިއަދަކީ ހަޔާތުގައި އައި އެންމެ އުފާވެރި ދުވަސްކަމަށެވެ. ފިލީޝިއާ ބުނީ ކޮންމެ ދުވަހަކުވެސް ގައްބެއާ ފޯނުން ގުޅައިގެން ވާހަކަ ދެއްކި ކަމަށެވެ.
"މިއީ ގައްބެގެ ވަރަށް ބޮޑު ހުވަފެނެއް، މިދަތުރު ނިންމާލުމުން މިއީ ލިބުނު ވަރަށް ބޮޑު ހިތްހަމަ ޖެހުމެއް، ކޮންމެ ދުވަހަކުވެސް ވާހަކަދައްކަން ފޯނުން ގުޅައިގެން. މިދަތުރުގައި އެންމެ ބޮޑު ހިތްހަމަ ޖެހުމެއް ލިބުނީ ވީޑިއޯ ކޯލް ކޮށްލި ދުވަހު. ވަރަށް އުފާވި އެދުވަހު" ގައްބެގެ އަންހެނުން ފިލީޝިއާ ބުންޏެވެ.
ތިރީސް އަށް ދުވަހު ކަނޑުމަތީ ހޭދަކޮށް ފަންސާސް ރަށަށް ގައްްބެ ކުރި މިދަރުގައި ބައިވެރިވި އަދި މިދަތުރު އިންތިޒާމްކުރި އެޓޯލް ސެއިލާގެ ފަރާތުން ސިކަންދަރު ނަސްރުﷲ ކަމާލުއްދީން ބުނީ މިއީ ވަރަށް ޗެލެންޖިންގ ދަތުރެއް ކަމަށާއި، މި ތާރީހީ ދަތުރު ނިންމާލެވުމުން ވަރަށް ބޮޑު ހިތްހަމަ ޖެހުމެއް ލިބިފައިވާ ކަމަށެވެ.
" މިދަތުރުގައި ވަރަށް ގިނަ ކަންކަން ތަޖުރިބާކުރިން. އެޓޯލް ސެއިލާއަށް ލިބުނު ވަރަށް ބޮޑު ކާމިޔާބެއް މިއީ. ވަރަށް ހިތްހަމަ ޖެހިއްޖެ" އެޓޯލް ސެއިލާގެ ފަރާތުން ސިކަންދަރު ބުންނެވެ،
ގައްބެ ރާއްޖެ ވަށާ ބުރު ޖެހި ދަތުރުގައި އެންމެ ބޮޑު ސަޕޯޓެއް ދިން ފަރާތްތަކުގެ ތެރެއިން ދިރާގު ވެގެންދިޔައީ ސަލާމަތީ ގޮތުންނާއި މުއާސަލީތީ ކަންކަމުގައި ގައްބެއަށް އެންމެ ބޮޑު ސަޕޯޓެއް ދިން ފަރާތަށެވެ. މުޅި ދަތުރު ނިމެންދެން ގައްބެ ދަތުރުކުރާ މިސްރާބު ބެލުމާ ސަލާމަތީ ގޮތުން ގައްބެ ދަތުރު ފުރިހަމަ ކުރުމަށް ދިރާގު ވެގެންދިޔައީ މުހިންމު ބައެއްގެ ގޮތުގައެވެ. ދިރާގުގެ މާކެޓިންގ ކޮމިއުނިކޭޝަން އެންޑް ޕަބްލިކް ރިލިޭޝަން މުހައްމަދު މިރުޝާން ހަސަން ވިދާޅުވީ ގައްބެ ދަތުރު ނިންމުން ވެގެންދިޔައީ ލިބުނު ބޮޑު އުފަލެއް ކަމުގައެވެ. އަދި މިފަދަ ހަރަކާތެއްގައި ދިރާގު ބައިވެރިވާން ފުރުސަތު ލިބުނީތީވެ ދިރާގުންވަނީ ގައްބެއާއި ޓީމަށް ޝުކުރު އަދާކޮށްފައެވެ.
" މިއީ ވަރަށް ތަފާތު ކަމެއް. އަޅުގަނޑުމެން ފުރަތަމަ ބެލީ ގައްބެއަށް ސަލާމަތީ ކަންކަން ފުރުހަަމަ ކޮށްދެވޭތޯ. އެގޮތުން ޓްރެކް ކޮށްގެން އަބަދުވެސް ގައްބެ އުޅެމުންދާ ސަރަހައްދުތައް ބެލިން. އަދި އަބަދުވެސް ގައްބެއަށް ގުޅޭ ގޮތަށް އަޅުގަނޑުމެންވާނީ ކަންކަން އިންތިޒާމްކޮށްފަ" މިރުޝާން ވިދާޅުވިއެވެ.
މިއިވެންޓްގެ މެއިން ސްޕޮންސަރެއްގެ ގޮތުގައި ފެނިގެންދިޔައީ އެލިއާއެވެ. ހާއްސަކޮށް އެލިއާގ މެނޭޖިންގ ޑިރެކްޓަރ އަލާއު އަލީ އަކީ އަމަލީގޮތުން މިދަތުރުގައި ގައްބެއާއެކު ވަރަށް ގިނަ ތަޖުރިބާތަކެއް ކުރެއްވި އެއްފަރާތެވެ. އަލާއު ވިދާޅުވީ މިއަދު ގައްބެ ދަތުރުގައި ކުރި ތަޖުރިބާ އަކީ ބުނެދޭން ނޭނގޭހާވެސް އުނދަގޫ ބުރަ މަސައްކަތެއް ކަމަށެވެ. އަދި ގައްބެގެ ހިތްވަރަށް އަލާއު ވަނީ ތަޢުރީފްކޮށްފައެވެ.
" ވަރަށް ތަފާތު މީހެއް ގައްބެއަކީ. އަޅުގަނޑުމެން ހައިރާންވަން ގައްބެގެ ހިތްވަރު ފެނިފަ. ގައްބެއަކީ ހަމަ ލިވިންގ ލެޖެންޑެއް" އަލާއު ވިދާޅުވިއެވެ.
މިދަތުރަކީވިޒިޓް މޯލްޑިވްސް އިޔަރ 2016 އާއި ގުޅިގެން ހިންގި ރާއްޖޭގެ ފަތުރުވެރިކަން އިޝްތިހާރުކުރުމުގެ ޕްރޮގްރާމްގެ ބައެކެވެ. އެޓޯލް ސެއިލަރއިން މިދަތުރު ކުރިއަށްގެންދަޔައީ ޓޫރިޒަމް މިނިސްޓްރީއާއި ގުޅިގެންނެވެ. މީގެ ތިރީސް އަށް ދުވަސް ކުރިން ރާއްޖެ ވަށާ ބުރެއް ޖެހުމަށް ގައްބެ ފެށި ދަތުރު ނިންމައި މާލެ އައިރު ގައްބެ ވަނީ މިދަތުރުގައި ރާއްޖޭގެ ފަންސާސް ރަށަކަށް ދަތުރުކޮށް ރާއްޖޭގެ ބޮޑުތި ކަނޑުތަކުގައި ރިޔާ ކަނދުގައި ދަތުރުކޮށްފައެވެ. ކޮންމެ ރަށަކުންވެސް މިދަުތުރުގައި ގައްބެއަށް ވަނީ ހޫނު މަރުހަބާއެއް ކިޔާފައެވެ.