ގުޅިފަޅު މަޝްރޫޢާއެކު އިޤްތިޞާދަށް ކުރިއެރުންތަކެއް ލިބި، ސިނާޢަތްތައް ކުރިއަރާނެ: ރައީސް

ގުޅިފަޅުގައި ހިންގުމަށް ހަމަޖެހިފައިވާ އިޤްތިޞާދާއި ގުޅޭ މަޝްރޫޢުތަކުގެ ސަބަބުން ރާއްޖޭގެ އިމްޕޯޓް އެކްސްޕޯޓަށް ބޮޑު ކުރިއެެރުންތަކެއް ލިބިގެންދާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ގުޅިފަޅުގެ ދެވަނަ ފިޔަވަހި ހިއްކަން ފެށުމަށް ބޭއްވެވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ގުޅީފަޅަށް ގެންނަ އިޤްތިޞާދީ ތަރަައްޤީއާއެކު މަސްވެރިކަމާއި، ފަތުރުވެރިކަމުގެ ސިނާޢަތަށްވެސް ކުރިއެރުންތަކެއް އަންނާނެކަމަށެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ ގުޅިފަޅު ހިއްކައިގެން ތަރައްޤީކުރާ ބިމުން ބަންޑާރަ ގޯތި ދޫކުރުމުގެ އިތުރުން، ރާއްޖޭގެ އިޤްތިޞާދީ ތަރައްޤީއާ ގުޅިފައިވާ މުހިންމު ދެ ކަމެއް، އެތަނުގައި ހިނގާނެކަމަށެވެ. އޭގެތެރެއިން އެއް މަސައްކަތަކީ މާލޭގެ ގުރާބުތުނޑި ސަރަހައްދުގައި މިހާރު ހިނގަމުން އަންނަ މާލޭ ވިޔަފާރި ބަނދަރު، ގުޅިފަޅުގައި އަލަށް ޤާއިމުކުރުންކަމަށްވެސް ރައީސް ވިދާޅުވިއެވެ.

"އޭގެ އިތުރުން މާލޭގެ އުތުރު ފަރާތުގަޔާއި، އެކި ސަރަޙައްދުތަކުގައި ހުރި ބޮޑެތި ގުދަންތަކާއި ވާރކްޝޮޕްތައް ފަދަ ތަންތަނާއި، ބައެއް ވިޔަފާރިތައްވެސް ގުޅިފަޅަށް ބަދަލުކުރުން. އެއީ މާލޭގެ ޢާންމު ހަމަޖެހުމާއި އަމާންކަން ޤާއިމުކުރަން އެޅޭނެ ވަރަށް މުހިންމު ފިޔަވަޅަކަށްވެސް ވެގެންދާނެ. އަނެއް މުހިންމު ކަމަކީ، ގުޅިފަޅުގައި ބައިނަލްއަޤްވާމީ ވިޔަފާރި ބަނދަރެއް ތަރައްޤީ ކުރުން. އެކަމާ ބެހޭ ރޭވުންތައް ވެސް މިހާރު ވަނީ ގާތްގަނޑަކަށް ޕްލޭންކޮށް ނިމިފައި" ރައީސް ވިދާޅުވިއެވެ.

ރައީސް ވިދާޅުވީ އެ ދެ ބަނދަރު ތަރައްޤީކުރުމުން، ރާއްޖޭގެ އިމްޕޯޓް އެކްސްޕޯޓަށް ވަރަށް ހަލުވި ކުރިއެރުންތަކެއް ލިބިގެންދާނެކަމަށެވެ. އަދި އެ ހަލުވިކަމާއެކު ވިޔަފާރިއާއި ޢިމާރާތްކުރުމުގެ އިންޑަސްޓްރީއާއި ފަތުރުވެރިކަމުގެ ޞިނާޢަތާއި، މަސްވެރިކަމުގެ ޞިނާޢަތް އިތުރަށް ފުޅާވެގެންދާނެކަންވެސް ރައީސް ފާހަގަކުރެއެވެ.

"މާތް ﷲގެ ވާގިފުޅާއެކު، އަޅުގަނޑުމެން މިތިބީ މުޅި ރާއްޖެއަށް ތަރައްޤީ ގެނެސްދޭން. ރައްޔިތުންގެ ކޮންމެ ކަންބޮޑުވުމަކީ، އަޅުގަނޑާއި އަޅުގަނޑުމެންގެ ޓީމުގެ ވެސް ކަންބޮޑުވުމެއް. ރައްޔިތުންގެ ތަކުލީފަކީ އަޅުގަނޑުމެން ކޮންމެ މީހެއްގެ ތަކުލީފެއް. މިދިޔަ ހަތަރު އަހަރެއްހާ ދުވަހު އަޅުގަނޑުމެން ހިންގި ކޮންމެ މަޝްރޫޢެއް، އަދި ކުރި ކޮންމެ މަސައްކަތެއް ބިނާކޮށްފައި އޮންނާނީ އެ ތަކުލީފުތައް ކުޑަކޮށްދިނުމަށް" ރައީސް ވިދާޅުވިއެވެ.

މިއަދު ފެށި ގުޅިފަޅު ބިންހިއްކުމުގެ މަޝްރޫޢުގެ ދަށުން، އިތުރު 150 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ގުޅީފަޅުގެ ދެވަނަ ފިޔަވަހި ހިއްކުމުގެ މަސައްކަތް ހަވާލުކޮށްފައިވަނީ އެތަނުގެ ފުރަތަމަ ފިޔަވަހިވެސް ހިއްކި ނެދަލޭންޑްސްގެ ބޮސްކާލީސް ކުންފުންޏާއެވެ.

މިމަސައްކަތް އެކުންފުންޏާއި ޙަވާލުކޮށްފައިވަނީ، 120 މިލިއަން ޑޮލަރު ނުވަތަ 2 ބިލިއަން ރުފިޔާއަށެވެ.