މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން، އެމްއެމްޕީއާރުސީ ވިޒިޓް މޯލްޑިވްސް ސްޓޯރީޓެލަރސް ކޮންފަރެންސް 2023ގެ ބައިވެރިންނަށް "ހީލިންގ ދަ އާރތް"ގެ ނަމުގައި ވޯކްޝޮޕެއް ބާއްވާފައެވެ.
ރާއްޖޭގެ ކަނޑުއަޑީގެ ދިރުންތައް ރައްކާތެރިކުރުމުގެ މުހިންމުކަމާ ބެހޭ މި ސެޝަނަކީ މި ކޮންފަރެންސްގައި ބޭއްވި ތިން ވޯކްޝޮޕްގެ ތެރެއިން އެއް ވޯކްޝޮޕެވެ. "ހީލިންގ ދަ އާރތް" ލީޑް ކުރެއްވީ މި ވޯކްޝޮޕް ބޭއްވި ޝެރެޓަން މޯލްޑިވްސް ފުލް މޫން ރިސޯޓް އެންޑް ސްޕާގެ ރެޒިޑެންޓް މެރީން ބަޔޮލޮޖިސްޓް ކޭޓް ޝެރިޑަންއެވެ.
މި ބްރޭކްއައުޓް ސެޝަންގައި މުރަކަ ރައްކާތެރިކުރުމަށް ކުރެވޭ މަސައްކަތްތަކާ ބެހޭ ގޮތުން މުހިންމު މައުލޫމާތުތަކެއް ބައިވެރިންނާ ހިއްސާކުރިއެވެ. އަދި ކަނޑުގެ ދިރުންތަކަށް ދިރިއުޅޭނެ އައު މާހައުލުތައް އުފެއްދުމާއި، ކަނޑުގެ އިކޯސިސްޓަމްތަކުގެ ބެލެންސް ބެލެހެއްޓުމާއި، ރަށް ގިރުމުން ރައްކާތެރިކުރުމުގައި މުރަކަތަކުގެ ދައުރު ވެސް ތަފްސީލުކޮށް މި ސެޝަންގައި ބައިވެރިންނަށް ކިޔައިދިނެވެ.
މި ވޯކްޝޮޕްގައި ކަނޑުއަޑީގެ ދިރުންތަކާއި މުރަކަތަކަށް މިހާރު ކުރިމަތިވެފައިވާ ނުރައްކާތަކުގެ ތެރޭގައި ހިމެނޭ ބްލީޗްވުމާއި، ކަނޑުގެ އެސިޑިފިކޭޝަން، އަދި އޯވާފިޝިން ފަދަ ނުރައްކާތައް ބައިވެރިންނަށް ތަފްސީލުކޮށް ކިޔައިދީފައިވެއެވެ.
މި ސެޝަންގެ ބައިވެރިން ވަނީ މުރަކަ އިންދުމުގެ ސެޝަނެއްގައި ބައިވެރިވެ، ފްރޭމެއްގައި މުރަކަ އިންދާ، ދުޅަހެޔޮ މުރަކަ ކޮލޯނީތައް ހައްދާނެގޮތް ދަސްކޮށްފައެވެ. އަދި ޝެރަޓަންގެ ހައުސް ރީފްގައި ސްނޯކްލްކޮށް، ކަނޑުއަޑީގައި މިހާރު ހުރި މުރަކަ ފްރޭމްތައް ބަލާލުމުގެ ފުރުސަތުވެސް ބައިވެރިންނަށް ވަނީ ލިބިފައެވެ. މި ސެޝަންގެ ތެރެއިން، ރާއްޖޭގެ މި ގުދުރަތީ ޚަޒާނާ ރައްކާތެރިކުރުމަށް ހިއްސާކުރުމަށް ބައިވެރިންނަށް ހިތްވަރުދެވުނެވެ.
މި ސެޝަންގައި ކޮރަލް ޕްރޮޕެގޭޝަން އަދި ކޮރަލް ފްރޭމް ކޮންސްޓްރަކްޝަން ފަދަ ދިވެހިރާއްޖޭގައި ކުރިއަށްގެންދާ ދެމެހެއްޓެނިވި ހަރަކާތްތަކަށް އަލިއަޅުވާލުމުގެ މަގުސަދު ހާސިލުވިއެވެ. އަދި ރާއްޖޭގެ ތިމާވައްޓާއި ފަތުރުވެރިކަމުގެ ސިނާއަތާއި އޮތް ގާތް ގުޅުން އުނގެނުމުގެ ފުރުސަތު ބައިވެރިންނަށް ލިބުނެވެ.
މުރަކަތަކުގެ މުހިންމުކަމާއި، ދިވެހިރާއްޖޭގެ ތިމާވެއްޓަށް ދިމާވާ މައްސަލަތަށް ހައްލުކުރުމަށްޓަކައި ރާއްޖޭގެ ފަތުރުވެރިކަމުގެ ދާއިރާއިން އަޅަމުންދާ ފިޔަވަޅުތައް މި ވޯކްޝޮޕުން ދަސްވިކަމަށާއި މި ހަރަކާތްތަކުގެ ސަބަބުން މުސްތަޤުބަލަށް އުއްމީދު އާވެއްޖެމަކަށް އެއް ބައިވެރިޔަކު ފާހަގަކުރިއެވެ.
ރާއްޖޭގެ އިޤްތިޞާދުގައި ފަތުރުވެރިކަން އަދާކުރާ މުހިންމު ދައުރާއި، ދުޅަހެޔޮ ކަނޑުގެ ދިރުންތަކާއި ތިމާވެއްޓަށް ރާއްޖޭގެ ފަތުރުވެރިކަން ބަރޯސާވާ މިންވަރު ވަރަށް ކައިރިން ބަލައިލާ، ދިރާސާކުރުމުގެ ފުރުސަތު ވަރަށް ފުރިހަމައަށް، ’ހީލިންގ ދަ އާރތް‘ ބްރޭކްއައުޓް ސެޝަންގައި ވަނީ ބައިވެރިންނަށް ލިބިފައެވެ. އަދި ރާއްޖޭގެ ކަނޑުގެ ތިމާވެށީގެ ރީތިކަމާއި ނާޒުކުކަން ފުންކޮށް ވަޒަން ކުރުމުގެ ފުރުސަތުވެސް ބައިވެރިންނަށް ލިބިގެންދިޔައެވެ. ކަނޑުގެ ދިރުންތަކާއި ތިމާވެށީގެ ހިމާޔަތުގައި ފިޔަވަޅު އެޅުމަށް ބައިވެރިންނަށް އިންސްޕަޔަރކުރުން އެއީ މި ސެޝަންގެ އެއް އަމާޒެވެ.