މިއަހަރުގެ މޯލްޑިވްސް ލިވިން އެކްސްޕޯ ފަށައިފި

މިއަހަރުގެ މޯލްޑިވްސް ލިވިން އެކްސްޕޯ ފަށައިފިއެވެ. މިއެކްސްޕޯ ފަށާފައިވަނީ އިއްޔެ ހަވީރުއެވެ. މިއެކްސްޕޯ ފައްޓަވައިދެއްވީ އެޗްޑީސީގެ މެނޭޖިންގ ޑިރެކްޓަރ އަޙްމަދު އާތިފްއެވެ.

ހައިރައިޒުން އިންތިޒާމްކޮށްގެން ބާއްވާ މިއެކްސްޕޯ ކުރިއަށްދާނީ ހުޅުމާލޭގެ ސެންޓްރަލް ޕާކުގައެވެ. އެކްސްޕޯ ކުރިއަށްދާނީ މިމަހުގެ 10 އަކުން 12 އަށް ކޮންމެ ދުވަހެއްގެ ހަވީރު 15:00 އިން 18:00 އަށް އަދި ރޭގަނޑު 20:00 އިން 23:00 އަށެވެ. މި އަހަރުގެ އެކްސްޕޯގައިވެސް ގިނަ މައުލޫމާތުތަކެއް ލިބެން ހުންނާނެއެވެ.

މި އަހަރުގެ މޯލްޑިވްސް ލިވިން އެކްސްޕޯގައި ވަނީ 37 ސްޓޯލެއް ބަހައްޓާފައެވެ. މި އެކްސްޕޯގައި ދާނީ ގެއެއް ހޯދަން ބޭނުންވާ ފަރާތްތަކަށް ހުރިހާ މައުލޫމާތުތަކެއް ލިބޭނެއެވެ. އެގޮތުން ރިއަލް އެސްޓޭޓް ހައުސިން ގިނަ ޕްރޮޖެކްޓްތަކެއްގެ މައުލޫމާތު އެކްސްޕޯގައި ލިބެން ހުންނާނެއެވެ. މި ފެއާގައި ރާއްޖެ އާއި ރާއްޖޭން ބޭރުން ރިއަލް އެސްޓޭޓް ގިނަ ވިޔަފާރިތަކެއް މިއަހަރުވެސް ބައިވެރި ވެއެވެ.

ލިވިން އެކްސްޕޯގައި ޢާންމު ފަރާތްތަކަށާއި އިންވެސްޓަރުންނަށް ރިއަލްއެސްޓޭޓް ދާއިރާގެ ތަފާތު އެކި ޕްރޮޖެކްޓްތަކާއި، އިންޓީރިއާ، އެކްސްޓީރިއާގެ އިތުރުން ފައިސާގެ މުއާމަލާތްތައް ގެންދާނެ ގޮތުގެ މައުލޫމާތު އެއްތަނަކުން ލިބިގެންދާނެ ކަމަށް ހައިރައިޒްއިން ބުނެއެވެ.