2016 ވަނަ އަހަރު އިރާޤުގެ ވެރިރަށް ބަޣްދާދުގެ ފިހާރަބަރިއެއް ކައިރީގައި ބޮމެއް ގޮއްވައިލައިގެން ދިން ނުރައްކާތެރި ހަމަލާގެ ފަހަތުގައިވާ ތިން މީހަކަށް މަރުގެ އަދަބުދީފިއެވެ. ކާރުބޮމެއް ގޮއްވައިލައިގެން ދިން އެ ހަމަލާގައި 300 އެއްހާ މީހުން މަރުވިއެވެ. އަދި، އެތަކެއް ސަތޭކަ ބަޔަކު ޒަޚަމުވިއެވެ.
އެ ހަމަލައަކީ، 2003 ވަނަ އަހަރު އެމެރިކާގެ ސިފައިން އިރާޤަށް އަރައި އެ ޤައުމުގެ އިންތިޚާބީ ސަރުކާރު ވައްޓައިލަން ހަނގުރާމަ ފެށި ފަހުން އެ ޤައުމުގައި ދީފައިވާ އެންމެ ނުރައްކާތެރި އެއް ޓެރެރިސްޓު ހަމަލައެވެ. ޓެރެރިސްޓު ޖަމާޢަތެއް ކަމުގައިވާ އިސްލާމިކް ސްޓޭޓް (އައި.އެސް)އިން ވަނީ އެ ހަމަލާގެ ޒިންމާ އުފުލާފައެވެ.
އެ ހަމަލާ ރާވައި ހިންގުމުގައި ހަރަކާތްތެރިވި ތިން މީހަކަށް މަރުގެ އަދަބުދީފައިވާ ކަން ބޮޑުވަޒީރު މުޙައްމަދު ޝިޔާ އަލް-ސުދާނީގެ އޮފީހުން ހާމަކޮށްފައިވީ ނަމަވެސް، އެއީ ކޮން ބަޔެއް ކަން ސާފުކޮށްދީފައެއް ނުވެއެވެ. އެ މީހުންގެ މަރުގެ އަދަބު ތަންފީޒުކޮށްފައި ވަނީ ދަންޖައްސައިގެންނެވެ. ނަމަވެސް، މަރުގެ އަދަބު ދީފައިވާ މީހުންގެ ތެރޭގައި އައި.އެސްގެ އިސް މީހެއް ކަމުގައިވާ ޣަޒަވާން އަލް-ޒުބާޢީ ހިމެނޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އޭނާ ހައްޔަރުކޮށްފައި ވަނީ 2021 ވަނަ އަހަރުއެވެ.
2016 ވަނަ އަހަރުގެ ހަމަލާގައި ޒިންމާވާ މީހުންނަށް މަރުގެ އަދަބު ދީފައިވާ ކަން، އެ ހަމަލާގައި މަރުވި މީހުންގެ ޢާއިލާތަކަށް ސުދާނީގެ ސަރުކާރުން ވަނީ އަންގާފައެވެ. 2016 ވަނަ އަހަރުގެ ޖުލައި މަހުގެ 3 ވަނަ ދުވަހު، ކާރޫބާރޫ ބޮޑު ފިހާރަބަރިއެއް ކުރިމަތީގައި ކާރުބޮން ގޮއްވައިލާފައި ވަނީ ގިނަ ޢަދަދެއްގެ ޢާންމުން ޖަމާވެފައިވާ ވަގުތެއްގައެވެ. އެ ފިހާރަބަރި ހުންނަނީ ބަޣްދާދުގައި ޝިޔަޢީން ދިރިއުޅޭ ސަރަޙައްދެއް ކަމުގައިވާ ކަރާދާގައެވެ. އެއީ ބަރަކާތްތެރި ރަމަޟާން މަހުގެ ދުވަހެއްގެ އިރުއޮއްސުނު ވަގުތުގައި ދީފައިވާ ހަމަލައެކެވެ.
އެ ހާދިސާގައި ގިނަ ޢަދަދެއްގެ ބަޔަކު މަރުވެފައި ވަނީ ބޮމުގެ ހަމަލައާ ގުޅިގެން ފިހާރަބަރީގައި ހިނގި ނުރައްކާތެރި އަލިފާނުގެ ހާދިސާގައެވެ. އެ ހަމަލައާ ގުޅިގެން އެ ޤައުމުގެ ދާޚިލީ ވަޒީރު މުޙައްމަދު ޣަބާން ވަނީ އިސްތިޢުދާ ދެއްވާފައެވެ. އެ ހަމަލާގައި އިސްކޮށް ހަރަކާތްތެރިވެފައި ވަނީ ޒުބާޢީ ކަމަށް އިރާޤުގެ ކުރީގެ ބޮޑުވަޒީރު މުޞްޠަފާ އަލް-ކާޟިމީ ވިދާޅުވެފައިވެއެވެ.
2014 ވަނަ އަހަރުން ފެށިގެން އައި.އެސް ޖަމާޢަތުން ވަނީ އިރާޤުގެ އިރުމައްޗާއި ސޫރިޔާގެ ހުޅަނގުގެ ބޮޑު ސަރަޙައްދަކަށް އަތްގަދަކޮށްފައެވެ. އެ މީހުންގެ އަތްދަށަށް 88,000 އަކަކިލޯމީޓަރުގެ ސަރަޙައްދެއް ގެންގޮސްފައިވާއިރު، އެމެރިކާއިން އިސްވެ އޮވެ ފެށި ހަނގުރާމައިގައި އައި.އެސް ޖަމާޢަތް ބަލިކޮށްފައި ވަނީ 2017 ވަނަ އަހަރުއެވެ. ނަމަވެސް، އެ ޖަމާޢަތުގެ ހަނގުރާމަވެރިން އަދިވެސް އިރާޤާއި ސޫރިޔާގެ ބައެއް ސަރަޙައްދުތަކުގައި ހަރަކާތްތެރިވަމުންދާ ކަން ފާހަގަކުރެވެއެވެ.