ކެމްޕެއިން ރެލީތަކާއެކު މިއަދު މަގުތައް ބާރުބޮޑުވާނެތީ ސަމާލުވާން ފުލުހުން އެދިއްޖެ

މިއަދު ހަވީރު ސިޔާސީ ޕާޓީތަކުން މާލޭގެ މަގުތަކުގައި ކެމްޕެއިން ރެލީތައް ކުރިއަށްގެންދިއުމަށް ހަމަޖެހިފައިވާތީ، އާއްމުން މަގުތައް ބޭނުންކުރުމުގައި ސަމާލުވުމަށް ފުލުހުން އެދިވަޑައިގެންފިއެވެ.

ފުލުހުން ވިދާޅުވީ ކެމްޕެއިން ހަރަކާތްތަކުގައި ވަރަށް ގިނަ ބަޔަކާއެކު، ބޮޑެތި ހަރަކާތްތަކެއް މިއަދު ހަވީރު މާލެ ތެރޭގައި ކުރިއަށްދާނެކަމަށް ބެލެވޭކަމަށެވެ.

އެގޮތުން ޚާއްސަކޮށް މާލޭގެ ބޮޑެތި މަގުތަކުގައި އުޅަނދުތައް ދުއްވުމުގައި ޓްރެފިކް ތޮއްޖެހޭނެތީ، ވަކިވަކި އާއްމުންގެ އުޅަނދުތަކުގެ ބަދަލުގައި، އެވަގުތުގައި ޕަބްލިކް ޓްރާންސްޕޯޓް ނިޒާމުގެ ބޭނުން ހިފުމަކީ މަގުތަކުގެ ތޮއްޖެހުން ކުޑަކުރެވޭނެ ގޮތެއްކަމަށް ފުލުހުން ވިދާޅުވިއެވެ. މީގެސަބަބުން ޕާކުކުރުމުގައި ދިމާވާ ދަތިތައްވެސް ކުރިމަތިނުވާނެކަމަށް ވިދާޅުވިއެވެ.

Stay Safe during Presidential Election Rallies!

With the 2023 Presidential Election approaching, we expect large rallies today. Your safety is our priority. Follow these tips for a secure experience in crowded areas.#OperationBlueWave pic.twitter.com/5CuPbMgv86

— Maldives Police (@PoliceMv) September 8, 2023

އަދި ކެމްޕެއިން ހަރަކާތްތައް ހަވީރު ކުރިއަށްދާ ވަގުތުތަކުގައި މަގުމަތީގައި ހަރަކާތެރިވާ ފުލުހުން ދޭ އިރުޝާދަށް ފުރިހަމައަށް ބޯލެނބުމަށް ފުލުހުންގެ ޚިދުމަތުން ވަނީ އެދިވަޑައިގެންފައެވެ. އެގޮތުން މަގުތަކުގެ ޓްރެފިކަށް ފުލުހުން ގެންނަ ވަގުތީ ބަދަލުތަކާއި، އަދި ހިނގާ މީހުންނަށް ހެދިފައިވާ ގަވާއިދާ އެއްގޮތަށް މަގުތައް ބޭނުންކުރުމަށް ވަނީ އެދިވަޑައިގެންފައެވެ.

މީގެއިތުރުން، ފިތި ބާރުވާވަރަށް މީހުން ޖަމާވެ ހަރަކާތްތައް ނުހިންގުމަށާއި، ސިއްޙީ ރައްކާތެރިކަމަށްވެސް ސަމާލުކަންދިނުމަށް ފުލުހުން ވަނީ އިލްތިމާސްކުރައްވާފައެވެ.

ފުލުހުންވަނީ އެއްވެސް ކަހަލަ ހަމަނުޖެހުމެއް ނުވަތަ ޝައްކު ކުރެވޭކަމެއް އުޅޭނަމަ، އެފަދަ ކަންކަން ވީހާވެސް އަވަހަށް ފުލުހުންނަށް ރިޕޯޓްކުރުމަށްވެސް އެދިވަޑައިގެންފައެވެ.

ރިޔާސީ އިންތިޚާބާ ގުޅިގެން އިންތިޚާބުގައި ވާދަކުރައްވާ ކެނޑިޑޭޓުންގެ ފަރާތުންނާއި ޕާޓީތަކުން މާލެއާއި ހުޅުމާލޭގެ އެކި ސަރަހައްދުތަކާއި މަގުތަކުގައި ހިނގާލުންތައް ބޭއްވުމަށް ވަނީ ނިންމާފައެވެ. ކެމްޕެއިން ހަރަކާތްތައް ހިންގޭނީ މިއަދު އިރުއޮއްސި 06:00އާއި ހަމައަށެވެ.

ރިޔާސީ އިންތިޚާބާއި ގުޅިގެން ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ވަނީ "އޮޕަރޭޝަން ބްލޫ ވޭވް"ގެ ނަމުގައި ޚާއްސަ އޮޕަރޭޝަނެއް މުޅި ރާއްޖޭގައި ފަށާފައެވެ.
މިއޮޕަރޭޝަން ފެށުމާއެކު ފުލުހުންގެ ޚިދުމަތުގެ އޮޕަރޭޝަނަލް ސްޓޭޓަސްވަނީ "ލެވެލް 3'' އަށް ބަދަލުކޮށްފައެވެ.