ރާއްޖޭގެ ތަރައްޤީގެ އިތުރު މަޝްރޫޢުތަކަށް ސަޢޫދީ ފަންޑުން އެހީދޭން ޝައުޤުވެރިވާކަމަށް ސަޢޫދީ ސަރުކާރުން ހާމަކޮށްފިއެވެ.
ދިވެހި ރައްޔިތުންގެ މަންފާއަށް ސަރުކާރުން މި ވަގުތު ހިންގަވާ އެންމެ ބޮޑެތި މަޝްރޫޢުތަކުގެ ތެރެއިން 2 މަޝްރޫޢަކަށް މިހާރުވެސް ސަޢޫދީ ފަންޑުން ގެންދަނީ އެހީދެމުންނެވެ. އެއީ، ހުޅުމާލެ ޔޫތު ސިޓީ ތަރައްޤީކުރުމުގެ ބޮޑު މަޝްރޫޢާއި އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީ ކުރެއްވުމުގެ މަޝްރޫޢެވެ.
ސަޢޫދީ ފަންޑުން ރާއްޖޭގެ ތަރައްޤީއަށް އިތުރު އެހީދޭނެކަމުގެ ފެހި ސިގްނަލް ދީފައިވަނީ ރާއްޖޭގެ މިނިސްޓަރ އޮފް ފިނޭންސް އެންޑް ޓްރެޜަރީ ޢަބްދުﷲ ޖިހާދު، ސަޢޫދީ އަރަބިޔާގެ މިނިސްޓަރ އޮފް ފިނޭންސާއި ސަޢޫދީ ފަންޑުގެ އިސް މަސްއޫލުވެރިންނާ ބައްދަލުކުރައްވައި ކުރެއްވި މަޝްވަރާތަކުގައެވެ. ސަޢޫދީ ޢަރަބިއްޔާގެ މިނިސްޓަރ އޮފް ފިނޭންސް އިބްރާހީމް ބިން ޢަބްދުލްޢަޒީޒް އަލް-އައްސާފް އާއެކު ބޭއްވެވި ބައްދަލުވުމުގައި އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް ސަޢޫދީ ސަރުކާރުން އެހީތެރިވެދޭނެކަމުގެ ޔަޤީންކަން ވަނީ ދެއްވާފައެވެ. އަދި މި ބައްދަލުވުމުގައި، ރައީސުލްޖުމްހޫރިއްޔާ އަލަށް އުފެއްދެވި އިސްލާމިކް ފައިނޭންސް ސެންޓަރު ތަރައްޤީކުރެއްވުމަށާއި އެ ސެންޓަރުގެ ޢަމަލީ މަސައްކަތްތައް ފެއްޓެވުމަށް ބޭނުންވާ ފަންނީ އެހީތެރިކަމަށް ސަޢޫދީޢަރަބިއްޔާގެ މިނިސްޓަރ އޮފް ފިނޭންސް އިބްރާހީމް ބިން ޢަބްދުލްޢަޒީޒް އަލް-އައްސާފްގެ އަރިހުގައި، މިނިސްޓަރ އޮފް ފިނޭންސް އެންޑް ޓްރެޜަރީ ޢަބްދުﷲ ޖިހާދު އެދިވަޑައިގެންނެވިއެވެ.
ސަޢޫދީ ފަންޑުގެ އިސް މަސްއޫލުވެރިންނާއެކު ބޭއްވެވި މަޝްވަރާތަކުގައި ސަޢޫދީ ފަންޑުން އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރެއްވުމުގެ މަޝްރޫޢަށް ދިނުމަށް ނިންމާފައިވާ ސަތޭކަ މިލިއަން ޑޮލަރުގެ ލޯނު އެގްރީމަންޓްގައި ސޮއިކުރުން އަވަސްކުރައްވާނެކަމަށް ވަނީ ވިދާޅުވެފައެވެ. އަދި މި މަޝްރޫޢަށް މިހާރު ފައިސާ ދިނުމަށް ނިންމި، ޢަރަބި ޤައުމުތަކުގެ "ޖޮއިންޓް ކޯޑިނޭޝަން ގްރޫޕް" ގެ ބައްދަލުވުމެއް މިއަހަރުގެ މެއި މަހުގެތެރޭގައި ރާއްޖޭގައި ބޭއްވުމަށްވެސް ވަނީ އެއްބަސްވެފައެވެ. މި ގްރޫޕްގެ ބައްދަލުވުމުގެ މައިގަނޑު ބޭނުމަކަށްވާނީ މަޝްރޫޢުގެ "ޓަރމިނަލް ބިލްޑިންގ" ގެ ޓެކްނިކަލް އަދި ފައިނޭންސިންގ ޕްލޭން އާބެހޭގޮތުން ކޯޑިނޭޝަން ގްރޫޕް މެންބަރުންގެ މެދުގައި އެއްބަސްވުމަކަށް އައުމެވެ.
ރާއްޖެއަށް ސަޢޫދީ ސަރުކާރުން ގިނަ ދާއިރާތަކަކުން ބޮޑެތި އެހީތަކެއް ދީ އަދި އިތުރު ދާއިރާތަކުން އެހީދިނުމުގެ ޝައުޤު ފާޅުކުރަމުން މި ގެންދަނީ، ރާއްޖެއާއި ސަޢުދީ ޢަރަބިއްޔާއާ ދެޤައުމުގެ ގުޅުން އިތުރަށް ބަދަހިވަމުންދާ ދުވަސްވަރެއްގައެވެ. ސަޢޫދީގެ އެހީ އެންމެ ބޮޑަށް ލިބެމުން އަންނަނީ، އިސްލާމީ ވަޙުދަތު ކުރުއެރުވުމުގެ ދާއިރާއާއި ތަރައްޤީގެ މައިގަނޑު މަސައްކަތްތަކުގެ ދާއިރާއިންނެވެ.