އިރާޤުގެ އުތުރުގައިވާ ސަރަޙައްދުތަކުގައިވާ ކުރްދިސްތާން ވޯކަރސް ޕާޓީ (ޕީ.ކޭ.ކޭ)ގެ ހަނގުރާމަވެރިންގެ އަމާޒުތަކަށް ތުރުކީވިލާތުގެ އަސްކަރިއްޔާއިން ވަރުގަދަ ވައިގެ ހަމަލަތަކެއް ދީފިއެވެ. ޓެރެރިސްޓު ޖަމާޢަތެއް ކަމުގައިވާ ޕީ.ކޭ.ކޭގެ އަމާޒުތަކަށް ތުރުކީވިލާތުގެ އަސްކަރިއްޔާއިން ވައިގެ ހަމަލަތައް ދީފައި މި ވަނީ، ތުރުކީގެ ވެރިރަށް އަންކަރާގައި ދާދި ފަހުން ދިން ބޮމުގެ ހަމަލައެއްގެ ރައްދުގައެވެ. އަންކަރާގައި ދީފައިވާ ބޮމުގެ ހަމަލާގެ ޒިންމާ ޕީ.ކޭ.ކޭން ވަނީ އުފުލާފައެވެ.
ތުރުކީވިލާތުގެ ދާޚިލީ ވުޒާރާއިން ބުނީ، އިރާޤުގެ އުތުރުގެ ސަރަޙައްދުތަކުގައި ޕީ.ކޭ.ކޭގެ ހަނގުރާމަވެރިން ހަރަކާތްތެރިވާ 20 އަމާޒަކަށް ވައިގެ ހަމަލަތައް ދީފައިވާނެ ކަމުގައެވެ. ތުރުކީވިލާތުގެ ވައިގެ ސިފައިންގެ ހަމަލަތައް އަމާޒުކޮށްފައިވާ ރަށްތަކުގެ ތެރޭގައި ޖާރާއާއި، ހާކުރްކާއި، މިތީނާގެ އިތުރުން ޤަންދީލް ހިމެނެއެވެ. ހަމަލަތައް އަމާޒުކޮށްފައިވާ ތަންތަނުގެ ތެރޭގައި ޕީ.ކޭ.ކޭގެ ހަނގުރާމަވެރިން ބޭނުންކުރާ އަސްކަރީ މަރުކަޒުތަކާއި، ހަތިޔާރު ގުދަންތައް ހިމެނޭ ކަމުގައި އެ ވުޒާރާއިން ބުންޏެވެ.
ތުރުކީވިލާތުން އިރާޤުގެ ސަރަޙައްދަށް ވަދެ ދީފައިވާ ހަމަލަތަކާ ގުޅިގެން އެ ޤައުމުގެ ރައީސް ޢަބްދުއްލަޠީފް ރާޝިދު ވަނީ ކަންބޮޑުވުން ފާޅު ކުރައްވާފައެވެ. އިރާޤުގެ ސިޔާދަތީ ބާރު ހިނގާ ސަރަޙައްދަށް ތުރުކީވިލާތުގެ އަސްކަރީ މަތިންދާބޯޓުތަކުން ވަދެ، ހަމަލަ ދިނުމަކީ ބަލައިގަނެވޭނެ ކަމެއް ނޫން ކަމުގައި އޭނާ ވިދާޅުވިއެވެ. އަދި، އިރާޤުގެ އުތުރުގެ ސަރަޙައްދުތަކުގައި ތުރުކީވިލާތުން ޤާއިމު ކޮށްފައިވާ އަސްކަރީ މަރުކަޒުތަކުން އެ މީހުން ބޭލުމާ ގުޅޭ ގޮތުން މަޝްވަރާ ކުރަމުންދާ ކަމުގައި ވެސް އޭނާ ވިދާޅުވިއެވެ.
އަންކަރާގައި ބޮމެއް ގޮއްވައިލާފައި ވަނީ ތުރުކީވިލާތުގެ ދާޚިލީ ވުޒާރާ ހުންނަ ޢިމާރާތާއި، އެ ޤައުމުގެ ޤާނޫނު ހަދާ މަޖިލީހުގެ ޢިމާރާތް ކައިރީގައެވެ. މި ހަމަލާގައި ފުލުހުންގެ ދެ މީހުން ޒަޚަމުވިއެވެ. ހަމަލަދިނުމުގައި ދެ މީހަކު ބައިވެރިވެފައިވާއިރު، އޭގެ ތެރެއިން އެކަކު މަރުވީ އަމިއްލައަށް ފުރާނަ ނަގައިލައިގެންނެވެ. ދެވަނަ މީހާ މަރުވީ ފުލުހުންގެ ހަމަލަތަކުގައެވެ.
ބޮމުގެ ހަމަލަ ދީފައި ވަނީ ޗުއްޓީއަށް ފަހު ތުރުކީވިލާތުގެ ޤާނޫނު ހަދާ މަޖިލީހުގެ ޖަލްސާތައް ފެށުމަށް ތައްޔާރުވަމުން ދިޔަ ވަގުތެއްގައެވެ. ނަމަވެސް، ކުރިން އިންތިޒާމުކޮށްފައިވާ ގޮތަށް ޤާނޫނު ހަދާ މަޖިލީހުގެ ޖަލްސާއެއް ބާއްވާފައިވެއެވެ. އަދި، އެ ޖަލްސާގައި ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ތަޤުރީރު ކުރައްވާފައިވެއެވެ.
2015 އާއި 2016 ވަނަ އަހަރުގެ ތެރޭގައި އަންކަރާގައި މި ފަދަ ގިނަ ޢަދަދެއްގެ ހަމަލަތަކެއް ދީފައިވާ ކަން ފާހަގަކޮށްލަން ޖެހެއެވެ. އެ ހަމަލަތަކުގެ ފަހަތުގައި އޮތީ ޕީ.ކޭ.ކޭގެ އިތުރުން ޓެރެރިސްޓު ޖަމާޢަތެއް ކަމުގައިވާ އިސްލާމިކް ސްޓޭޓް (އައި.އެސް)އެވެ. ނަމަވެސް، މިއީ 2016 ވަނަ އަހަރަށް ފަހު އަންކަރާގައި ދީފައިވާ މި ފަދަ ފުރަތަމަ ހަމަލައެވެ.
ޕީ.ކޭ.ކޭއަކީ 1984 ވަނަ އަހަރު ހަރަކާތްތެރިވާން ފަށާފައިވާ ޖަމާޢަތެކެވެ. އެއީ، "ޓެރެރިސްޓު" ޖަމާޢަތެއްގެ ގޮތުގައި ތުރުކީވިލާތުގެ އިތުރުން ވިލާތުގެ އިއްތިހާދު (އީ.ޔޫ) އަދި އެމެރިކާއިން ވެސް ވަނީ ކަނޑައަޅާފައެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ އެ ޤައުމުގެ އިރުދެކުނުގައިވާ ކުރުދިސްތާންގެ ނަން ދީފައިވާ ސަރަޙައްދުގައި އަމިއްލަ ދަޢުލަތެއް އުފެއްދުމުގެ މަޤުޞަދުގައެވެ.
2015 އަދި 2016 ވަނަ އަހަރު އަންކަރާގައި ގިނަ ޢަދަދެއްގެ ޓެރެރިސްޓު ހަމަލަ ދީފައިވާއިރު، 2016 ވަނަ އަހަރުގެ މާރިޗު މަހުގެ 13 ވަނަ ދުވަހު ކާރު ބޮމެއް ގޮއްވައިލައިގެން ދިން ހަމަލައެއްގައި 37 މީހުން ވަނީ މަރައިލާފައެވެ. އަދި، އެ އަހަރުގެ ފެބުރުވަރީ މަހުގެ 17 ވަނަ ދުވަހު ދިން ކާރުބޮމުގެ އެހެން ހަމަލައެއްގައި 28 މީހުން މަރުވިއެވެ.
2015 ވަނަ އަހަރުގެ އޮކްޓޫބަރު މަހުގެ 10 ވަނަ ދުވަހު އަންކަރާގެ ދެ ސަރަޙައްދަކަށް އަމާޒުކޮށް ބޮމުގެ ހަމަލަތަކެއް ދީފައިވެއެވެ. އެ ހަމަލަތަކުގައި 100 އަށްވުރެ ގިނަ މީހުން މަރުވިއެވެ. އެ ހަމަލާގެ ފަހަތުގައި އޮތީ އައި.އެސް ޖަމާޢަތް ކަމަށް ބެލެވެއެވެ.