އިންޑިޔާގެ އިރުއުތުރުގައިވާ ސިއްކިމް ސްޓޭޓަށް ބޯކޮށް ވާރޭވެހި ފެންބޮޑުވުމާ ގުޅިގެން 14 މީހުން މަރުވެ، 100 އަށްވުރެ ގިނަ މީހުން ގެއްލިއްޖެއެވެ. މި ހާދިސާ ހިނގާފައި ވަނީ ސިއްކިމްގައި "ލަހޯނެކް ލޭކް"ގެ ނަންދީފައިވާ ފެންގަނޑު އޮންނަ ސަރަޙައްދުގައެވެ. އެއީ، ހިމަލަޔާ ފަރުބަދައިގައިވާ ގަނޑުފެން ނުވަތަ "ގްލޭސިޔަރ"ގެ ސަބަބުން އުފެދިފައި އޮންނަ ފެންގަނޑެކެވެ.
ލަހޯނެކް ލޭކް އޮންނަ ސަރަޙައްދަށް ފާއިތުވި ފަސް ދުވަހުގެ ތެރޭގައި 101 މިލިމީޓަރުގެ ވާރޭ ވެހިފައިވާ ކަމުގައި އިންޑިޔާގެ މޫސުމާ ބެހޭ އިދާރާއިން ބުނެއެވެ. އެއީ، ޢާންމުކޮށް އެ ސަރަޙައްދަށް ވާރޭވެހޭ މިންވަރަށްވުރެ ދެ ގުނަ އިތުރު ޢަދަދެކެވެ. ސިއްކިމްއަކީ 650,000 މީހުންގެ އާބާދީއެއް ދިރިއުޅޭ ސްޓޭޓެކެވެ.
ލަހޯނެކް ފެންގަނޑުގެ އައްސޭރިފަށަކީ ގިނަ ޢަދަދެއްގެ ބަޔަކު ވަޒަންވެރިވެގެން އުޅޭ ސަރަޙައްދެކެވެ. ބޯކޮށް ވާރޭވެހި، ލޭކްގެ ފެންގަނޑު ބަންޑުންވުމާ ގުޅިގެން އެ ސަރަޙައްދުތަކުގައި ދިރިއުޅޭ 22,000 އަށްވުރެ ގިނަ މީހުން އެ ކަމުގެ އަސަރު ކޮށްފައިވާ ކަމުގައި ސިއްކިމްގެ އޮފިޝަލުން ވިދާޅުވެއެވެ. ކުރިއަށް އޮތް ދުވަސްތަކުގައި ވެސް ސިއްކިމްގެ އިތުރުން އިންޑިޔާގެ އިރުއުތުރުގައިވާ ސްޓޭޓްތަކަށް ބޯކޮށް ވާރޭވެހޭނެ ކަމަށް އިންޑިޔާގެ މޫސުމާ ބެހޭ އިދާރާއިން ލަފާ ކުރެއެވެ.
ސިއްކިމްގައި ފެންބޮޑުވާން މެދުވެރިވި އަނެއް ސަބަބަކީ، "ތީސްތާ 5"ގެ ނަންދީފައިވާ ޑޭމެއްގެ ފެންގަނޑު ދޫކޮށްލުން ކަމުގައި އެ ސްޓޭޓްގެ އޮފިޝަލުން ވިދާޅުވިއެވެ. ފެންގަނޑުގެ ބާރާ އެކު އެ ޑޭމްގެ ހަތަރު ގޭޓު ދަމައިގަނެފައިވާ ކަމުގައި ވެސް އޮފިޝަލުން ވިދާޅުވިއެވެ.
ސިއްކިމްގެ ކާރިސާތަކާ ބެހޭ އިދާރާއިން ބުނީ ފެންބޮޑުވުމާ ގުޅިގެން 14 މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައެވެ. އަދި، 102 މީހުން ގެއްލިފައިވާ ކަމަށާއި، އޭގެ ތެރޭގައި އަސްކަރިއްޔާގެ 22 ސިފައިން ހިމެނޭ ކަމުގައެވެ. ގެއްލިފައިވާ މީހުން ހޯދަން ކުރަމުންދާ މަސައްކަތުގައި އިންޑިޔާގެ އަސްކަރިއްޔާއިން ދަނީ އެހީތެރިކަން ފޯރުކޮށްދެމުންނެވެ.
ފެންބޮޑުވުމާ ގުޅިގެން ލަހޯނެކް ފެންގަނޑުގެ އައްސޭރިފަށުގައި މީހުން ދިރިއުޅޭ ސަރަޙައްދުތަކަށް ބޮޑެތި ގެއްލުންތަކެއް ލިބުނެވެ. މި ގޮތުން ގިނަ ޢަދަދެއްގެ ގެދޮރާއި ޢުމްރާނީ ވަސީލަތްތަކަށް ވަނީ ގެއްލުން ލިބިފައެވެ. ފެންބޮޑުވުމާ ގުޅިގެން އެ ސަރަޙައްދުގައި ބިނާކޮށްފައިވާ 11 ބުރިޖަކަށް ގެއްލުން ލިބިފައިވާ ކަމުގައި ވެސް ސިއްކިމްގެ ކާރިސާތަކާ ބެހޭ އިދާރާއިން ބުނެއެވެ.
މިއީ ފާއިތުވި 50 ވަރަކަށް އަހަރުގެ ތެރޭގައި ސިއްކިމަށް ކުރިމަތިވި މި ފަދަ އެންމެ ނުރައްކާތެރި ކާރިސާއެވެ. ސިއްކިމްގައި ފެންބޮޑުވުމުގެ މި ފަދަ ކާރިސާއެއް އެންމެ ފަހުން ހިނގާފައި ވަނީ 1968 ވަނަ އަހަރުއެވެ. އެ ހާދިސާގައި 1,000 އެއްހާ މީހުން މަރުވިއެވެ.
އިންޑިޔާގެ އިރުއުތުރުގައިވާ ސަރަޙައްދުތަކަށް ކުރަމުންދާ ވިއްސާރައިގެ އަސަރު، އަވައްޓެރި ބަންގްލަދޭޝަށް ވެސް ދަނީ ފޯރަމުންނެވެ. އަދި، ތީސްތާ ކޯރަކީ ބަންގްލަދޭޝް ތެރެއިން ވެސް ދެމޭ ކޯރަކަށްވާއިރު، ބޯކޮށް ވާރޭވެހުމާ އެކު ކޯރުގެ ފެންގަނޑު ބޮޑުވަމުންދާ ކަމުގެ އިންޒާރު ބަންގްލަދޭޝްގެ އިދާރާތަކުން ވެސް ވަނީ ކޮށްފައެވެ. އަދި، އެ ޤައުމުގެ އުތުރުގައިވާ ފަސް ޑިސްޓްރިކްޓެއްގައި ރައްކާތެރި ކަމުގައި ފިޔަވަޅުތައް އެޅުމަށް އެ ޤައުމުގެ ކަމާ ގުޅޭ އިދާރާތަކުން ވަނީ އިރުޝާދު ދީފައެވެ.