ފަލަސްޠީނުގެ ހުޅަނގު އައްސޭރީގައި ވަޒަންވެރިގެން އުޅޭ ޔަހޫދީންގެ ބަޔަކު ޙަވާރާގައި ދިރިއުޅޭ ފަލަސްޠީނުގެ މުސްލިމުންނަށް ހަމަލަދީ ޒުވާނަކު ޝަހީދުކޮށްލައިފިއެވެ. 19 އަހަރުގެ ލަބީބު ދިމަޔިދީ ޝަހީދުކޮށްލާފައި ވަނީ އޭނާގެ މެޔަށް ބަޑި ޖަހައިގެންނެވެ. ވަޒަން އަރާފައި ވަނީ އޭނާގެ ހިތަށް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުންޏެވެ.
ފަލަސްޠީނުގެ ބިންތަކަށް ވެރިވެގަނެ، އެ ތަނުގައި ވަޒަންވެރިވެގެން އުޅޭ ޔަހޫދީންގެ ޢާންމުން ފަލަސްޠީނުގެ ކުށެއް ނެތް ޢާންމު ރައްޔިތުންނާ އަމާޒުކޮށް ދެމުންދާ ހަމަލަތައް ފަހަކަށް އައިސް ވަނީ އިތުރު ކޮށްފައެވެ. އެ މީހުންގެ މި ނުބައިނުލަފާ އަމަލުތައް ހިންގަމުން ދަނީ ޔަހޫދީ އަސްކަރިއްޔާގެ ސިފައިންގެ ހިމާޔަތާ އެކުގައެވެ. ފަލަސްޠީނުގެ ބިންތަކުގައި ޔަހޫދީންގެ ޢާންމުންނާއި ސިފައިން ގުޅިގެން ހިންގަމުންދާ މި ފަދަ ލާއިންސާނީ ޖަރީމާތައް ހުއްޓުވަން މުޅި ދުނިޔެ ވަނީ ނުކުޅެދިފައެވެ.
ދިމަޔިދީގެ ޢާއިލާއިން ބުނީ، ޔަހޫދީންގެ ބައިގަނޑެއް އޭނާ ދިރިއުޅޭ ގެޔަށް ހަމަލަދީފައިވާ ކަމުގައެވެ. އަދި، އޭނާ ޝަހީދުކޮށްލާފައި ވަނީ ގޭތެރޭގައި ހުއްޓާ ކަމުގައި ވެސް އޭނާގެ ޢާއިލާއިން ބުނެއެވެ. ނަމަވެސް، ޔަހޫދީންގެ ޖައްބާރު އަސްކަރިއްޔާއިން ބުނީ، ދިމަޔިދީއަށް ބަޑިން ހަމަލަދީފައި ވަނީ ޔަހޫދީންގެ ކާރަކަށް ހަމަލަދޭން އޭނާ މަސައްކަތް ކުރުމުން ކަމުގައެވެ.
ޙަވާރާގެ ރައްޔިތުން ބުނީ، 200 އެއްހާ ޔަހޫދީން އެ ރަށުގެ މަގުތަކަށް ނިކުމެ، ފަލަސްޠީނުގެ ކުށެއް ނެތް ޢާންމު ރައްޔިތުންގެ ގެދޮރާއި މުދަލަށް ގެއްލުންދީފައިވާ ކަމުގައެވެ. އެ މީހުން ތިބީ މޫނު ނިވާކޮށްގެން ކަމަށް ވެސް މަންޒަރު ފެނުނު މީހުން ބުންޏެވެ. މިއީ، ފާއިތުވި މަސްތަކުގެ ތެރޭގައި ޔަހޫދީންގެ ޢާންމު ރައްޔިތުން ޙަވާރާގައި މި ފަދަ އަމަލުތަކެއް ހިންގާފައިވާ ތިންވަނަ ފަހަރެވެ.
ދިމަޔިދީއަކީ ޔުނިވަރސިޓީގައި މަތީ ތަޢުލީމު ހާސިލު ކުރަމުންދާ ދަރިވަރެކެވެ. ފަލަސްޠީނުގެ ޚާރިޖީ ވުޒާރާއިން ވަނީ ދިމަޔިދީ ޝަހީދުކޮށްލަން ޔަހޫދީންގެ ޢާންމުންނާއި ސިފައިން ގުޅިގެން ހިންގި ލާއިންސާނީ ޖަރީމާތައް އެންމެ ހަރުކަށި އިބާރާތުން ކުށްވެރި ކޮށްފައެވެ.
ދުމަޔިދީގެ ޖަނާޒާ ބާއްވަން މަސައްކަތް ކުރުމުން ޔަހޫދީންގެ ޖައްބާރު ސިފައިން ވަނީ އެ މީހުން ހުރަސްއަޅަން މަސައްކަތް ކޮށްފައެވެ. އަދި، އޭނާގެ ޖަނާޒާގެ ބައިވެރިންނަށް ހަމަލަދީފައެވެ. ފަލަސްޠީނުގެ ރެޑް ކްރެސެންޓުން ބުނީ ޔަހޫދީ ސިފައިންގެ ހަމަލަތަކުގައި ފަލަސްޠީނުގެ 51 މީހުން ޒަޚަމުވި ކަމުގައެވެ.
ހުޅަނގު އައްސޭރިއަކީ ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީން އަތްގަދަ ކޮށްފައިވާ ފަލަސްޠީނުގެ ބިމެކެވެ. ހުޅަނގު އައްސޭރީގައި ފަލަސްޠީނުގެ މުސްލިމުން ދިރިއުޅެނީ ޔަހޫދީ ދަޢުލަތުގެ އަޅުވެތިކަމުގެ ދަށުގައެވެ. ފަލަސްޠީނާއި އިސްރާޢީލާ ދެމެދު މީގެ އަހަރުތަކެއް ކުރިން ފަށާފައިވާ ސުލްޙައިގެ މަޝްވަރާތައް މީގެ 10 ވަރަކަށް އަހަރު ކުރިން މެދުކެނޑުނު ފަހުން، ޔަހޫދީ ޖައްބާރު ސިފައިން ކޮންމެ ދުވަހަކުހެން ދަނީ ފަލަސްޠީނުގެ ބިންތަކަށް އަރައި ލާއިންސާނީ ޖަރީމާތައް ހިންގަމުންނެވެ. އަދި، ފަލަސްޠީނުގެ ކުށެއް ނެތް މުސްލިމުންގެ ލޭއޮހޮރުވައިލަމުންނެވެ.
ޖުލައި މަހު ޖިނީންގައި އޮންނަ ރެފިއުޖީ ކޭމްޕަށް އަރައި ޔަހޫދީ ޖައްބާރު ސިފައިން ހިންގި ލާއިންސާނީ ޖަރީމާތަކެއްގައި ފަލަސްޠީނުގެ 12 މީހުން ޝަހީދު ކޮށްލިއެވެ. އަދި، 100 އަށްވުރެ ގިނަ މީހުން ޒަޚަމުކޮށްލިއެވެ. ޔަހޫދީ ޓެރެރިސްޓު ސިފައިން ފަލަސްޠީނުގެ ބިންތަކަށް އަރައި މި އަހަރުގެ ތެރޭގައި ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ މީހުންގެ ޢަދަދު މިހާރު ވަނީ 250 އަށްވުރެ މައްޗަށް އަރާފައެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.