މިޞްރުގެ ރަށެއް ކަމުގައިވާ އިސްކަންދަރިއްޔާގައި ބަޑިޖަހައި އިސްރާޢީލުގެ ދެ ފަތުރުވެރިން މަރައިލައިފިއެވެ. މި ހާދިސާގައި މިޞްރުގެ ޢާންމު ރައްޔިތެއް ވެސް މަރުވެފައިވާއިރު، އިސްރާޢީލުގެ ފަތުރުވެރިންނަށް އަމާޒުކޮށް ބަޑީގެ ހަމަލަ ދީފައި ވަނީ މިޞްރުގެ ފުލުހެކެވެ.
މި ހަމަލާގައި އިތުރު ފަތުރުވެރިއަކު ޒަޚަމުވި ކަމުގައި މިޞްރުގެ 'އެކްސްޓްރާ ނިއުސް' މީޑިޔާއިން ރިޕޯޓު ކުރެއެވެ. އަދި، އިސްރާޢީލުގެ ދެ ފަތުރުވެރިން މަރައިލުމުގައި ޒިންމާވާ ފުލުސް މީހާ ހައްޔަރު ކޮށްފައިވާ ކަމުގައި ވެސް އެ ނޫހުން ރިޕޯޓު ކުރެއެވެ. ޔަހޫދީ އިސްރާޢީލުގެ ކުއްލި ހާލަތްތަކުގައި ހަރަކާތްތެރިވާ އިދާރާއިން ވެސް ވަނީ އިސްކަންދަރިއްޔާގައި ދީފައިވާ ހަމަލައެއްގައި އެ ޤައުމުގެ ދެ ފަތުރުވެރިން މަރުވެފައިވާ ކަން ކަށަވަރު ކޮށްދީފައެވެ.
މި ހާދިސާ ހިނގާފައި ވަނީ އިސްކަންދަރިއްޔާގެ މަންޝިއްޔާ ސަރަޙައްދުގައެވެ. މި ހަމަލާގައި ޒިންމާވާ ފުލުސް މީހާއަކީ، އިންކަންދަރިއްޔާގައި ހުންނަ ފަތުރުވެރިންގެ މެދުގައި މަޤުބޫލް މަންޒިލްތަކުގައި ސަލާމަތީ ކަންކަން ބެލެހެއްޓުމުގެ ޒިންމާ މަތިކޮށްފައިވާ މީހެއް ކަމުގައި ރިޕޯޓުތައް ބުނެއެވެ. މި ހާދިސާގެ ފުރިހަމަ ތަހުޤީޤެއް ފަށާފައިވާ ކަމުގައި މިޞްރުގެ އަމަން ބަލަހައްޓާ އިދާރާތަކުން ބުނެއެވެ.
ބައެއް މީޑިޔާ ރިޕޯޓުތަކުން ބުނާ ގޮތުގައި، ފުލުސް މީހާ ބަޑީގެ ހަމަލަ ދީފައި ވަނީ އިސްރާޢީލުގެ ފަތުރުވެރިންތަކެއް ގޮވައިގެން ދަތުރު ކުރަމުން ދިޔަ ބަހަކަށެވެ. މި ހަމަލާގައި ޒަޚަމުވެފައިވާ މީހާއަށް ފަރުވާދޭން މަސައްކަތް ފަށާފައިވާއިރު، ހަމަލާ ދީފައިވާ ސަރަޙައްދު މިހާރު ބަންދުކޮށްފައިވާ ކަމުގައި ވެސް ރިޕޯޓުތައް ބުނެއެވެ.
މިޞްރުގެ އިސްކަންދަރިއްޔާގައި އިސްރާޢީލުގެ ދެ ފަތުރުވެރިން މަރައިލާފައި މި ވަނީ، ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް ހަނގުރާމަ އިޢުލާނުކޮށް 'އޮޕަރޭޝަން އަޤްޞާ ފްލަޑް'ގެ ނަމުގައި ޚާއްޞަ އަސްކަރީ ކެމްޕޭނެއް ފަށާފައިވާ ދަނޑިވަޅެއްގައެވެ. އަދި، ޔަހޫދީ އިސްރާޢީލުގެ ސިފައިންނާ ދެކޮޅަށް ހަނގުރާމަ ކުރަމުންދާ ދަނޑިވަޅެއްގައެވެ.
ޙަމާސްގެ އޮޕަރޭޝަނުގެ ބަދަލު ހިފުމުގެ ގޮތުން ޔަހޫދީ އިސްރާޢީލުން ވެސް ވަނީ ޣައްޒާއަށް ބޮންއަޅަން ފަށާފައެވެ. ޑްރޯނާއި އާޓިލަރީ ބަޑީގެ އިތުރުން އަސްކަރީ މަތިންދާބޯޓުތައް ބޭނުންކޮށްގެން ޣައްޒާއަށް ދެމުންދާ ހަމަލަތަކުގައި ގިނަ ޢަދަދެއްގެ ބަޔަކު ވަނީ ޝަހީދުވެފައެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، ޔަހޫދީންގެ ހަމަލަތަކުގައި ޝަހީދުކޮށްލާފައިވާ މީހުންގެ ޢަދަދު 313 އަށް އަރާފައިވާ ކަމުގައެވެ. އަދި، 2,000 އަށްވުރެ ގިނަ މީހުން ޒަޚަމުވެފައިވާ ކަމުގައެވެ.
މި ހަމަނުޖެހުންތަކަށް ނިމުމެއް ގެނައުމަށް މަސައްކަތް ކުރުމަށް، ފަލަސްޠީނުގެ ސަރުކާރުން ވަނީ ގޮވައިލާފައެވެ. އަދި، ޔަހޫދީ ޖައްބާރު އަސްކަރިއްޔާއިން ފަށާފައިވާ ލޭއޮހޮރުވުންތަކަށް ނިމުމެއް ގެނައުމާ މެދު މަޝްވަރާ ކުރުމަށް ކުއްލި ބައްދަލުވުމެއް ބޭއްވުމަށް ޢަރަބި ލީގުގައި އެދިފައެވެ. ފަލަސްޠީނުން ޢަރަބި ލީގަށް ކަނޑައަޅާފައި ހުންނަވާ މަންދޫބު މުޙައްމަދު އަޤްލޫޤު ވިދާޅުވީ، އެ ލީގުގެ ކުއްލި ބައްދަލުވުމެއް ބޭއްވުމަށް އެދި ރަސްމީކޮށް ހުށަހަޅާފައިވާނެ ކަމުގައެވެ.
ޣައްޒާއަކީ ފަލަސްޠީނުގެ 2.3 މިލިޔަނެއްހާ މުސްލިމުން ދިރިއުޅޭ ސަހަރެކެވެ. އެއީ ދުނިޔޭގައި އޮތް އެންމެ ބޮޑު ޖަލުގެ ގޮތުގައި ސިފަ ކުރެވޭ ތަނެކެވެ. އެ ތަން ވަށައިގެން ޔަހޫދީ ޓެރެރިސްޓުން ވަނީ ފެންސް ޖަހައި ބަންދުކޮށްފައެވެ. ޣައްޒާގެ ރައްޔިތުންނަށް އެ ރަށަށް ވަދެނިކުމެ ހެދެނީ ޔަހޫދީ ސިފައިންގެ ޗެކްޕޮއިންޓުތައް ހުރަސް ކޮށްފައެވެ. ޣައްޒާގައި ވެރިކަން ކުރަނީ ޙަމާސް ޖަމާޢަތުންނެވެ.
ބަދަލު ހިފުމުގެ ގޮތުން ޔަހޫދީ އިސްރާޢީލުން މިހާރު ވަނީ ޣައްޒާގެ ނިކަމެތި ރައްޔިތުންނާ ދެކޮޅަށް ދަތި ކުރުމުގެ ފިޔަވަޅުތައް އަޅާފައެވެ. ޣައްޒާއިން ކަރަންޓާއި ފެނުގެ ޚިދުމަތް މިހާރު ވަނީ ކަނޑައިލާފައެވެ. އަދި، ކަރަންޓުގެ ޚިދުމަތް ދިނުމަށް ބޭނުން ކުރާ ތެޔޮ އެތެރެކުރުން ވަނީ ހުއްޓައިލާފައެވެ. ޣައްޒާގެ ރައްޔިތުން ބަނޑަށް ޖެއްސުމުގެ ގޮތުން ކާބޯތަކެތީ އެތެރެކުރަން ހުއްދަ ދިނުން ވެސް މިހާރު ވަނީ މެދުކަނޑައިލާފައެވެ.