ޔަހޫދީ އިސްރާޢީލުގެ އަސްކަރިއްޔާއިން ޣައްޒާއަށް އަމާޒުކޮށް ދެމުންދާ ނުރައްކާތެރި ހަމަލަތަކުގައި ޝަހީދު ކޮށްލާފައިވާ މުސްލިމުންގެ ޢަދަދު 2,215 އަށް އަރައިފިއެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި, އަންހެނުންނާއި ކުޑަކުދިންނެވެ. ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ދަނީ މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. އަދި، ޑްރޯންތަކާއި އަސްކަރީ މަތިންދާބޯޓުތައް ބޭނުން ކޮށްގެން މިސައިލް ހަމަލަތައް ދެމުންނެވެ.
ޣައްޒާގައި ދިރިއުޅޭ 2.3 މިލިޔަން މީހުންގެ ލޭއޮހޮރުވައިލާ, އެ މީހުންގެ ފުރާނަ ނަގައިލަން ޔަހޫދީ އަސްކަރިއްޔާގެ ޓެރެރިސްޓު ސިފައިން ފަށާފައިވާ ލާއިންސާނީ ޖަރީމާތަކުގައި 8,174 އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. ފާއިތުވި 24 ގަޑިއިރުގެ ތެރޭގައި ޔަހޫދީ އިސްރާޢީލުން ޣައްޒާއަށް ދިން ނުރައްކާތެރި ހަމަލަތަކުގައި އެކަނިވެސް 350 އަށްވުރެ ގިނަ މީހުން ޝަހީދު ކޮށްލިއެވެ. އޭގެ ތެރޭގައި ޣައްޒާގެ އުތުރުގެ ސަރަޙައްދުތައް ދޫކޮށް, ދެކުނުގައިވާ ސަރަޙައްދުތަކަށް ހިޖުރަކުރަން މަސައްކަތްކުރި އަންހެނުންނާއި ކުޑަކުދިން ހިމެނެއެވެ.
ޣައްޒާގެ އުތުރުގެ ސަރަޙައްދުތަކުގައި 1.1 މިލިޔަނަށް ވުރެ ގިނަ މީހުން ދިރިއުޅޭއިރު, އެ މީހުންގެ ގެދޮރާއި ވަޒަން ދޫކޮށް ދެކުނުގެ ސަރަޙައްދުތަކަށް ބަދަލުވާން ޔަހޫދީ އިސްރާޢީލުން ވަނީ އަންގާފައެވެ. އަދި, ޣައްޒާގެ އުތުރުގެ ސަރަޙައްދުތަކަށް އެއްގަމު މަގުން އަރަން ޔަހޫދީ ސިފައިން ދަނީ ތައްޔާރު ވަމުންނެވެ.
ޣައްޒާގެ އުތުރުގެ ސަރަޙައްދީ އިން ކައިރިއަށް ޔަހޫދީ ސިފައިންގެ 300,000 އަށްވުރެ ގިނަ މީހުންގެ ފައުޖެއް ވަނީ ޖަމާކޮށްފައެވެ. އަދި, ބަރުހަތިޔާރާއި އަސްކަރީ ޓޭންކުފަހަރު ވަނީ ޖަމާކޮށްފައެވެ. ހުޅަނގު އައްސޭރީގައި ވެސް ޔަހޫދީ ސިފައިން ދަނީ އުދުވާންތައް ހިންގަމުންނެވެ. ފާއިތުވި 7 ވަރަކަށް ދުވަހު ހުޅަނގު އައްސޭރީގައި ހިންގާފައިވާ އުދުވާންތަކުގައި 50 އަށްވުރެ ގިނަ މީހުން ޝަހީދު ކޮށްލާފައިވާއިރު, ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 1,000 އަށްވުރެ މަތިވެފައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ, ޔަހޫދީ އިސްރާޢީލުގެ ހަމަލަތަކުގައި ޞިއްޙީ ޚިދުމަތްތެރިންނަށް ރައްކަލެއް ނެތް ކަމުގައެވެ. ޔަހޫދީންގެ އުދުވާންތައް ފެށި ފަހުން ޞިއްޙީ ޚިދުމަތްތެރިންގެ ތެރެއިން 28 މީހުން ޝަހީދު ކޮށްލާފައިވާ ކަމުގައި އެ ވުޒާރާއިން ބުނެއެވެ. އަދި, 15 ހޮސްޕިޓަލަކަށް ބޮން އަޅާފައިވާއިރު, ދެ ހޮސްޕިޓަލަކަށް ބޮޑެތި ގެއްލުންތަކެއް ލިބި, ބަންދުކުރަން ޖެހިފައިވާ ކަމުގައި ވެސް އެ ވުޒާރާއިން ބުންޏެވެ.
އޭގެ ތެރެއިން އަލް-ދައްރާ ކުޑަކުދިންގެ ހޮސްޕިޓަލަށް ޔަހޫދީ އިސްރާޢީލުގެ އަސްކަރިއްޔާއިން ވަނީ ވައިޓް ފޮސްފޮރަސް ބޮމުގެ ހަމަލައެއް ދީފައެވެ. އެއީ, ހަނގުރާމައިގެ މައިދާނުގައި ބޭނުން ކުރުން ބައިނަލްއަޤުވާމީ ޤާނޫނުތަކުން މަނާކޮށްފައިވާ ހަތިޔާރެކެވެ. މީގެ އިތުރުން, ޔަހޫދީ ސިފައިން ވަނީ ގަސްދުގައި 23 އެމްބިޔުލާންސަކަށް ހަމަލަދީ, އޭގައި ތިބި ބަލި މީހުންނާއި ޞިއްޙީ ޚިދުމަތްތެރިން ޝަހީދު ކޮށްލާފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ, ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް ހަނގުރާމަ އިޢުލާނުކޮށް, 'އޮޕަރޭޝަން އަޤްޞާ ފްލަޑް'ގެ ނަމުގައި ފަށާފައިވާ ޚާއްޞަ އަސްކަރީ އޮޕަރޭޝަނުގެ ބަދަލު ހިފުމުގެ ގޮތުންނެވެ. ޙަމާސްއިން އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތްކަމަށްވާ އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.