އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާއަށް ދެމުންދާ ވައިގެ ހަމަލަތަކުގައި ޝަހީދު ކޮށްލާފައިވާ މުސްލިމުންގެ ޢަދަދު 2,800 އަށްވުރެ މައްޗަށް އަރައިފިއެވެ. މީގެ ތެރޭގައި ގިނައީ ކުށެއް ނެތް އަންހެނުންނާއި، އުމުރުން ދުވަސްވީ މީހުންނާއި ކުޑަކުދިންނެވެ. ޔަހޫދީ އިސްރާޢީލުން ދަނީ މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. މި ހަމަލަތަކުގައި ޒަޚަމު ކޮށްލާފައިވާ މީހުންގެ ޢަދަދު މިހާރު 9,600 އަށްވުރެ މައްޗަށް އަރައެވެ.
ޣައްޒާގެ ދެކުނުގައިވާ ސަރަޙައްދުތަކަށް ޔަހޫދީ އިސްރާޢީލުގެ ޖައްބާރު އަސްކަރިއްޔާއިން އެންމެ ފަހުން ދިން ހަމަލަތަކުގައި ވެސް 70 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. ރަފަޙް އަދި ޚާން ޔޫނިސަށް އަމާޒުކޮށް ދިން މި ހަމަލަތަކުގައި މަރުވި މީހުންގެ ތެރޭގައި ގިނައީ ކުށެއް ނެތް އަންހެނުންނާއި ކުޑަކުދިންނެވެ.
މި ހަމަލަތަކުގައި އެތަކެއް ސަތޭކަ ބަޔަކު ޒަޚަމުވި ކަމުގައި ވެސް ފަލަސްޠީނުގެ ޞިއްޙީ އޮފިޝަލުން ވިދާޅުވެއެވެ. ފާއިތުވި 12 ވަރަކަށް ގަޑިއިރުގެ ތެރޭގައި ޔަހޫދީ އިސްރާޢީލުގެ އަސްކަރިއްޔާއިން ޣައްޒާގެ ދެކުނުގެ ރަށްތަކަށް 200 އަށްވުރެ ގިނަ މިސައިލް ހަމަލަ ދީފައިވެއެވެ.
ޚާން ޔޫނިސަށް ޔަހޫދީ އިސްރާޢީލުގެ އަސްކަރިއްޔާއިން ދީފައިވާ ހަމަލަތައް އަމާޒު ކޮށްފައި ވަނީ ޢާންމުން ދިރިއުޅޭ ޢިމާރާތްތަކަކަށެވެ. މި ހަމަލަތަކުގައި ތިން ޢިމާރާތް ސުންނާފަތި ކޮށްލާފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ތިން ޢިމާރާތަށް ދިން ހަމަލަތަކުގައި 17 މީހުން ޝަހީދު ކޮށްލިއެވެ. އަދި، ގިނަ ޢަދަދެއްގެ ބަޔަކު ޒަޚަމު ކޮށްލިއެވެ.
ޣައްޒާގައި ޔަހޫދީ އިސްރާޢީލުން ހިންގަމުންދާ ލާއިންސާނީ އުދުވާންތައް މުޅި ދުނިޔެއިން ދަނީ ކުށްވެރި ކުރަމުންނެވެ. ފަލަސްޠީނުގެ ކުށެއް ނެތް ޢާންމުން ގަތުލުކުރުން ހުއްޓައިލުމަށް ގޮވައިލަމުންނެވެ. ނަމަވެސް، އެމެރިކާއިން ދަނީ މި ކަމަށް ހިތްވަރު ދެމުންނެވެ. ޔަހޫދީންގެ ދިފާޢުގައި ފަލަސްޠީނުގެ ކުށެއް ނެތް މުސްލިމުން ގަތުލު ކުރުމަކީ ޔަހޫދީންގެ ހައްޤެއް ކަމަށް ބުނެއެވެ.
ޣައްޒާގެ ކުށެއް ނެތް އަންހެނުންނާއި ކުޑަކުދިންނާ ދެކޮޅަށް ޔަހޫދީ އިސްރާޢީލުގެ ޖައްބާރު ސިފައިން ހިންގަމުންދާ ލާއިންސާނީ އުދުވާނުގައި އެހީތެރިކަން ފޯރުކޮށްދޭން އެމެރިކާއިން ވަނީ އެ ޤައުމުގެ އަސްކަރީ ދެ މަނަވަރު ކަމުގައިވާ ޔޫ.އެސް.އެސް ޑުވައިޓް ޑީ އައިޒެންހަވަރއާއި ޔޫ.އެސް.އެސް ޖެރާލްޑް އާރް ފޯޑް އިސްރާޢީލުގެ އައްސޭރިފަށަށް ފޮނުވާފައެވެ. އެއީ، އަސްކަރީ މަތިންދާބޯޓު އުފުލާ ދެ މަނަވަރެވެ.
ޔަހޫދީ އިސްރާޢީލަށް އަސްކަރީ ގޮތުން އެހީތެރިކަން ފޯރުކޮށްދޭން އެމެރިކާގެ އަސްކަރިއްޔާގެ 2,000 އެއްހާ ސިފައިން ތައްޔާރީ ހާލަތަކަށް ގެނެސްފައިވާ ކަމުގައި ބައެއް މީޑިޔާ ރިޕޯޓުތައް ބުނެއެވެ. ޔަހޫދީން ހިންގަމުންދާ ގަތުލުއާންމުގައި އެހީތެރިކަން ފޯރުކޮށްދެވޭނެ އިތުރު ގޮތްތައް ދެނެގަތުމަށް އެމެރިކާގެ އަސްކަރިއްޔާގެ އެންމެ އިސް އޮފިޝަލް – ޔޫ.އެސް ސެންޓްރަލް ކޮމާންޑުގެ އިސްވެރިޔާ ޖެނެރަލް މައިކަލް "އެރިކް" ކުރިއްލާ ވަނީ އިސްރާޢީލަށް ވަޑައިގަންނަވާފައެވެ.
އޭނާ އިސްރާޢީލަށް ވަޑައިގަންނަވާފައި މި ވަނީ، ޔަހޫދީ އިސްރާޢީލުގެ އުދުވާންތައް ހުއްޓުވަން ރަޝިޔާއިން ކުރަމުންދާ މަސައްކަތްތައް ފޭލު ކޮށްލާފައިވާ ދަނޑިވަޅެއްގައެވެ. ރަޝިޔާއިން ވަނީ ޔަހޫދީ އިސްރާޢީލުގެ ހަމަލަތައް ހުއްޓައިލުމަށާއި ޣައްޒާގައި ހާލުގައި ޖެހިފައިވާ މިލިޔަނަކަށް ވުރެ ގިނަ މުސްލިމުންނަށް އިންސާނީ އެހީތެރިކަން ފޯރުކޮށްދިނުމަށް ގޮވައިލާ އ.ދގެ ސަލާމަތީ މަޖިލީހަށް ޤަރާރެއް ހުށަހަޅާފައެވެ. ނަމަވެސް، އެމެރިކާއިން އިސްވެ އޮވެ، އެ ޤަރާރު ފާސް ކުރުމަށް ވަނީ ހުރަސް އަޅާފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. މި އޮޕަރޭޝަންގެ ދަށުން ޙަމާސްއިން ވަނީ 1,400 އެއްހާ ޔަހޫދީން މަރައިލާފައެވެ. އަދި، ޙަމާސްއިން 199 މީހުން ރަހީނު ކޮށްފައިވާ ކަމަށް އިސްރާޢީލުން ބުނާއިރު، ޙަމާސްއިން ބުނީ 250 އެއްހާ މީހުން އެ ޖަމާޢަތުގެ ބެލުމުގެ ދަށުގައި ތިބި ކަމުގައެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.