ޔަހޫދީ އިސްރާޢީލުގެ އަސްކަރިއްޔާއިން ޣައްޒާގެ އަލް-އަހްލީ ޢަރަބި ހޮސްޕިޓަލަށް ދިން ރަޙުމު ކުޑަ ހަމަލަ މުސްލިމް ދުނިޔެއިން ކުށްވެރި ކުރަމުން އެބަދެއެވެ. ޔަހޫދީންގެ އުދުވާންތަކުގައި ގެދޮރުނެތިފައިވާ އެތަކެއް ސަތޭކަ ބަޔަކު ހިޔާވަހިކަން ހޯދަމުން ދިޔަ ހޮސްޕިޓަލަށް ނުރައްކާތެރި މިސައިލް ހަމަލައެއް ދިނުމާ ގުޅިގެން ޝަހީދުވި މީހުންގެ ޢަދަދު މިހާރު ވަނީ 500 އަށްވުރެ މައްޗަށް އަރާފައެވެ. އޭގެ ތެރޭގައި ގިނަ ޢަދަދެއްގެ ބަލި މީހުންގެ ވެސް ހިމެނެއެވެ. އަދި، އެތަކެއް ސަތޭކަ ބަޔަކު ޒަޚަމުވިއެވެ.
މި ހަމަލައާ ގުޅިގެން ޔަހޫދީ އިސްރާޢީލާ އެކު ސިޔާސީ ގުޅުން ޤާއިމު ކޮށްފައިވާ ޤައުމުތަކުން ވެސް ވަނީ ކަންބޮޑުވުން ފާޅުކޮށްފައެވެ. އަދި، އެންމެ ހަރުކަށި އިބާރާތުން ކުށްވެރި ކޮށްފައެވެ. އެ ޤައުމުތަކުގެ ތެރޭގައި އެކުވެރި ޢަރަބި ޢިމާރާތް (ޔޫ.އޭ.އީ)އާއި، ބަޙްރައިނާއި، މަޣްރިބު ހިމެނެއެވެ. ޔަހޫދީ އިސްރާޢީލުން ވަނީ ހޮސްޕިޓަލަށް ދިން ހަމަލައިން ބޯދަމައިގަންނަން މަސައްކަތް ކޮށްފައެވެ. އަދި، އެ ހަމަލަގެ ޒިންމާ މުޖާހިދުންގެ ޖަމާޢަތެއް ކަމުގައިވާ ޕަލަސްޓީނިޔަން އިސްލާމިކް ޖިހާދު (ޕީ.އައި.ޖޭ)ގެ ކޮނޑުގައި އަޅުވަން މަސައްކަތް ކޮށްފައެވެ. ނަމަވެސް، ޢަރަބި ދުނިޔެއިން ވަނީ އެ ތުހުމަތު ގަބޫލު ނުކުރާނެ ކަމަށް ބުނެފައެވެ.
ސަޢޫދީ ޢަރަބިއްޔާއިން ބުނީ އަލް-އަހްލީ ޢަރަބި ހޮސްޕިޓަލަށް މިސައިލް ހަމަލައެއް ދީގެން ޔަހޫދީ އިސްރާޢީލުން ހިންގާފައި ވަނީ ރަޙުމު ކުޑަ، ލާއިންސާނީ އަމަލެއް ކަމުގައެވެ. ސަޢޫދީ ޢަރަބިއްޔާގެ ކުށްވެރި ކުރުމާ އިސްރާޢީލާ ކުރިމަތިލާން ޖެހިފައި މި ވަނީ، އެ ދެ ޤައުމުގެ ދެކުމުގައި ސިޔާސީ ގުޅުން ގާއިމު ކުރުވަން އެމެރިކާއިން މަސައްކަތް ކުރަމުންދާ ދަނޑިވަޅެއްގައެވެ. ނަމަވެސް، މިހާރު އެ ކަމަށް ހުރަސްއެޅިފައިވާ ކަމަށް ބެލުމުގެ ފުރުޞަތު އެބައޮތް ކަމުގައި މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ.
އުރުދުންގެ ރަސްގެފާނު ޢަބްދުﷲ ދެވަނަ ވިދާޅުވީ، އަލް-އަހްލީ ޢަރަބި ހޮސްޕިޓަލަށް ދީފައިވާ ހަމަލައަކީ ގަތުލުއާންމެއް ކަމުގައެވެ. އަދި، މިއީ އިންސާނުން ލަދުވެތިވާން ޖެހޭ ފަދަ ދަށު ދަރަޖައިގެ އަމަލެއް ކަމުގައެވެ. އަލް-އަހްލީ ޢަރަބި ހޮސްޕިޓަލަށް ދީފައިވާ ހަމަލައަކީ، 2008 ވަނަ އަހަރަށް ފަހު އެންމެ ހަމަލައެއްގައި މިހާ ގިނަ ޢަދަދެއްގެ ބަޔަކު ޝަހީދުކޮށްލި ފުރަތަމަ ފަހަރެވެ.
މުސްލިމް އުންމަތުގެ އިތުރުން ބައިނަލްއަޤުވާމީ ޖަމުޢިއްޔާތަކާއި ޖަމާޢަތްތަކުން ވެސް ދަނީ ޔަހޫދީ އިސްރާޢީލުގެ މި ހަމަލަ އެންމެ ހަރުކަށި އިބާރާތުން ކުށްވެރި ކުރަމުންނެވެ. އ.ދގެ ރިލީފް އެންޑް ވޯކްސް އޭޖެންސީ ފޯ ޕަލަސްޓީނިޔަން ރެފިއުޖީޒް (ޔޫ.އެން.އާރް.ޑަބްލިޔު.އޭ)ން ބުނީ، ފަލަސްޠީނުގެ މުސްލިމުންގެ ފުރާނައަށް ޔަހޫދީ އިސްރާޢީލުގެ އަސްކަރިއްޔާއިން އެއްވެސް ފަރުވާލެއް ނުބަހައްޓާ ކަމުގައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، އަލް-އަހްލީ ޢަރަބި ހޮސްޕިޓަލަކީ ބަލި މީހުންނާއި، ޔަހޫދީންގެ ހަމަލަތަކުގެ ޒަޚަމު ކޮށްލާފައިވާ އެތަކެއް ސަތޭކަ ބަޔަކަށް ފަރުވާ ދިނުމުގެ އިތުރުން، ގެދޮރުނެތިކޮށްލާފައިވާ އެތަކެއް ސަތޭކަ ބަޔަކަށް ބޯހިޔާވަހިކަން ފޯރުކޮށްދެމުން ދިޔަ ހޮސްޕިޓަލެއް ކަމުގައެވެ. ގެދޮރުނެތިފައިވާ ގިނަ ޢަދަދެއްގެ މުސްލިމުން، ހޮސްޕިޓަލްތަކުގައި ރައްކާތެރިކަން ހޯދަމުންދާ ކަމުގައި ފަލަސްޠީނުގެ އޮފިޝަލުން ވިދާޅުވެއެވެ.
ޔަހޫދީ އިސްރާޢީލުން މެދުކެނޑުމެއް ނެތި ޣައްޒާއަށް ބޮން އަޅަމުން ދަނީ ހުޅަނގުގެ ތާޢީދާއި އެއްބާރުލުމާއި އެހީތެރިކަމާ އެކުގައެވެ. ފާޅުގައި ޒަޔަނިސްޓު އިސްރާޢީލަށް ތާޢީދުކޮށް، ފަލަސްޠީނުގެ ކުށެއް ނެތް ޢާންމުން ގަތުލުކުރުމަށް އެއްބާރުލުން ދެމުން ދަނީ އެމެރިކާއިންނެވެ. އަލް-އަހްލީ ޢަރަބި ހޮސްޕިޓަލަށް ދިން ރަޙުމު ކުޑަ ހަމަލައާ ގުޅިގެން، މުޅި ދުނިޔެއިން އެމެރިކާގެ ސިޔާސަތާ މެދު ސުވާލު ކުރާނެ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ.
ޔަހޫދީ ޢައްޒާގެ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 3,000 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޝަހީދުންގެ ޢަދަދު އިންތިހާއަށް އިތުރުވެ، އެ މީހުންގެ ހަށިތައް އަޅާނެ ބޮޑީ ބޭގް ވެސް ވަނީ ހުސްވެފައެވެ. އަދި، ބައެއް މީހުންގެ ހަށިތައް ވަގުތީ ގޮތުން އައިސްކްރީމް އުފުލާ ލޮރީ ފަދަ އުޅަނދުފަހަރުގައި ބަހައްޓާފައިވާ ކަމުގައި ރިޕޯޓުތައް ބުނެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. މި އޮޕަރޭޝަންގެ ދަށުން ޙަމާސްއިން ވަނީ 1,400 އެއްހާ ޔަހޫދީން މަރައިލާފައެވެ. އަދި، ޙަމާސްއިން 199 މީހުން ރަހީނު ކޮށްފައިވާ ކަމަށް އިސްރާޢީލުން ބުނާއިރު، ޙަމާސްއިން ބުނީ 250 އެއްހާ މީހުން އެ ޖަމާޢަތުގެ ބެލުމުގެ ދަށުގައި ތިބި ކަމުގައެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.