ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ޣައްޒާގެ 2.3 މިލިޔަން މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާއި ހަނގުރާމައިގެ ކުށްތަކަށް ހިތްވަރު ދެއްވުމަށް އިނގިރޭސިވިލާތުގެ ބޮޑުވަޒީރު ރިޝީ ސުނާކް ތެލް އަވީވަށް ވަޑައިގަންނަވައިފިއެވެ. ޒަޔަނިސްޓުންގެ އަސްކަރިޔާއިން މެދުކެނޑުމެއް ނެތި ޣައްޒާއަށް މިސައިލްތަކުގެ ވާރޭ އޮއްސަމުންދާއިރު، މި އުދުވާންތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 3,785 އަށް އަރާފައެވެ.
"އިސްރާޢީލަށް މި އާދެވުނީ ކަޅު އަނދިރި ދުވަހެއްގައި. އިސްރާޢީލަށް ހިތްދަތިކަމާއި ހިތާމަޔާ ކުރިމަތިވެފައިވާ ދަނޑިވަޅެއްގައި. [އިނގިރޭސިވިލާތުން] އިސްރާޢީލާގެ ސަރުކާރާ އެކު ސާބިތުކަމާ އެކު ދެމިއޮންނާނެ. އިސްރާޢީލުގެ ރައްޔިތުންނާ އެކު ދެމި ތިބޭނަން. އަދި، އުންމީދަކީ އިސްރާޢީލަށް ކާމިޔާބީ،" ޔަހޫދީންގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫއާ އެކު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ސުނާކް ވިދާޅުވިއެވެ.
ޙަމާސްއިން ’އޮޕަރޭޝަން އަލް-އަޤްޞާ ފްލަޑް‘ގެ ދަށުން ޔަހޫދީންގެ 1,400 މީހުން މަރައިލާ، 199 މީހުން ރަހީނު ކުރުމުން ސުނާކް ވަނީ އެކަމާ ހިތާމަ ފާޅު ކުރައްވާފައެވެ. ނަމަވެސް، ފާހަގަ ކޮށްލަން ޖެހޭ ކަމަކީ، ޢައްޒާގެ އަންހެނުންނާއި ކުޑަކުދިންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކާއި ހަނގުރާމައިގެ ކުށްތައް އޭނާއަށް ފެނިވަޑައިނުގަންނަވާ ކަމެވެ. ނުވަތަ ނުފެންނަ ކަމަށް ހައްދަވާފައިވާ ކަމެވެ.
ޣައްޒާއިން ފެން ކަނޑައިލާފައިވާ ކަމުގެ ވާހަކަ އޭނާ ދައްކަވާފައެއް ނުވެއެވެ. ޣައްޒާގެ ރައްޔިތުންނަށް ކާބޯތަކެތި ލިބެން އޮތް ހުރިހާ ދޮރެއް ޔަހޫދީ އިސްރާޢީލުން ބަންދުކޮށް، ތަޅުއަޅުވާފައިވާ ކަން އޭނާއަށް އެނގިވަޑައިގަންނަވާ ކަމަށް ހައްދަވާފައެއް ނުވެއެވެ. ޣައްޒާގެ ގިނަ ހޮސްޕިޓަލުތަކުގައި ކަރަންޓު ނެތް ކަމުގެ ވާހަކަ އޭނާ ދައްކަވާފައެއް ނުވެއެވެ. ޔަހޫދީންގެ ހަމަލަތަކުގައި ޝަހީދު ކޮށްލާފައިވާ 3,785 މުސްލިމުންގެ ނަން ވެސް އޭނާ ގަންނަވާފައެއް ނުވެއެވެ.
ނަމަވެސް، އޭނާގެ އޮފީހުން ވަނީ މި ކަން ހަމަޖައްސައިލަން މަސައްކަތް ކޮށްފައެވެ. އޭނާގެ އޮފީހުން ބައެއް މީޑިޔާތައް ބުނީ، މަރުވި މީހުންގެ ޢާއިލާތަކަށް ސުނާކް ތަޢުޒިޔާ ދަންނަވާ ކަމުގައެވެ. އަދި، ހަމަލަ ބަދަލު ކުރުން ހުއްޓައިލަން ދެ ފަރާތަށް ވެސް ގޮވައިލައްވާ ކަމުގައެވެ. މި ޖަވާބުން ހާމަވަނީ، ޖައްބާރުކަން ބޮޑުވެގެންވާ ނަތަންޔާހޫގެ އަމުރަށް ފަލަސްޠީނުގެ މުސްލިމް އަންހެނުންނާއި ކުޑަކުދިން ކަތިލަމުންދާ ކަމަކީ، އޭނާ ކަންބޮޑުވެ ވަޑައިގަންނަވާ ކަމެއް ނޫން ކަމެވެ. ނަމަވެސް، ޔަހޫދީން ޣައްޒާގައި މިހާރު ހިންގަމުން ދަނީ ގަތުލުއާންމެއް ކަން މުޅި ދުނިޔެ ވެސް ގަބޫލު ކުރެއެވެ.
މެދުކެނޑުމެއް ނެތި ބޮން އަޅައި މިސައިލް ހަމަލަތައްދީ ޣައްޒާގެ ބޮޑުބައި ސުންނާފަތި ކޮށްލާފައިވާއިރު، ހާލުގައި ޖެހިފައިވާ މުސްލިމުންނަށް އިންސާނީ އެހީތެރިކަން ފޯރުކޮށްދޭން އ.ދގެ ސަލާމަތީ މަޖިލީހުން ކުރި މަސައްކަތުގައި ބައިވެރިވާން ވެސް އިނގިރޭސިވިލާތުން ވަނީ ދެކޮޅު ހަދާފައެވެ. އެ ކަން ވެސް ކޮށްފައި ވަނީ ސުނާކްގެ އަމުރަށެވެ. ޔަހޫދީ އިސްރާޢީލުގެ ލާއިންސާނީ އުދުވާންތައް ހުއްޓައިލާ، ފަލަސްޠީނުގެ މުސްލިމުންނަށް އިންސާނީ އެހީތެރިކަން ފޯރުކޮށްދޭން ގޮވައިލާ ޤަރާރަކަށް އ.ދގެ ސަލާމަތީ މަޖިލީހުގައި ވޯޓަށް އެހުމުން އިނގިރޭސިވިލާތުން ވަނީ ވޯޓުގައި ބައިވެރިނުވާން ނިންމާފައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 3,785 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.