ޢައްޒާގައި އޮންނަ ނަޞާރާދީނުގެ ފައްޅިއަކަށް ޔަހޫދީ އިސްރާޢީލުން ނުރައްކާތެރި މިސައިލް ހަމަލަތަކެއްދީ، ގިނަ ޢަދަދެއްގެ ބަޔަކު ޝަހީދު ކޮށްލައިފިއެވެ. އެ ފައްޅިއަކީ، ޔަހޫދީ އިސްރާޢީލުން ޣައްޒާއަށް ދެމުންދާ ވައިގެ ހަމަލަތަކުގައި ގެދޮރު ނެތިކޮށްލާފައިވާ މީހުން ހިޔާވަހިކަން ހޯދަމުން ދިޔަ ޢިމާރާތެކެވެ. އެ ތަނަށް ދިން ހަމަލަގައި ގިނަ ޢަދަދެއްގެ ބަޔަކު ޒަޚަމު ކޮށްލާފައިވާއިރު، ޝަހީދުވި މީހުންގެ ޢަދަދު އަދި ސާފު ނުވާ ކަމުގައި ޣައްޒާގެ ދާޚިލީ ވުޒާރާއިން ބުނެއެވެ.
އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ދަނީ ޣައްޒާއަށް މެދުކެނޑުމެއް ނެތި ބޮން އަޅަމުންނެވެ. މުޅި ދުނިޔެއިން ކުށްވެރި ކޮށްފައިވާ މި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 3,785 އަށް އަރާފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 10,000 އަށްވުރެ އިތުރުވާނެ ކަމަށް ބެލެވެއެވެ.
އަޅުކަން ބޭނުން ކުރާ ޢިމާރާތްތަކަށް ހަމަލަ ދިނުމަކީ ހަނގުރާމައިގެ ކުށެކެވެ. އަދި، ހޮސްޕިޓަލްތަކާއި ޞިއްޙީ ފަރުވާ ދިނުމަށް ބޭނުން ކުރާ އެހެން މަރުކަޒުތަކާއި ޢިމާރާތްތަކަށް ހަމަލަ ދިނުމަކީ ވެސް ހަނގުރާމައިގެ ކުށެކެވެ. ނަމަވެސް، ޒަޔަނިސްޓު އިސްރާޢީލުގެ އަސްކަރިއްޔާއިން ވަނީ ޣައްޒާގައި ހުންނަ އަލް-އަހްލީ ޢަރަބި ހޮސްޕިޓަލަށް ވެސް ދާދި ފަހުން ރަޙުމު ކުޑަ ހަމަލައެއް ދީފައެވެ. އަދި، 470 އަށްވުރެ ގިނަ މީހުން ޝަހީދު ކޮށްލާފައެވެ.
ފައްޅިއަން ދިން ހަމަލައިން ރެކެން ޔަހޫދީ އިސްރާޢީލުން ވަނީ މަސައްކަތް ކޮށްފައެވެ. އެ މީހުން ބުނީ، ހަމަލަތައް އަމާޒު ކޮށްފައި ވަނީ ޙަމާސް ޖަމާޢަތުގެ އަސްކަރީ މަރުކަޒަކަށް ކަމުގައެވެ. އަދި، ފައްޅީގެ ތެރޭގައި ޙަމާސްގެ މުޖާހިދުން ފިލައި ތިބި ކަމަށް ވެސް ޔަހޫދީ އިސްރާޢީލުން ބުންޏެވެ.
ނަމަވެސް، ހަޤީޤަތަކީ، އެ ތަނުގައި ތިބީ އިސްރާޢީލުގެ ރަޙުމު ކުޑަ ހަމަލަތަކުން ސަލާމަތްކަން ހޯދަން މަސައްކަތް ކުރި ޢާންމު ރައްޔިތުން ކަމެވެ. މި ހަމަލާގައި ފައްޅީގެ އިތުރުން އެ ތަނާ ޖެހިގެން ހުރި ޢާންމުން ދިރިއުޅޭ ޢިމާރާތެއް ވެސް ވަނީ ސުންނާފަތިވެފައެވެ. އަދި، ޒަޚަމުވި ގިނަ ޢަދަދެއްގެ ބަޔަކު ހޮސްޕިޓަލަށް ގެންގޮސްފައިވާ ކަމުގައި މަންޒަރު ފެނުނު މީހުން ބުނެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 3,785 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.