ޣައްޒާގައި ނިކަމެތިކޮށް، ހާލުގައި ޖައްސާފައިވާ އެތަކެއް މިލިޔަން މުސްލިމުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރަމުންދާ ކަމަށާއި، އެ ކަމަށް ހުރި ހުރަސްތައް ހައްލު ކުރައްވާނެ ކަމުގައި އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވެއްޖެއެވެ. އޭނާ މިމޭރުމުން ވިދާޅުވެފައި މި ވަނީ، ޣައްޒާގައި ހާލުގައި ޖެހިފައިވާ މުސްލިމުންނަށް އެހީގެ ސާމާނު ހިފައިގެން ދަތުރު ކޮށްފައިވާ ގިނަ ޢަދަދެއްގެ އުޅަނދެއް ޣައްޒާގެ ރަފަޙް ހުރަސް ކައިރީގައި ތާށި ކޮށްލާފައިވާ ދަނޑިވަޅެއްގައެވެ.
"ރަފަޙް މަގުން ޣައްޒާއަށް އިންސާނީ އެހީގެ ސާމާނު އެތެރެ ކުރަން، ކަމާ ގުޅުންހުރި ހުރިހާ ފަރާތަކާ އެކު މި ދަނީ މަޝްވަރާ ކުރަމުން. އަދި، އެ ކަމަށް ހުރި ހުރަސްތައް ދެނެގަތުމަށް މަސައްކަތް ކުރަމުން. ޣައްޒާގައި ދިރިއުޅޭ 2 މިލިޔަނަށް ވުރެ ގިނަ މީހުންނަށް ބޭނުންވާ ކާބޯތަކެއްޗެއް ނެތް. ފެނެއް ނެތް. ބޭހެއް އަދި ތެލެއް ވެސް ނެތް. ރަފަޙް ހުރަސް ކައިރީގައި މިޞްރާ ވީ ފަޅީގައި ތާށިވެފައިވާ ލޮރީތައް ވީހާވެސް އަވަހަށް ޣައްޒާއަށް އެތެރެވުމުގެ ފުރުޞަތު ދޭން ޖެހޭ،" ގުތެރޭޝް ވިދާޅުވިއެވެ.
ގުތެރޭޝް ވިދާޅުވީ، ރަފަޙް ހުރަސް ކައިރީގައި އެހީގެ ސާމާނު ބަރު ކޮށްފައިވާ ގިނަ ޢަދަދެއްގެ ލޮރީއާއި ޓްރަކް ތާށިވެފައިވާ ކަމުގައެވެ. "އެ އުޅަނދުތަކުގައި އެ ހުރީ ޣައްޒާގެ މުސްލިމުންގެ ފުރާނައާ ގުޅިފައިވާ ކާބޯތަކެއްޗާއި އެހެނިހެން ސާމާނު،" ގުތެރޭޝް ވިދާޅުވިއެވެ. އެހީގެ ސާމާނު ބަރު ކޮށްފައިވާ 200 އުޅަނދު ރަފަޙް ހުރަސް ކައިރީގައި ތާށިވެފައި އެބައޮތެވެ.
ކުރިއަށް އޮތް ދެ ދުވަހެއްގެ އެ ލޮރީތައް ޣައްޒާއަށް އެތެރެވާނެ ކަމަށް ބެލެވޭ ކަމުގައި އ.ދއިން ބުނެއެވެ. ނަމަވެސް، މި ކަމަށް އޮތް އެއް ހުރަހަކީ، ރަފަޙް ހުރަސް ހިމެނޭ ސަރަޙައްދަށް ޒަޔަނިސްޓު އިސްރާޢީލުގެ އަސްކަރިއްޔާއިން ބޮން އަޅައި، އެ ސަރަޙައްދުގެ މަގުތަކަށް ބޮޑެތި ގެއްލުންތަކެއް ދީފައިވުމެވެ. އެ ސަރަޙައްދަށް ލިބިފައިވާ ގެއްލުންތައް މަރާމާތު ކުރަން މިހާރު މަސައްކަތް ކުރަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ކުރިއަށް އޮތް ދުވަސް، ނުވަތަ ދެ ދުވަހެއްގެ ތެރޭގައި ލޮރީތައް އެހީއާ އެކު ޣައްޒާއަށް އެތެރެވާން ފަށާނެ ކަމަށް ބެލެވޭ ކަމުގައި އ.ދގެ އިންސާނިއްޔަތާ ބެހޭ އިދާރާގެ އިސްވެރިޔާ މާޓިން ގްރިފިތްސް ވެސް ވިދާޅުވިއެވެ. ނަމަވެސް، އެންމެ ފުރަތަމަ ޣައްޒާއަށް އެތެރެ ކުރަން ހަމަޖެހިފައި ވަނީ އެންމެ 20 ލޮރީގެ ސާމާނު ކަމަށް ބެލެވެއެވެ.
ދުނިޔޭގެ ޞިއްޙަތު ޖަމުޢިއްޔާ – ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)ގެ ކުއްލި ހާލަތްތަކާ ބެހޭ ގޮފީގެ ޑިރެކްޓަރ މައިކަލް ރަޔަން ވަނީ މި ކަމާ މެދު ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ 20 ލޮރީގެ ސާމާނުން ނުފުދޭނެ ކަމަށާއި، 2,000 އަށްވުރެ ގިނަ ލޮރީގެ އެހީގެ ސާމާނު ޣައްޒާގެ ރައްޔިތުންނަށް ބޭނުންވެފައިވާ ކަމުގައެވެ.
ޣައްޒާއަށް އިންސާނީ އެހީ ފޯރުކޮށްދިނުމަށް ކުރަމުންދާ މަސައްކަތްތަކަށް މިޞްރުން އެއްބާރުލުން ދެމުން ނުދާ ކަމަށް ތުހުމަތުކޮށް ހުޅަނގުގެ މީޑިޔާތަކުން ރިޕޯޓު ކުރަމުންދާތީ، މިޞްރުން ވަނީ އެ ކަން ކުށްވެރި ކޮށްފައެވެ. ހުޅަނގު މީޑިޔާތަކުން ބުނަމުން ދަނީ ރަފަޙްގެ ސަރަޙައްދީ ރޮނގު ބަންދު ކޮށްފައި ވަނީ މިޞްރުން ކަމުގައެވެ. ނަމަވެސް، ޔަހޫދީ އިސްރާޢީލުން ދަނީ ހުއްޓުމެއް ނެތި ރަފަޙްގެ ސަރަޙައްދީ ހުރަސް ކައިރިއަށް ބޮން އަޅަމުންނެވެ. ހުޅަނގުގެ މީޑިޔާތަކުން ދަނީ އެ މަންޒަރު ނުފެންނަ ކަމަށް ހަދަމުންނެވެ. އަދި، އެ ކަން ރިޕޯޓު ނުކޮށް، ޒަޔަނިސްޓު އިސްރާޢީލު ދިފާޢު ކުރަން މަސައްކަތް ކުރަމުންނެވެ.
"ހުޅަނގުގެ މީޑިޔާއިން ދަނީ މިޞްރަށް ދޮގު ތުހުމަތުތައް އަމާޒު ކުރަމުން. ޣައްޒާގައި ފެށިގެން މި އުޅޭ ކާރިސާއިން އެ ކަން ވަރަށް ސާފު. ރަފަޙް ހުރަސް ބަންދު ކޮށްފައި ވަނީ މިޞްރުން ކަމަށް ބުނަމުން. ނަމަވެސް، ޔަހޫދީ އިސްރާޢީލުން އެ ތަނަށް އަޅަމުންދާ ބޮންތަކުގެ ވާހަކައެއް ނުދައްކާ. ޣައްޒާއަށް އިންސާނީ އެހީ ވައްދަން ހުރަސް އަޅަނީ ޒަޔަނިސްޓު އިސްރާޢީލުން ކަން ހާމަ ކުރަން ހުޅަނގުގެ މީޑިޔާތަކުން ދަނީ ދެކޮޅު ހަދަމުން. އަދި އޮޅުވައިލަމުން،" މިޞްރުގެ ޚާރިޖީ ވުޒާރާގެ އިސް އޮފިޝަލެއް ކަމުގައިވާ އަޙްމަދު އަބޫ ޒައިދު ވިދާޅުވިއެވެ.
ރަފަޙް ހުރަސް ކައިރީގައި 200 އެއްހާ އުޅަނދު ތާށިވެފައިވާއިރު، އެ އުޅަނދުތަކުގައި 3,000 ޓަނުގެ އެހީގެ ސާމާނު ހުރި ކަމުގައި އ.ދއިން ބުނެއެވެ. އަދި، ޣައްޒާއަށް ފޮނުވަން އިތުރު އެހީގެ ޕެކޭޖުތައް ތައްޔާރު ކުރަމުންދާ ކަމުގައި ވެސް އ.ދއިން ބުނެއެވެ. އެ ތަކެތި ޣައްޒާއަށް އެތެރެ ކުރާނީ އ.ދގެ ބެލުމުގެ ދަށުންނެވެ. އަދި، މިޞްރުން މިހާރު ދަނީ ރަފަޙް ހުރަސް ކައިރިއަށް ބޮން އަޅައި ޒަޔަނިސްޓު އިސްރާޢީލުން ސުންނާފަތި ކޮށްލާފައިވާ މަގުތައް މަރާމާތު ކުރަން މަސައްކަތް ކުރަމުންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 4,137 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.