ޔޫކްރެއިންގެ އިރުމަތީގައި އޮންނަ އަވްދީވްކާއަށް އަތްގަދަ ކުރަން އެ ޤައުމުގައި ހަރަކާތްތެރިވާ ރަޝިޔާގެ އިސްތިޢުމާރީ ފައުޖުތަކުން މަސައްކަތް ފަށައިފިއެވެ. އަވްދީވްކާއަކީ އިރުމަތީގައި އޮންނަ ދޮނެޓްސްކާ 15 ކިލޯމީޓަރު ދުރުގައި އޮންނަ ރަށެކެވެ. ދޮނެޓްސްކަކީ މިހާރު ރަޝިޔާގެ އަތްދަށުގައި އޮތް ސަރަޙައްދެކެވެ.
ޔޫކްރެއިންގެ އަސްކަރިއްޔާއިން ބުނީ، އަވްދީވްކާގެ އަމާޒުތަކަށް ރަޝިޔާގެ ފައުޖުތަކުން ވަރުގަދަ ހަމަލަތަކެއް ދޭން ފަށާފައިވާ ކަމުގައެވެ. އޮކްޓޫބަރު މަހުގެ 10 ވަނަ ދުވަހު، ގިނަ ޢަދަދެއްގެ ރަޝިޔާގެ ސިފައިން، ބަރުހަތިޔާރާ އެކު އެ ރަށަށް އަރަން މަސައްކަތް ކޮށްފައިވާ ކަމުގައި ޔޫކްރެއިންގެ އަސްކަރިއްޔާއިން ބުނެއެވެ. މި އުދުވާނުގައި ރަޝިޔާގެ އަސްކަރީ ހެލިކޮޕްޓަރުތަކާއި މަތިންދާބޯޓުތައް ވެސް ބައިވެރިވިއެވެ. ނަމަވެސް، ޔޫކްރެއިންގެ ފައުޖުތަކުން ވަނީ އެ ރަށް ދިފާޢު ކޮށްފައެވެ.
ޔޫކްރެއިންގެ އަސްކަރިއްޔާގެ އިސް އޮފިޝަލެއް ކަމުގައިވާ މޭޖަރ މަސްކިމް މޮރޯޒޮވް ވިދާޅުވީ އަވްދީވްކާއާ 40 ކިލޯމީޓަރު ދުރުގައި އޮތް ސަރަޙައްދަކަށް ރަޝިޔާގެ އަސްކަރިއްޔާގެ ބޮޑު ފައުޖެއް މިހާރު ޖަމާކޮށްފައި އޮތް ކަމުގައެވެ. އެ ސަރަޙައްދަށް ބަރުހަތިޔާރު ޖަމާކޮށްފައިވާ ކަމުގައި ވެސް އޭނާ ވިދާޅުވިއެވެ. އަވްދީވްކާ ހިފަން ހިންގަމުންދާ އޮޕަރޭޝަންގެ ދަށުން އެ ރަށުގައި ތިބި ޔޫކްރެއިންގެ ފައުޖުތަކަށް ދުވާލަކު 50 ވަރަކަށް ފަހަރު ވައިގެ ހަމަލަތައް އަމާޒު ކުރަމުންދާ ކަމުގައި ވެސް މޮރޯޒޮވް ވިދާޅުވިއެވެ.
އަވްދީވްކާ ހިފަން އޮކްޓޫބަރު 10 ވަނަ ދުވަހު ރަޝިޔާއިން ފޮނުވި ގިނަ ޢަދަދެއްގެ ސިފައިން މަރުވެފައިވާ ކަމުގައި، ރަޝިޔާ-ޔޫކްރެއިން ހަނގުރާމަ ދިރާސާކުރާ އެމެރިކާގެ އިންސްޓިޓިއުޓް ފޯ ދަ ސްޓަޑީ އޮފް ވޯ (އަ.އެސް.ޑަބްލިޔު)ން ބުނެއެވެ. އަދި، ރަޝިޔާގެ ގިނަ ޢަދަދެއްގެ އަސްކަރީ އުޅަނދުފަހަރު ހަލާކުވެފައިވާ ކަމުގައި ވެސް އެ ޖަމުޢިއްޔާއިން ބުނެއެވެ. ނަމަވެސް، ރަޝިޔާގެ ފައުޖުތަކުން ވަނީ ކުޑަ ސަރަޙައްދަކަށް އަތްގަދަ ކޮށްފައެވެ.
ރަޝިޔާ-ޔޫކްރެއިން ހަނގުރާމަ ފެށުމުގެ ކުރިން އަވްދީވްކާއަކީ 30,000 އެއްހާ މީހުންގެ އާބާދީއެއް ދިރިއުޅެމުން ދިޔަ ކުޑަ ރަށެކެވެ. މިހާރު އެ ރަށުގައި ބާކީ ތިބީ 1,600 އެއްހާ ޢާންމުން ކަމުގައި ޔޫކްރެއިނުން ބުނެއެވެ. ރަޝިޔާގެ ހަމަލަތަކާ ގުޅިގެން އެތަކެއް ހާސް ބަޔަކު ވަނީ އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ހިޖުރަ ކޮށްފައެވެ. ރަޝިޔާގެ ހަމަލަތަކުގައި އެ ރަށުގެ ގިނަ ޢިމާރާތްތައް ސުންނާފަތި ކޮށްލާފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
އަވްދީވްކާއަށް ރަޝިޔާއިން އެންމެ ފަހުން ދިން ހަމަލަތަކާ ގުޅިގެން އެ ރަށަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދިނުމަށް ވަނީ ހުރަސް އެޅިފައެވެ. އަދި، އެ ރަށުން ކާބޯތަކެއްޗާއި ބޯފެނުގެ އިތުރުން ޒަރޫރީ އަދި ބޭސްފަރުވާއަށް ބޭނުންވާ ސާމާނު ހުސްވަމުންދާ ކަމުގައި ޔޫކްރެއިންގެ އޮފިޝަލުން ވިދާޅުވެއެވެ.
2014 ވަނަ އަހަރު ވެސް ރަޝިޔާއިން ވާގިދޭ ހަތިޔާރު އެޅި ގުރޫޕުތަކުން އަވްދީވްކާ ހިފާފައިވެއެވެ. ނަމަވެސް، ޔޫކްރެއިންގެ ފައުޖުތަކުން ވަނީ އެ ރަށް ހިފާފައެވެ. އަދި، 2017 ވަނަ އަހަރު ވެސް އެ ގުރޫޕުތަކުން ޔޫކްރެއިންގެ ފައުޖުތަކަށް އަމާޒުކޮށް ވަރުގަދަ ހަމަލަތަކެއް ދީފައިވެއެވެ. އަވްދީވްކާ އޮންނަނީ، 2022 ވަނަ އަހަރުގެ ސެޕްޓެންބަރު މަހު ރަޝިޔާއިން އެނެކްސް ކޮށްފައި، ނުވަތަ ރަޝިޔާގެ ބައެއްގެ ގޮތުގައި ކަނޑައަޅާފައިވާ ސަރަޙައްދުގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 605 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި އޮންނަ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ.
ކައުންޓަރއޮފެންސިވްގައި ޔޫކްރެއިންގެ ފައުޖުތަކަށް ބޮޑެތި ހުރަސްތަކެއް ކުރިމަތިވަމުން ދިޔަ ނަމަވެސް، ޔޫކްރެއިނުން ދަނީ ކޮންމެ ވެސް ވަރެއްގެ ކުރިއެރުންތަކެއް ހޯދަމުންނެވެ. އަދި، އިރުމައްޗާއި ޒަޕޮރީޜިޔާ ހިމެނޭ ސަރަޙައްދުގެ ބައެއް ރަށްތަކާއި އަވަށްތައް ރަޝިޔާ ސިފައިންގެ އަތްދަށުން މިނިވަން ކޮށްފައިވާ ކަން ފާހަގަ ކޮށްލަން ޖެހެއެވެ. އެމެރިކާއިން ދެކެނީ މިއީ ބޮޑު ކުރިއެރުންތަކެއްގެ ގޮތުގައެވެ.