ޔަހޫދީ ދަޢުލަތުގެ ޙިމާޔަތަށް އިތުރު ބަރު ހަތިޔާރު މެދުއިރުމައްޗަށް ފޮނުވުމަށް ނިންމާފައިވާކަމަށް އެމެރިކާގެ ދިފާޢީ ވަޒީރު ލޮއިޑް އޮސްޓިން ވިދާޅުވެއްޖެއެވެ.
އެމެރިކާގެ ދިފާޢީ ވަޒީރު އޮސްޓިން ނެރުއްވި ބަޔާނެއްގައި އޭނާ ވިދާޅުވެފައިވަނީ ޔަހޫދީ ދަޢުލަތުގެ ޙިމާޔަތަށް އިތުރު ތާޑް މަރުކައިގެ ދިފާޢީ ނިޒާމާއި ޕެޓްރިއޮޓް މަރުކައިގެ ދިފާޢީ ނިޒާމު މެދުއިރުމައްޗަށް ފޮނުވުމަށް ނިންމާފައިވާކަމަށެވެ. އެ ނިޒާމުތަކުން ބެލިސްޓިކް މިސައިލާއި ކުރޫޒު މިސައިލް ޙަމަލާތަކުން ދިފާޢުކޮށްދޭނެއެވެ. ނަމަވެސް އެ ނިޒާމުތައް ފޮނުވުމަށް ނިންމާފައިވަނީ ކޮން ޤައުމަކަށް ކަމެއް އޮސްޓިން ވިދާޅެއް ނުވެއެވެ. ބެލެވޭ ގޮތުގައި އެ ނިޒާމުތައް ބަހައްޓާނީ ޢިރާޤާއި ސޫރިޔާގައި އެމެރިކާއިން ޤާއިމުކޮށްފައިވާ އަސްކަރީ މަރުކަޒުތަކުގައެވެ. ފާއިތުވި ދުވަސްތަކުގައި ހަނގުރާމަވެރި ޖަމާޢަތްތަކުންވަނީ އެ މަރުކަޒުތަކަށް މިސައިލާއި ޑްރޯން ބޭނުންކޮށްގެން ޙަމަލާ ދީފައެވެ. އޭގެ އިތުރުން އެމެރިކާއިންވަނީ ޔަމަނުން ފޮނުވައިލި ގިނަ ޢަދަދެއްގެ މިސައިލުތަކަކުންވެސް ޔަހޫދީ ދަޢުލަތް ސަލާމަތްކޮށްދީފައެވެ. އެ މިސައިލުތަކާ ކުރިމަތިލާފައިވަނީ ރަތް ކަނޑުގައި ޙަރަކާތްތެރިވަމުންދިޔަ އެމެރިކާގެ މަނަވަރަކުންނެވެ. އެ ޙަމަލާ ދީފައިވަނީ ޔަހޫދީ ދަޢުލަތް ޙިމާޔަތް ކުރުމަށް އެމެރިކާއިން މެޑިޓެރޭނިއަން ކަނޑަށް މަނަވަރުތައް ޖަމާކޮށްފައިވަނިކޮށެވެ.
ޔަހޫދީ ދަޢުލަތުގެ ޙިމަޔާތަށް އެމެރިކާއިން ޚާއްޞަ އިސްކަމެއް ދެމުންދަނީ ޔަހޫދީ ފައުޖުތަކާ ދެކޮޅަށް ލުބުނާނުގައި ޙަރަކާތްތެރިވާ ޙިޒްބުﷲ ޖަމާޢަތާއި ޣައްޒާގައި ވެރިކަންކުރާ ޙަމާސް ޖަމާޢަތުން ވަރުގަދަ ޙަމަލާތަކެއް ދެމުންދާ ދަނޑިވަޅެއްގައެވެ.