ފަލަސްޠީނުގެ ޣައްޒާ ކައިރީގައި ޙަރަކާތްތެރިވަމުންދިޔަ ޔަހޫދީ ސިފައިންގެ ޓޭންކަރަކުން މިޞްރުގެ އަސްކަރީ މަޤާމަކަށް ޙަމަލާ ދީފިއެވެ.
މިޞްރުގެ އަސްކަރިއްޔާއިން ބުނެފައިވަނީ އެ ޙަމަލާގައި ހަތް މީހުން ޒަކަމުވެފައިކަމަށާއި އޭގެ ތެރޭގައި ސަރަޙައްދީ ރޮނގު ބަލަހައްޓާ ސިފައިންވެސް ހިމެނޭކަމަށެވެ. މިޞްރުން ބުނާ ގޮތުގައި އެ ޙަމަލާ ޢަމާޒުވީ ސަރަޙައްދީ ރޮނގު ބަލަހައްޓާ ސިފައިންގެ މަރުކަޒަކަށެވެ. އެ ޙަމަލާގައި ޒަޚަމުވި ގިނަ މީހުންނަށް ހަސްފަތާލުން ފަރުވާ ދޭން ޖެހުނެވެ.
ޔަހޫދީ އަސްކަރިއްޔާއިން ބުނެފައިވަނީ ސަރަޙައްދީ ރޮނގު ހުރަސްކޮށް މިޞްރަށް ޙަމަލާ ދެވުނީ އޮޅުމަކުންކަމަށާއި އެ ކަމަށް މަޢާފަށް އެދޭކަމަށެވެ. އަދި އެ ޙަމަލާ ދެވުނު ސަބަބު ތަޙްޤީޤުކުރަމުންދާކަމަށްވެސް ޔަހޫދީ ސިފައިން ބުނެއެވެ.
ފާއިތުވި ދެ ހަފުތާގެ ތެރޭގައި ޣައްޒާއާއި މިޞްރު ގުޅޭ ސަރަޙައްދަށް ޔަހޫދީ ސިފައިންވަނީ ވަރުގަދަ ޙަމަލާތަކެއް ދީފައެވެ. އެ ޙަމަލާތަކުގެ ސަބަބުން މިޞްރު މަގުން ޣައްޒާއަށް އެހީގެ ގާފިލާތައް ފޮނުވުމަށްވެސް ހުރަސް އެޅުނެވެ. ހަނގުރާމައިގެ ކުރިން ދުވާލަކު 100 ލޮރީގެ މުދާ މިޞްރުން ޣައްޒާއަށް އެތެރެ ކުރެއެވެ. ނަމަވެސް ފާއިތުވި ދެ ދުވަހުގެ މަތިން ޣައްޒާއަށް ވަދެފައިވަނީ 37 ލޮރީއެވެ.