ޔަހޫދީ އިސްރާއީލުން ފަލަސްތީނުގެ ޣައްޒާއަށް އަމާޒުކޮށް ދޭ ހަމަލާތަކުގައި ނިކަމެތިވެފައި ތިބި ޣައްޒާގެ އާންމު ރައްޔިތުންނަށް އިންސާނީ އެހީ ފޯރުކޮށްދިނުމުގެ ގޮތުން އެހީ ހިފައިގެން ދިޔަ 17 ޓްރަކެއް ޣައްޒާއަށް ވަދެއްޖެއެވެ.
އެހީ ހިފައިގެން ޣައްޒާއަށް އެތެރެވި 17 ޓްރަކާއެކު މިހާރު ޖުމްލަ 37 ޓްރަކް ވަނީ ޣައްޒާއަށް އެތެރެވެފައެވެ. ފެނާ ކާބޯތަކެތި އަދި ހޮސްޕިޓަލްތަކަށް ބޭނުންވާނެ ސިއްޙީ އެހީ ހިފައިގެން އެހީގެ ގާފިލާތަކަށް އެންމެ ފުރަތަމަ ޣައްޒާއަށް ފުރަތަމަ އެތެރެވެވުނީ ހޮނިހިރު ދުވަހުއެވެ. އެގޮތުން ޣައްޒާގައި ވެރިކަންކުރާ ޙަމާސް ޖަމާޢަތުން ބުނެފައިވަނީ މިޞްރު މަގުން އައިސްފައިވަނީ 20 ލޮރީކަމަށާއި އޭގައި ހުރީ އެންމެ ޒަރޫރީ ސާމާނުކަމަށެވެ. އޭގެ ތެރޭގައި ފެނާއި ކާބޯތަކެއްޗާއި ބޭހާއި ޞިއްޙީ ސާމާނު ހިމެނެއެވެ. މަޢުލޫމާތު ލިބިފައިވާ ގޮތުގައި އެންމެ ފުރަތަމަ ވައްދާފައިވަނީ އދއާއި ފަލަސްޠީނުގެ ރެޑް ކުރެސެންޓުން ފޯރުކޮށްދޭ އެހީގެ ސާމާނެވެ. ނަމަވެސް އދ. އިން އަންދާޒާ ކުރާ ގޮތުން ޣައްޒާގެ އާންމުންގެ ބޭނުންތައް ފުއްދުމަށް ދުވާލަކު 100 ޓްރަކްގެ އެހީ ބޭނުންވާނެއެވެ.
ޣައްޒާއާއި މިސްރު ގުޅޭ ރަފާހް ބޯޑަރުގައި މިހާރުވެސް 1000 ޓަނުގެ އެހީ ހިފައިގެން 100 އެއްހާ ޓްރަކްގެ ގަފިލާއެއް އެބައޮތެވެ. ޣައްޒާއަށް އެހީ ފޯރުކޮށްދޭން އިސްރާއީލުން އެއްބަސްވީ ރަފާހް ބޯޑަރު ކައިރީ ޓްރަކްތައް ތާށިވެފައި އޮންނަތާ ދެތިން ދުވަސް ފަހުންނެވެ.
އިސްރާއީލުން ޣައްޒާއަށް ދެމުންގެންދާ ހަމަލާތަކާއި ގުޅިގެން މުޅި ޣައްޒާއިން ވަނީ ކަރަންޓު ކަނޑާލާފައެވެ. ކާބޯތަކެއްޗާއި ފެން ލިބޭނެގޮތެއް ނެތި ދިރިއުޅުމަށް ދަތިވެފައެވެ.
މިސްރުގައި ބޭއްވި "ކައިރޯ ޕީސް ސަމިޓް" ގައި އަރަބި އަދި ހުޅަނގުގެ ޤައުމުތަކުގެ އިސްވެރިން ބައިވެރިވެ އިސްރާއީލާ ފަލަސްތީނުގެ މައްސަލައިގައި ދެން ވާންވީ ކޮން ގޮތެއްތޯ ނިންމާނެ ކަމަށް ބެލެވުނު ނަމަވެސް، ސަމިޓް ނިމިގެންދިޔައީ އެއްވެސް ކަމެއް ނުނިމި ކަމަށް ރިޕޯޓުތައް ބުނެއެވެ. ރަފާހް ބޯޑަރު ދާއިމީ ގޮތެއްގައި ހުޅުވާފައި ބޭއްވުމަށްވެސް ހުޅަނގުގެ ވަފުދުތަކުން ވަނީ ދެކޮޅުހަދާފައެވެ. އަދި އިސްރާއީލް ފަލަސްތީނު މައްސަލައިގައި އެންމެ ފަހުގެ ނިންމުން ނިންމާ ބަޔާނެއް ނެރޭވަރު ނުކުރަން ހުޅަނގުގެ ވަފުދުތަކުން ވަރަށް މަސައްކަތްކޮށްފައިވާ ކަމަށްވެސް ރިޕޯޓުތައް ބުނެއެވެ.