ޣައްޒާގެ ދެކުނުން އޮންނަ ޚާން ޔޫނުސް އަށް ހަމަލާދޭން އުޅުނު އިސްރާއީލްގެ ހަތިޔާރުއެޅި ސިފައިންނަށް ހަމަލާދީ ޓޭންކަކާއި ދެ ބުލްޑޯޒަރު ނައްތާލާފައިވާ ކަމަށް ހަމާސްގެ އަސްކަރީ ގޮފި، އަލް ގައްސާމް ބްރިގޭޑްސް އިން ބުނެފިއެވެ.
ޣައްސާމް ބްރިގޭޑްސްއިން ނެރުނު ނޫސްބަޔާނެއްގައި ބުނެފައިވާ ގޮތުން ޓޭންކަކާއި ބުލްޑޯޒަރު ނައްތާލާފައި ވަނީ ބޯޑަރު ހުރަސްކުރިތާ މާ ގިނަ އިރުތަކެއް ނުވަނީހެވެ. މިއާއިއެކު އިސްރާއީލްގެ ހަތިޔާރު އެޅި ސިފައިން އެ ސަރަހައްދުން ފިލާފައިވާ ކަމަށްވެސް އެ ނޫސްބަޔާނުގައި ބުނެފައިވެއެވެ.
އިސްރާއީލް އަސްކަރިއްޔާގެ ތަރުޖަމާނު ވިދާޅުވި ގޮތުގައި ހަމާސްގެ މި ހަމަލާގެ ސަބަބުން އެކަކު މަރުވެ ތިން މީހުން ވަނީ ޒަހަމްވެފައެވެ.
މި މަހުގެ 7 ވަނަ ދުވަހު އިސްރާއީލުން ޣައްޒާއަށް ދޭން ފެށި ހަމަލާތަކަކީ އިސްރާއީލްގެ އަނިޔާވެރިކަމުން ފަލަސްތީނުގެ ރައްޔިތުން ދިފާއުކުރުމަށް ހަމާސް ޖަމާއަތުން ފެށި "އަގްސާ ފްލަޑް" ފެށުމުންނެވެ. އިސްރާއީލުން ޣައްޒާއަށް ދޭ ހަމަލާތަކުގައި މިހާރުވެސް 4000ށްވުރެ ގިނަ މީހުން ވަނީ ޝަހީދުކޮށްލާފައެވެ.