ކޯރަމް ހަމަނުވެގެން މިއަދުގެ ޖަލްސާ ކެންސަލް

ރައްޔިތުން މަޖިލީހުގެ މިއަދުގެ ޖަލްސާވެސް ކޯރަމް ހަމަނުވެގެން ކެންސަލްކޮށްފިއެވެ.

87 މެމްބަރުން ތިއްބަވާ މަޖިލީހުގެ ކޯރަމަކީ 22 މެމްބަރުންނެވެ. މަޖިލިސް ފެށުމަށް ކަނޑައަޅާފައިވާ ގަޑި ޖެހުނު އިރުވެސް 22 މެމްބަރުން ހަމަނުވާތީ މަޖިލީހުގެ ރިޔާސަތުން ވަނީ މިއަދުގެ ޖަލްސާ ކެންސަލްކުރިކަން އިއުލާންކުރައްވާފައެވެ. މަޖިލީހުގެ ރިޔާސަތުގައި މިއަދު އިންނެވީ ނައިބް ރައީސް ގަލޮޅު އުތުރު ދާއިރާގެ މެމްބަރު އީވާ އަބްދުﷲ އެވެ.

މަޖިލީހުގެ މިއަދުގެ ޖަލްސާއަށް އެޖެންޑާކޮށްފައިވަނީ 2023 ވަނަ އަހަރަށް ލަފާކޮށް ހުށަހަޅި ސަޕްލިމެންޓްރީ ބަޖެޓްގެ ހުށައެޅުމެވެެ. މި އަހަރަށް ފާސްކޮށްފައިވާ ބަޖެޓު ހަރަދުތައް ހަމަޖެއްސުމަށް، އިތުރު 6.5 ބިލިއަން ރުފިޔާ ޚަރަދުކުރުމުގެ ހުއްދަ ހޯދުމަށް، ސަރުކާރުން ވަނީ ސަޕްލިމަންޓްރީ ބަޖެޓެއް ރައްޔިތުންގެ މަޖިލީހަށް ހުށައަޅުއްވާފައެވެ.

ސަރުކާރުގެ ފަރާތުނ،ް ކެނދިކުޅުދޫ ދާއިރާގެ މެންބަރު އަޙްމަދު ޢީސާ ހުށަހަޅުއްވާފައިވާ، ދިވެހިރާއްޖޭގެ ޓޫއަރިޒަމް ބެހޭ ޤާނޫނަށް އިޞްލާޙު ގެނައުމުގެ ބިލަށް ބަހުސްކުރުންވެސް މިއަދުގެ ޖަލްސާއަށް ވަނީ އެޖެންޑާކޮށްފައެވެ.