ޙަމާސް ޖަމާޢަތުން އޮކްޓޫބަރު 7 ވަނަ ދުވަހު އިސްރާޢީލުގެ ރަށްތަކަށް އަރައި ހިންގި އަސްކަރީ ކެމްޕޭނުގައި ހައްޔަރުކުރި ޔަހޫދީންގެ ތެރެއިން ދެ އަސީރުން މިނިވަންކޮށްފިއެވެ. މިނިވަންކޮށް ޒަޔަނިސްޓު އިސްރާޢީލާ ހަވާލުކޮށްފައި ވަނީ އުމުރުން ދުވަސްވެފައިވާ ދެ އަންހެނުންނެވެ. ޙަމާސް ޖަމާޢަތުން ޢާންމު ކޮށްފައިވާ ވީޑިޔޯއަކުން ފެންނަނީ އެ ދެ އަންހެނުންނަށް ކާބޯތަކެތި ދޭ މަންޒަރެވެ. އަދި، ވަކިވުމުގެ ކުރިން އެ ދެ އަންހެނުން ޙަމާސް ޖަމާޢަތުގެ މުޖާހިދުންނާ ސަލާމްކުރާ މަންޒަރު ވެސް ވީޑިޔޯއިން ފެނެއެވެ.
ޣައްޒާގައި ވެރިން ކުރާ ޙަމާސް ޖަމާޢަތުން ބުނީ އެ ދެ އަސީރުން މިނިވަން ކޮށްފައި ވަނީ އެ މީހުންގެ ޞިއްޙީ ސަބަބުތަކާ ގުޅިގެން ކަމުގައެވެ. އަދި، އިންސާނިއްޔަތު ކަމަށް ޓަކައި ކަމުގައެވެ. ދެ އަސީރުން މިނިވަންކޮށްފައިވާ ކަން އިންޓަރނޭޝަނަލް ކޮމިޓީ އޮފް ދި ރެޑް ކްރޮސް (އައި.ސީ.އާރް.ސީ)ން ވެސް ވަނީ ކަށަވަރު ކޮށްދީފައެވެ. ޙަމާސް ޖަމާޢަތުގެ ތަރުޖަމާނު އަބޫ އުބައިދާ ވިދާޅުވީ، އެ ދެ އަސީރުން މިނިވަން ކުރުމަށް ކުރި މަޝްވަރާތަކުގައި މެދުވެރިއެއްގެ ދައުރު އަދާކޮށްފައި ވަނީ ޤަޠަރާއި މިޞްރުން ކަމުގައެވެ.
ޙަމާސް ޖަމާޢަތުން މިނިވަން ކޮށްފައި ވަނީ 85 އަހަރުގެ ޔޮޚެވެދް ލިފްޝިޓްޒާއި 79 އަހަރުގެ ނޫރިތް ކޫޕަރ ކަމުގައި އައި.ސީ.އާރް.ސީން ބުނެއެވެ. އެ ދެ މީހުން، އެ މީހުންގެ ޢާއިލާއަށް ރައްދު ކުރުމަށް މަސައްކަތް ކުރަމުންދާ ކަމުގައި ވެސް އެ ޖަމުޢިއްޔާއިން ބުންޏެވެ.
އޮކްޓޫބަރު 7 ވަނަ ދުވަހު ހިންގި އޮޕަރޭޝަންގައި ޙަމާސް ޖަމާޢަތުން ވަނީ 222 މީހުން ހައްޔަރު ކޮށްފައެވެ. އެ އޮޕަރޭޝަންގައި ޔަހޫދީންގެ 1,400 އެއްހާ މީހުން މަރުވިއެވެ. ޙަމާސްއިން ރަހީނު ކޮށްފައިވާ ޔަހޫދިން ވަގުތުން މިނިވަން ކުރުމަށް ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ވަނީ ގޮވައިލާފައެވެ. އަދި، އެ މީހުން މިނިވަން ނުކޮށްފި ނަމަ، އެއްގަމު މަގުން ޢައްޒާއަށް އަރައި، އެ ރަށް ސުންނާފަތިކޮށް، ހުރިހާ މުސްލިމުން ގަތުލުކުރާނެ ކަމުގެ އިންޒާރު ވެސް އޭނާ ވަނީ ދީފައެވެ.
އޮކްޓޫބަރު 20 ވަނަ ދުވަހު ވެސް ޙަމާސް ޖަމާޢަތުން ވަނީ އިތުރު ދެ އަސީރުން މިނިވަން ކުރަން މަސައްކަތް ކޮށްފައެވެ. ނަމަވެސް، ޔަހޫދީ އިސްރާޢީލުން ވަނީ އެ މީހުންނާ ހަވާލުވާން ދެކޮޅު ހަދާފައެވެ. އަދި، އިތުރު އަސީރުން މިނިވަން ކުރަން އުޅެފައި ވަނީ ދެއްކުންތެރި ކަމުގެ ގޮތުން ކަމުގައި ޒަޔަނިސްޓު އިސްރާޢީލުން ބުނެއެވެ.
ޙަމާސްއިން ހައްޔަރު ކޮށްފައިވާ 200 އަށްވުރެ ޔަހޫދީން މިނިވަން ކުރުމުގެ ނަމުގައި އެއްގަމު މަގުން ޢައްޒާއަށް އެރުމަށް ޔަހޫދީ ފައުޖުތަކުން ދަނީ ތައްޔާރުވަމުންނެވެ. ޣައްޒާގެ ރަށްބޭރަށް 300,000 އެއްހާ ސިފައިންގެ ފައުޖެއް މިހާރު ވަނީ ޖަމާކޮށްފައެވެ. އަދި، އަސްކަރީ ޓޭންކުފަހަރު ފަދަ ބަރު ހަތިޔާރު ވެސް ވަނީ ޖަމާކޮށް، ތައްޔާރީ ހާލަތަކަށް ގެނެސްފައެވެ.
ނަމަވެސް، ޣައްޒާއަށް އެރުން މަޑުޖައްސައިލުމަށް އެމެރިކާގެ ރައީސް ޖޯ ބައިޑަންގެ ސަރުކާރުން ޔަހޫދީ އިސްރާޢީލަށް ބާރު އަޅަމުންދާ ކަމުގައި އެމެރިކާގެ ނޫހެއް ކަމުގައިވާ ނިއު ޔޯކް ޓައިސްއިން ރިޕޮޓުކޮށްފައިވެއެވެ. އެމެރިކާއިން ގޮވައިލާފައި ވަނީ، އަސީރުން މިނިވަން ކުރުމަށް ޙަމާސް ޖަމާޢަތަށް އިތުރު ވަގުތު ދިނުމަށް ކަމުގައި ވެސް އެ ނޫހުން ރިޕޯޓު ކުރެއެވެ.
އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 5,087 އަށް އަރާފައެވެ. އަދި، 15,000 އެއްހާ މީހުން ވަނީ ޒަޚަމު ކޮށްލާފައެވެ. ޣައްޒާ ފުރަބަންދުކޮށް ކާބޯތަކެއްޗާއި ފެނާއި ޞިއްޙީ ފަރުވާގެ ސާމާނު އެތެރެ ކުރުމަށް ޔަހޫދީ ފައުޖުތަކުން ހުރަސްއަޅަމުންދާއިރު، ޣައްޒާގެ 2.3 މިލިޔަނެއްހާ ރައްޔިތުންގެ ހާލަތު ދަނީ ދެރަވަމުންނެވެ. އެހީގެ ސާމާނާ އެކު ޣައްޒާއަށް ދަތުރު ކުރަން މަސައްކަތް ކުރާ 200 އެއްހާ ލޮރީއަށް ވެސް ޔަހޫދީ ފައުޖުތަކުން ދަނީ ހުރަސް އަޅަމުންނެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.