ޔަހޫދީ ފައުޖުތަކުން ލުބުނާނުގެ ރަށްތަކަށް ދެމުންދާ ހަމަލަތަކާ ގުޅިގެން 19,000 އަށްވުރެ ގިނަ މީހުން ހާލުގައި ޖެހިފައިވާ ކަން ހިޖުރަކުރާ މީހުންނާ ބެހޭ އ.ދގެ އިދާރާ – އިންޓަރނޭޝަނަލް އޮގަނައިޒޭޝަން ފޯ މައިގްރޭޝަން (އައި.އޯ.އެމު)ން ހާމަކޮށްފިއެވެ. އެ ޖަމުޢިއްޔާއިން ބުނީ އިސްރާޢީލާއި ލުބުނާން ގުޅޭ ސަރަޙައްދީ ރޮނގު ކައިރީގައި އޮންނަ ރަށްތަކަށް ޔަހޫދީ ފައުޖުތަކުން ދެމުންދާ ހަމަލަތަކާ ގުޅިގެން އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވެފައިވާ މީހުންގެ ޢަދަދު އެތަކެއް ހާހަށް އަރާފައިވާ ކަމުގައެވެ.
އެ ޖަމުޢިއްޔާއިން ބުނީ އޮކްޓޫބަރު 7 ވަނަ ދުވަހުން ފެށިގެން ޔަހޫދީން ދެމުންދާ ހަމަލަތަކާ ގުޅިގެން ރައްކާތެރި ހިސާބުތަކަށް ހިޖުރަ ކުރަން ޖެހިފައިވާ މީހުންގެ ޢަދަދު 19,646 އަށް އަރާފައިވާ ކަމުގައެވެ. އޭގެ ތެރެއިން ގިނަ މީހުންނަކީ، ލުބުނާނުގެ ދެކުނުގައިވާ ސަރަޙައްދުތަކުގައި ދިރިއުޅޭ މީހުން ކަމުގައި ވެސް އެ ޖަމުޢިއްޔާއިން ބުނެއެވެ. "ކުރިއަށް އޮތް ދުވަސްތަކުގައި މި ޢަދަދު އިތުރުވާނެ ކަމަށް ބެލެވޭ،" އައި.އޯ.އެމްގެ ތަރުޖަމާނު މުޙައްމަދު ޢަލީ އަބޫންޖީލާ ވިދާޅުވިއެވެ.
ޔަހޫދީ ފައުޖުތަކުން ލުބުނާނަށް ހަމަލަދޭން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުން އޮކްޓޫބަރު 7 ވަނަ ދުވަހު ޔަހޫދީންނާ ދެކޮޅަށް 'އޮޕަރޭޝަން އަލް-އަޤްޞާ ފްލަޑް'ގެ ނަމުގައި ފެށި އަސްކަރީ ހަރަކާތުގައި ލުބުނާނުގެ ޙިޒްބުﷲ ޖަމާޢަތުން ބައިވެރިވުމާ ގުޅިގެންނެވެ. ޙަމާސް ޖަމާޢަތަށް ވާގިވެރިވުމުގެ ގޮތުން ޙިޒްބުﷲއިން ވަނީ، ޔަހޫދީން އަތްގަދަ ކޮށްފައިވާ ލުބުނާނުގެ ބިންތަކުގައި ހަރަކާތްތެރިވާ ޔަހޫދީ ފައުޖުތަކަށް ހަމަލަދޭން ފަށާފައެވެ. އަދި، އެ ކަމުގެ ރައްދުގައި ޔަހޫދީ ފައުޖުތަކުން ވެސް ދަނީ ލުބުނާނަށް ވަރުގަދަ ހަމަލަތަކެއް އަމާޒު ކުރަމުންނެވެ.
ޙިޒްބުﷲއިން އިސްރާޢީލުގެ ރަށްތަކަށް ދެމުންދާ ހަމަލަތަކާ ގުޅިގެން ބައެއް ރަށްތަކުގައި ދިރިއުޅޭ ޢާންމު ރައްޔިތުން ވެސް ރައްކާތެރި ހިސާބުތަކަށް ބަދަލު ކޮށްފައިވާ ކަމުގައި ރިޕޯޓުތައް ބުނެއެވެ. އަބޫންޖީލާ ވިދާޅުވީ، މަސްރަޙު ހޫނުވެ، ގިނަ ޢަދަދެއްގެ ބަޔަކަށް އެ މީހުންގެ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން ޖެހުމަކީ ކަންބޮޑުވެ ވަޑައިގަންނަވާ މައްސަލައެއް ކަމުގައެވެ.
"މިހާރު ވެސް ފަގީރު ކަމުގައި ދިރިއުޅޭ ގިނަ ޢާއިލާތަކެއްގެ ހާލަތު ވަނީ ދަށްވެފައި. އަދި، މިހާރު ވެސް ނިކަމެތި ހާލުގައި ދިރިއުޅެމުންދާ އެތަކެއް ހާސް ބަޔަކަށް ވަނީ އިތުރު ހިއްދަތިކަމާ ކުރިމަތިލާން ޖެހިފައި. ލުބުނާނުގެ ސަރުކާރަށް ވެސް ދަނީ އިތުރު ދަތިތަކާ ކުރިމަތިވަމުން،" އަބޫންޖީލާ ވިދާޅުވިއެވެ. މި ގޮތަށް ހިޖުރަ ކޮށްފައިވާ ގިނަ ޢަދަދެއްގެ ބަޔަކު ދަތުރު ކޮށްފައި ވަނީ ލުބުނާނުގެ އައްސޭރިފަށުގައި އޮންނަ އިޠާރަށް ކަމުގައި އައި.އޯ.އެމުން ބުނެއެވެ.
އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 5,087 އަށް އަރާފައެވެ. އަދި، 15,000 އެއްހާ މީހުން ވަނީ ޒަޚަމު ކޮށްލާފައެވެ. ޣައްޒާ ފުރަބަންދުކޮށް ކާބޯތަކެއްޗާއި ފެނާއި ޞިއްޙީ ފަރުވާގެ ސާމާނު އެތެރެ ކުރުމަށް ޔަހޫދީ ފައުޖުތަކުން ހުރަސްއަޅަމުންދާއިރު، ޣައްޒާގެ 2.3 މިލިޔަނެއްހާ ރައްޔިތުންގެ ހާލަތު ދަނީ ދެރަވަމުންނެވެ. އެހީގެ ސާމާނާ އެކު ޣައްޒާއަށް ދަތުރު ކުރަން މަސައްކަތް ކުރާ 200 އެއްހާ ލޮރީއަށް ވެސް ޔަހޫދީ ފައުޖުތަކުން ދަނީ ހުރަސް އަޅަމުންނެވެ.