ރައީސް ނަޝީދަށް ދިން ހަމަލާއާ ސިޔާސީ ގުޅުމެއް ނެތް: އައްބާސް

ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ދިން ހަމަލާގައި ސަރުކާރާއި އަދި ސިޔާސީ އެއްވެސް ބައެއްގެ ބައިވެރިވުން އޮތްކަމުގެ ހެކި ފެންނަން ނެތްކަމަށް، އެޙަމަލާގެ ތަޙުޤީޤު ކުރިއަށްދާގޮތް ބެއްލެވުމަށް ރައީސުލްޖުމްހޫރިއްޔާ އައްޔަންކުރެއްވި ޚާއްސަ މަންދޫބު، އައްބާސް ފާއިޒް ވިދާޅުވެއްޖެއެވެ.އައްބާސްވަނީ މި މައްސަލާގައި މިހާތަނަށް ފާހަގަވެފައިވާކަންކަން ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ހިއްސާކުރައްވާފައެވެ.

އައްބާސް ފާއިޒު ވިދާޅުވީ މިފަދަ ހަމަލާއެއް ސިޔާސީ ވާދަވެރިން ނުވަތަ ހަރުކަށިފިކުރުގެ ބައެއްގެ ފަރާތުން އަތުވެދާނެކަމަށް ތުހުމަތުކުރެވުނުކަމަށެވެ. އެގޮތުން ސިޔާސީ ގޮތުންނާއި، ސަރުކާރުންގެ ނުފޫޒާއި، އެމްއެމްޕީއާރްސީގެ ކޮރަޕްޝަނާއި ގުޅޭކަންކަމާއި އަދި ހަރުކަށި ފިކުރަށް މި މައްސަލައިގެ ތަހުގީގުގައި ރިޔާއަތްކޮށްފައިވާކަމަށް އައްބާސް ވިދާޅުވިއެވެ. އެހެންނަމަވެސް މިހާތަނަށް ގެންދިޔަ ތަޙުޤީގުތަކުގައި، ސިޔާސީ ވާދަވެރިން އަދި ސަރުކާރާއިވެސް އެއްވެސް ގުޅުމެއް އޮތްކަން ހާމަވެފައި ނެތްކަމަށްވެސް އައްބާސް ވިދާޅުވިއެވެ.

އައްބާސްވިދާޅުވީ، އެމްއެމްޕީއާރްސީ މައްސަލައިގައި ރައީސް ނަޝީދަށް އަމާޒުކުރާ ތުޙުމަތުތަކާއި، މިކަމާއި ގުޅުމެއް އޮއްތޯވެސް ބެއްލެވިކަމަށެވެ. އެހެންނަމަވެސް މި ހަމަލާއަކީ، އެމްއެމްޕީއާރްސީ މައްސަލަ ފެންމަތިވުމުގެ މާކުރިންސުރެވެސް، ރާވަމުން ދިޔަ ކަމެއްކަމަށް ތަޙުޤީޤަށް އެނގިފައިވާކަމަށާއި، އެހެންކަމުން އެކަމާވެސް ގުޅުމެއް ނެތްކަން އައްބާސް ފާހަގަކުރެއްވިއެވެ.

"އިދިކޮޅު ސިޔާސީ އަދި ސަރުކާރުގެ ތެރެއިން އައި ކަމެއްތޯ ބެލުމަށް ކުރި ތަޙުޤީޤުގައިވެސް އެފަދަ އެއްވެސް ކަމެއް ނެތްކަން ވަނީ ހާމަވެފައި. އެމްއެމްޕީއާރްސީ މައްސަލައަށްވެސް ރިޢާޔަތްކުރިން. އެކަމާވެސް ގުޅުމެއް ނެތް. މި ހާދިސާ އެއަށްވުރެ މާކުރިން ރާވަން ފަށައިފި. މުޅި މައްސަލަ ގުޅެނީ ހަރުކަށި ފިކުރާ." އައްބާސް ފާއިޒު ވިދާޅުވެއެވެ.

ރައީސް ނަޝީދު އަވަހާރަކޮށްލުމަށް ދިން ހަމައަލާއަކީ އެންމެ ސީރިއަސް މައްސަލައެއްގެ ގޮތުގައި ދެކިގެން ތަހުގީގުކުރާކަމަށް ސަރުކާރުން ހާމަކުރައްވާފައިވެއެވެ.

މި މައްސަލައިގެ ތަޙުޤީޤާއި އެންމެހާ ކޯޓު މަރުޙަލާތައް ގާތުން ބެއްލެވުމަށްޓަކައި ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުން އިނގިރޭސިވިލާތުގެ، އައްބާސް ފާއިޒް ހަމަޖައްސަވާފައިވަނީވެސް މި މައްސަލައަށް ދޭ އިސްކަމުގެ ސަބަބުންކަން ހާމަކުރައްވާފައިވެއެވެ. އައްބާސް އަކީ އިންސާނީ ޙައްގުތކުގެ ދާއިރާގެ މާހިރެކެވެ.

މި ތަޙުޤީގު ކަންކަން ރާއްޖޭގެ މުވައްސަސާތަކުން މިހާތަނަށް ކުރިއަށް ގެންގޮސްފައިވަނީ ވަރަށް ޕްރޮފެޝަނަލްކޮށްކަން އައްބާސް ފާއިޒް ވަނީ ފާހަގަކުރައްވާފައެވެ.

މި މައްސަލައިގައި އައްބާސް ފާއިޒްގެ ކަންބޮޑުވުން އޮތީ މައްސަލައިގެ އަޑުއެހުންތައް ކުރިއަށްނުގެންދެވި، ލަސްވާ ލަސްވުމަށެވެ. އެ މަސައްކަތް އަވަސްކުރުމަށް އޭނާވަނީ އިދާރާތަކުގައި އެދިވަޑައިގެންފައެވެ.

2021ވަނަ އަހަރު މެއި މަހުގެ 6 ވަނަ ދުވަހުގެ ރޭ، ރައީސް ނަޝީދު އަވަހާރަކޮށްލުމަށް ހަމަލާދީފައިވަނީ، އެމަނިކުފާނުގެ ގެކޮޅުން ނިކުމެވަޑައިގެން ކާރުކޮޅަށް އަރާވަޑައިގަންނަވަން ހިންގަވާފައިދަނިކޮށް، ޕާކު ކޮށްފައި ހުރި ސައިކަލެއްގައި ހަރުކޮށްފައިވާ ބޮމެއް ގޮއްވާލައިގެންނެވެ. މި ހާދިސާގައި އެމަނިކުފާނުގެ ހަށިކޮޅަށް ރޭޒަރ ފުއްތަކެއް އަރާ، ލިބުނު ސީރިއަސް އަނިޔާތަކަށް ވަނީ ރާއްޖެއިން ބޭރުގައި ފަރުވާ ހޯއްދަވާފައެވެ.

ރައީސް ނަޝީދު އަވަހާރަކޮށްލަން ބޮމުގެ ހަމަލާދިނުމުގައި އަމަލީ ގޮތުން ބައިވެރިވީކަން އަހުމަދު އަދުހަމް ރަޝީދުގެ މައްޗަށް ސާބިތުވެ 23 އަހަރަށް ޖަލަށްލުމަށް ކޯޓުންވަނީ ހުކުމްކޮށްފައެވެ. މީގެ އިތުރުން ހއ. މޮޅަދޫ، ބަހާރުގޭ، އަބްދުﷲ އަލީ މަނިކުގެ މައްޗަށް ޓެރަރިސްޓު ޖަމާއަތަކަށް ތާއީދުކުރުމުގެ ދައުވާ ސާބިތުވެ ފަސް އަހަރަށް ޖަލަށް ލުމަށް ހުކުމްކޮށްފައިވެއެވެ. އަދި ހއ. ހޯރަފުށީ އަލަނާސިގޭ މުހައްމަދު ތަސްލީމް ހައްޔަރުކުރި ނަމަވެސް އޭނާގެ މައްޗަށް ކުށް ސާބިތުނުވާކަމަށް ކޯޓުންވަނީ ޙުކުމްކޮށްފައެވެ. ބޮމުގެ ހަމަލާއާ ގުޅިގެން އިތުރު ބައެއްގެ މައްޗަށް ވެސް ދައުވާކުރެ އެވެ. އެ މީހުންގެ މައްސަލަތައް ކުރިއަށް ގެންދަނީ ވަކިންނެވެ.