ޣައްޒާގެ ދެކުނުގެ ރަށެއް ކަމަށްވާ ބަނީ ސުހައިލާގައި ހުންނަ ޚާން ޔޫނުސްގެ އިރުމަތީގައި ދިރިއުޅޭ ޖަމީލް އަބޫ އާސީ އަކީ ޖާފާއަށް ނިސްބަތްވާ ތިން ވަނަ ޖީލުގެ ރެފިއުޖީއެކެވެ. އޭނާގެ ކާފަޔާ މާމަ ވަނީ 1948ވަނަ އަހަރު އިސްރާއީލުން ފަލަސްތީނަށް ދިން ހަމަލާތަކުގައި ގެދޮރު ގެއްލިފައެވެ. އެ ހަމަލާތަކުގައި 750،000 މީހުންނަށް ވަނީ މަޖުބޫރުން އެމީހުން ގެދޮރު ދޫކުރަން ޖެހުނުއިރު 500 އެއްހާ ފަލަސްތީނުގެ ސިޓީ ވަނީ ވުޖޫދުން ނައްތާލާފައެވެ.
އަބޫ އާސީ އަކީ މީގެކުރިން އޯޑަރަށް ކާނާ ތައްޔާރުކުރި މީހެކެވެ. ނަމަވެސް 2014ވަނަ އަހަރު އިސްރާއީލުން ޣައްޒާއަށް ދިން ހަމަލާތަކުގައި އޭނާގެ ބަދިގެ އެއްކޮށްހެން ހަލާކުވިއެވެ. ނަމަވެސް ކެއްކުމުގެ މަސައްކަތް އޭނާ އަނެއްކާވެސް ފެށީ ޚާން ޔޫނުސްގައި ގެދޮރު ގެއްލިފައިވާ މީހުންނަށް ކާންދިނުމުގެ މަޤްސަދުގައެވެ. އެ ތަނުގައި މި ވަގުތު ތިބި ގެދޮރު ގެއްލިފައިވާ 2،000 މީހުންނަށް އަބޫ އާސީގެ އާއިލާއިން ކާންދެއެވެ. އަބޫ އާސީގެ ގޭގެ ބޭރުގައި ހުންނަ ޕޭވްމަންޓުގައިއޭނާއާ އޭނާގެ ދެބެންގެ ދެދަރި ކޮއްކޮމެން ތިބީ ބޮޑެތި ތެލި ތެލީގައި ކައްކާށެވެ.
އާންމުންނަށް ކާއެއްޗެހި ފޯރުކޮށްދިނުމަށް ހެނދުނު 7 ން ފެށިގެން މެންދަމު 2 ޖަހަންދެން އެމީހުން ކައްކައެވެ. އަދި ކާއެއްޗެހި ބަލާ ނާދެވޭ މީހުންނަށް އެމީހުންގެ ކާރުތަކުގައި އެތަކެތި ފޯރުކޮށްދޭކަންވެސް އަބޫ އާސީ ފާހަގަކުރިއެވެ.
އަބޫ އާސީ މި މަސައްކަތް ކުރަނީ ޓީމްތަކަށް ބަހާލައިގެންނެވެ. އެއްބަޔަކު ފިޔާ ކޮށާއިރު، އަނެއް ބަޔަކު ކައްކަން ބޭނުންވާ އެހެނިހެން ސާމާނު އެއްކުރާނެއެވެ. އަދި އަނެއް ބަޔަކު ކާނާ ބަންދުކުރުމުގެ މަސައްކަތް ކުރެއެވެ. އެމީހުން ބަހާ ކެއުންތަކުގައި އާންމުކޮށް ހުންނާނީ ބަތާ، މުގު ކަމުގައި އަބޫ އާސީ ބުންޏެވެ. އަދި މަސްލިބުމުގައި ދަތިތަކެއް ހުރުމުގެ ސަބަބުން ކެއުމުގައި މަސް ނުހިމަނާ ކަމަށްވެސް އޭނާ ބުންޏެވެ.
ޣައްޒާގެ ދެކުނަށް ބަދަލުވެފައިވާ ފަލަސްތީނުގެ ގިނަ ބަޔަކު ތިބީ އދ. ގެ ރިލީފް އެންޑް ވޯކްސް އޭޖެންސީ، ޔޫއެންއާރްޑަބްލިއުއޭ އިން ހިންގާ ސްކޫލެއްގައެވެ. ބަދަލުވެފައިވާ ގިނަ ބަޔަކު ދިޔައީ ހަމައެކަނި މަދު އަންނައުނު ކޮޅެއް ހިފައިގެންނެވެ. ނަމަވެސް އެއްވެސް ޒަރޫރީ ބޭނުމެއް ފުއްދޭނެ ގޮތެއް ނެތި އޮތް މި ތަނަކީ އިންސާނުން ދިރިއުޅެން ހެޔޮވާވަރު ތަނެއް ނޫނެވެ. އަދި އެ އާއިލާއިން މި ބަލަނީ ވީވަރަކުން އެމީހުންނަށް ކުރެވުނު ކަމެއް ޣައްޒާގެ ހާލުގައި ޖެހިފައިވާ މީހުންނަށް ކޮށްދިނުމަށް ކަމުގައިވެސް އޭނާ ބުންޏެވެ.
ނަމަވެސް މިހާރު ކުރިއަށްދާ ހަމަލާތަކުގެ ސަބަބުން ފެނާއި ކަރަންޓުވެސް ނުލިބި އެތައްބަޔަކު މަގުމަތިވެފައިވާއިރު، އެންމެ ބޮޑަށް އަސަރުކޮށްފައި ވަނީ ކުޑަކުދިންނަށެވެ. އަދި މިހާލަތުގައި ބަނޑުހައިވެފައިތިބި މީހުންނަށް ކާނެ ގޮތެއް ހޯދައި ނުދެވުމަކީ ޤަބޫލުކުރެވޭ ކަމެއް ނޫން ކަމަށްވެސް އޭނާ ވަނީ ބުނެފައެވެ.
ޔަހޫދީ އިސްރާއީލުން ފަލަސްތީނުގެ ޣައްޒާއަށް އަމާޒުކޮށް މި މަހުގެ 7 ވަނަ ދުވަހު ދޭން ފެށި ހަމަލާތަކުގެ ސަބަބުން ގެދޮރު ގެއްލިފައިވާ އެތައް ބަޔަކު އެބަތިއްބެވެ. ޣައްޒާގެ އުތުރުގައި ތިބި މީހުން ދެކުނަށް ބަދަލުވުމަށް އިސްރާއީލުން އެންގުމުން ގިނަ ބަޔަކު މިހާރު ވަނީ އެ ސިޓީގެ ދެކުނަށް ބަދަލުވެފައެވެ. އޭގެތެރެއިންވެސް ގިނަ ބަޔަކު މިހާރު ތިބީ ޚާން ޔޫނުސްގައެވެ. މިއާއިއެކު ޚާން ޔޫނުސްގެ އާބާދީ މިހާރު ވަނީ ބައި މިލިއަނަށް އަރާފައެވެ. މި އަދަދު 2021ވަނަ އަހަރު ހުރީ 220،000 ގައެވެ.