ޔޫކްރެއިންގެ އިރުއުތުރުގައި އޮންނަ ހަރްކިވްގެ ޕޯސްޓް އޮފީހަކަށް ރަޝިޔާއިން ދިން ވަރުގަދަ މިސައިލް ހަމަލާއެއްގައި ހަ މީހުން މަރުވެއްޖެއެވެ. އިތުރު 14 މީހުން ޒަޚަމުވި މި ހަމަލާއާ ގުޅިގެން ރައީސް ވޮލޮޑޮމީރް ޒެލެންސްކީ ވަނީ ކަންބޮޑުވުން ފާޅުކުރައްވާފައެވެ. އަދި, ރަޝިޔާއިން ގަސްދުގައި ޔޫކްރެއިންގެ ޢާންމު ރައްޔިތުންނަށް ހަމަލާ ދެމުންދާ ކަމަށް ތުހުމަތުކުރައްވާފައެވެ.
ޒެލެންސްކީ ވަނީ ރަޝިޔާގެ ހަމަލާގައި ގެއްލުން ލިބިފައިވާ ޕޯސްޓް އޮފީހުގެ މަންޒަރުތައް ފެންނަ ވީޑިޔޯއެއް ޢާންމު ކުރައްވާފައެވެ. އެ ވީޑިޔޯއިން ފެންނަނީ, ސުންނާފަތި ކޮށްލާފައިވާ ޢިމާރާތެކެވެ. މި ހަމަލާގައި ޒަޚަމު 14 މީހުންގެ ތެރެއިން ހަތް މީހަކަށް ހޮސްޕިޓަލުގައި އެޑްމިޓު ކޮށްގެން ފަރުވާދެމުންދާ ކަމުގައި ހަރްކިވްގެ އޮފިޝަލުން ވިދާޅުވެއެވެ. އެ ހަތް މީހުންގެ ހާލު ސީރިޔަސް ކަމުގައި ހަތްކިވްގެ ސަރަޙައްދީ ގަވަރުނަރު އޮލެހް ސިންޔަހުބޮވް ވިދާޅުވިއެވެ.
މި ހަމަލާގައި ޒަޚަމުވެފައިވާ މީހުންގެ ތެރޭގައި ޒުވާން އުމުރުފުރައިގެ ކުދިން ވެސް ހިމެނެއެވެ. ޒަޚަމުވެފައި ވަނީ އުމުރުން 17 އަހަރާއި 42 އަހަރާ ދެމެދު މީހުން ކަމުގައި ސިންޔަހުބޮވް ވިދާޅުވިއެވެ. އޭގެ ތެރޭގައި ޕޯސްޓް އޮފީހުގައި މަސައްކަތް ކުރާ މުވައްޒަފުންނާއި, ޢާންމު ރައްޔިތުން ހިމެނޭ ކަމުގައި ރިޕޯޓުތައް ބުނެއެވެ. މިއީ, ހަރްކިވްގެ ރައްޔިތުންގެ ހިތްތަކުގައި ބިރުވެރިކަން އުފައްދަން ރަޝިޔާއިން ދީފައިވާ ހަމަލައެއްގެ ގޮތުގައި ސިންޔަހުބޮވް ސިފަ ކުރެއްވިއެވެ.
ހަރްކިވް ސަރަޙައްދުގެ ޕްރޮސިކިއުޓަރުގެ އޮފީހުން ބުނީ, އެ ރަށުގެ ޕޯސްޓް އޮފީހަކަށް ރަޝިޔާއިން ހަމަލަ ދީފައި ވަނީ އެސް-300 މަރުކާގެ ދެ މިސައިލް ބޭނުން ކޮށްގެން ކަމުގައެވެ. އަދި, މިސައިލް ހަމަލަ ދީފައި ވަނީ ހަރްކިވްގެ އުތުރުން އޮންނަ ރަޝިޔާގެ ބިޔެލްގޮރޮދް ސަރަޙައްދުން ކަމުގައި ވެސް އެ އޮފީހުން ބުނެއެވެ.
ހަރްކިވަކީ ޔޫކްރެއިންގެ ދެވަނައަށް އެންމެ ބޮޑު ރަށެވެ. އެ ރަށް އޮންނަނީ ރަޝިޔާގެ ސަރަޙައްދީ ރޮނގާ 30 ވަރަކަށް ކިލޯމީޓަރު ދުރުގައެވެ. ރަޝިޔާ-ޔޫކްރެއިން ހަނގުރާމައިގެ ކުރީކޮޅު ރަޝިޔާއިން ވަނީ ހަރްކިވަށް ވަރުގަދަ ހަމަލަތަކެއް ދީފައެވެ. އަދި, އެ ރަށް ހިފަން މަސައްކަތް ކޮށްފައެވެ. ހަރްކިވްގެ ޕޯސްޓް އޮފީހަކަށް ދިން މިސައިލް ހަމަލައާ ގުޅޭ ގޮތުން ރަޝިޔާއިން ވަކި އެއްޗެއް ހާމަކޮށްފައެއް ނުވެއެވެ. ނަމަވެސް, ޔޫކްރެއިންގެ ޢާންމު ރައްޔިތުންނަށް ގަސްދުގައި ހަމަލަ ދެމުންދާ ކަމަށް ޔޫކްރެއިނުން ކުރާ ތުހުމަތުތައް ރަޝިޔާއިން ދޮގު ކުރެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 608 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި އޮންނަ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ.
ރަޝިޔާގެ އިސްތިޢުމާރީ ފައުޖުތަކާ ދެކޮޅަށް ފަށާފައިވާ ކައުންޓަރއޮފެންސިވްގައި ޔޫކްރެއިންގެ ފައުޖުތަކަށް ބޮޑެތި ހުރަސްތަކެއް ކުރިމަތިވަމުން ދިޔަ ނަމަވެސް، ޔޫކްރެއިނުން ދަނީ ކޮންމެ ވެސް ވަރެއްގެ ކުރިއެރުންތަކެއް ހޯދަމުންނެވެ. އަދި، އިރުމައްޗާއި ޒަޕޮރީޜިޔާ ހިމެނޭ ސަރަޙައްދުގެ ބައެއް ރަށްތަކާއި އަވަށްތައް ރަޝިޔާ ސިފައިންގެ އަތްދަށުން މިނިވަން ކޮށްފައިވާ ކަން ފާހަގަ ކޮށްލަން ޖެހެއެވެ.