އިރާގާއި ސޫރިޔާގައި ތިބި އެމެރިކާ ސިފައިންނަށް އަމާޒުކޮށް، ވޭތުވެދިޔަ ހަފްތާއެއްގެ ތެރޭގައި ޑްރޯން އާއި ރޮކެޓް ހަމަލާތައް 13 ފަހަރު ދީފައިވާ ކަމަށް އެމެރިކާގެ އަސްކަރީ މަރުކަޒު، ޕެންޓަގަނުން ބުނެފިއެވެ.
މި މަހުގެ 7 ވަނަ ދުވަހު ޔަހޫދީންނާއި ފަލަސްތީނުގެ ދިފާއުގައި ހަނގުރާމަކުރާ ހަމާސްއާއި ދެމެދު ބަދަލުކުރައި ހަމަލާތަކުގައި، އެމެރިކާއިން ޔަހޫދީންނަށް ތާއީދުކުރުމުން އިރާނާއި އެގައުމާއިއެކު މަސައްކަތްކުރާ ހަތިޔާރު އެޅި ޖަމާއަތްތަކުންވަނީ އެމެރިކާއަށް އިންޒާރުދީފައެވެ. އެ ހަމަލާތައް ދީފައިވަނީ މި އިންޒާރަށްފަހުއެވެ.
"އޮކްޓޯބަރު 17 އާއި 24 އާ ދެމެދު އިރާގުގައި ތިބި އެމެރިކާ އާއި ގުޅިފައިވާ ފައުޖުތަކަށް އަމާޒުކޮށް މަދުވެގެން ވަކި ވަކި 10 ފަހަރު އަދި ސީރިއާގައި ވަކިވަކިން ތިން ފަހަރު ހަމަލާދީފައިވޭ." އެމީހުން އަބަދުވެސް ޓެރަރިޒަމާ ދެކޮޅުކަން ހާމަކުރައްވަމުން ޕެންޓަގަންގެ ތަރުޖަމާނު ބްރިގޭޑިއަރ ޖެނެރަލް ޕެޓް ރައިޑަރ ވިދާޅުވިއެވެ. އަދި ހަމަލާތައް ދީފައި ވަނީ ޑްރޯނާއި ރޮކެޓް ބޭނުންކޮށްގެންކަމަށްވެސް ރައިޑާ ވަނީ ފާހަގަކުރައްވާފައެވެ.
ހަމަލާތަކުގެ ޒިންމާ އުފުލަން ޖެހޭނީ ކޮންބައެއްކަން ހާމަނުކުރެއްވި ނަމަވެސް މި ހަމަލާތައް ދޭން ވާގިވެރިވެފައިވަނީ އިސްލާމިކް ރެވިއުލަޝަނަރީ ގާރޑް ކޯޕްސް، އައިއާރްޖީސީއާއި އިރާން ސަރުކާރުންކަމަށް ރައިޑަރ ވިދާޅުވިއެވެ.
ކައިރި މުސްތަގްބަލެއްގައި އެމެރިކާ ސިފައިންނާ އިރާނާއި ސޫރިއާގައި ތިބި އެހެން މުވައްޒަފުންނާ ދެކޮޅަށް އިރާނުން މިއަށްވުރެވެސް ނުރައްކާތެރި ހަމަލާތައް ދޭނެކަމަށްވެސް ރައިޑާ ވިދާޅުވިއެވެ.
އައިއެސްއާ ދެކޮޅަށް މަސައްކަތް ކުރުމަށް އިރާގުގައި އެމެރިކާގެ 2500 ސިފައިން ތިބިއިރު، ސޫރިއާގައި 900 ސިފައިން މިހާރު އެބަތިއްބެވެ.