ފަލަސްޠީނުގެ ބިންތަކުގައި ވަޒަންވެރި ކޮށްފައިވާ ޖައްބާރު ޔަހޫދީން ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓައިލަން އެމެރިކާގެ ރައީސް ޖޯ ބައިޑަން ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައިވީ ނަމަވެސް، ޔަހޫދީ އަސްކަރިއްޔާއިން ޣައްޒާގެ 2.3 މިލިޔަން މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކަށް އޭނާ ގެންދަވަނީ ހިތްވަރު ދެއްވަމުންނެވެ. އަދި، އަސްކަރީ ގޮތުންނާއި މާލީ ގޮތުން ޔަހޫދީންނަށް އެހީތެރިކަން ފޯރުކޮށްދެއްވަމުންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 6,546 އަށް އުފުލިފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި ކުޑަކުދިންނެވެ. ޝަހީދު ކޮށްލާފައިވާ ކުޑަކުދިންގެ ޢަދަދު 2,360 އަށް އަރައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 17,400 އަށްވުރެ އިތުރުވެފައެވެ.
ފަލަސްޠީނުގެ އޮފިޝަލުން ވިދާޅުވީ ޔަހޫދީ ވަޒަންވެރިން މުސްލިމުންނާ ދެކޮޅަށް ހަމަލަ ދެމުންދާ ކަމުގައެވެ. އަދި، ގިނަ ޢަދަދެއްގެ ކުށެއް ނެތް މުސްލިމުން ޝަހީދު ކޮށްލާފައިވާ ކަމުގައެވެ. އިންސާނީ ހައްޤުތަކަށް ވަކާލާތު ކުރާ ޖަމުޢިއްޔާތަކުން ބުނީ، ފަލަސްޠީނުގެ މުސްލިމުންނަށް ހަމަލަދިނުމުގެ އިތުރުން، އެ މީހުންގެ ގެދޮރާއި މުދަލުގައި ޔަހޫދީ ވަޒަންވެރިން ހުޅުޖަހައި، ގެއްލުން ދެމުންދާ ކަމުގައެވެ. އަދި، ފަލަސްޠީނުގެ މުސްލިމުންނަށް އެ މީހުންގެ ވަޒަނާއި ގެދޮރު ދޫކޮށް ދާން މަޖުބޫރު ކުރުވަމުންދާ ކަމުގައެވެ.
ބައިޑަން ވިދާޅުވީ 'ހައްދުފަހަނަ އަޅާފައިވާ ޔަހޫދީ ވަޒަންވެރިން' ހިންގާ މި ފަދަ އަމަލުތައް ވަގުތުން ހުއްޓައިލަން ޖެހޭ ކަމުގައެވެ. "އެ ކަން ވަގުތުން ހުއްޓައިލަން ޖެހޭ. އެ މީހުން އިންސާފުގެ ކުރިމައްޗަށް ގެންނަން ޖެހޭ. އެ ހަމަލަތަކުގައި ފަލަސްޠީނުގެ ކުށެއް ނެތް ޢާންމު ރައްޔިތުން މަރައިލާފައިވޭ،" ބައިޑަން ވިދާޅުވިއެވެ. މި ފަދަ އަމަލުތަކަކީ 'އަލިފާންގަނޑަކަށް ތެޔޮ އެޅުން' ފަދަ ކަމެއްގެ ގޮތުގައި އޭނާ ސިފަ ކުރެއްވިއެވެ. އޮކްޓޫބަރު 7 ވަނަ ދުވަހު ޔަހޫދީ ފައުޖުތަކުން ފެށި ގަތުލުއާންމުގެ ކުރިން ވެސް ޔަހޫދީ ވަޒަންވެރިން ފަލަސްޠީނުގެ ކުށެއް ނެތް މުސްލިމުންނަށް ހަމަލަދެމުން ގޮސްފައިވާ ކަން ފާހަގަ ކޮށްލަން ޖެހެއެވެ.
ޔަހޫދީ ވަޒަންވެރިންގެ ހަމަލަތައް ހުއްޓައިލަން ގޮވައިލެއްވި ނަމަވެސް، އެ ކަން ހުއްޓުވަން ޒަޔަނިސްޓު އިސްރާޢީލަށް ބާރު އަޅުއްވާނެ ކަން، ނުވަތަ އެ ކަމާ ގުޅިގެން އަޅުއްވާނެ ފިޔަވަޅުތަކެއް ވެސް ބައިޑަން ހާމަ ކުރައްވާފައެއް ނުވެއެވެ. ފާހަގަ ކޮށްލަން ޖެހޭ އަނެއް ކަމަކީ، ޔަހޫދީ ވަޒަންވެރިން ފަލަސްޠީނުގެ ޢާންމުންނަށް ހަމަލަދެނީ، ޔަހޫދީ އަސްކަރިއްޔާގެ ހިމާޔަތުގެ ދަށުގައި ތިބެގެން ކަމެވެ.
ޔަހޫދީ ފައުޖުތަކުން ޣައްޒާގައި ހިންގަމުންދާ ގަތުލުއާންމު އިތުރަށް ވަރުގަދަ ކުރުމަށް އެއްގަމު މަގުން ޣައްޒާއަށް އެރުމަށް އެ މީހުން ދަނީ ތައްޔާރުވަމުންނެވެ. ޣައްޒާ ކައިރިއަށް 300,000 އަށްވުރެ ގިނަ ސިފައިންގެ ލަޝްކަރަކާއި އަސްކަރީ ޓޭންކުފަހަރު ފަދަ ބަރުހަތިޔާރު ވަނީ ޖަމާކޮށްފައެވެ. މި ކަމާ ގުޅޭ ގޮތުން ވާހަކަފުޅު ދައްކަވަމުން ބައިޑަން ވިދާޅުވީ، އެ ކަން ހުއްޓުވަން އެމެރިކާއިން އަމަލީ ގޮތުން އެއްވެސް މަސައްކަތެއް ކޮށްފައި ނުވާނެ ކަމުގައެވެ. އަދި، އެއްގަމު މަގުން އޮޕަރޭޝަނެއް ނުފަށާނެ ކަމުގެ ޔަގީންކަން އިސްރާޢީލުން ހޯއްދަވާފައި ނުވާނެ ކަމުގައެވެ.
"އަހަރެން އެދުނީ އެއްގަމު މަގުން ޢައްޒާއަށް އެރުމުގެ ކުރިން ޙަމާސްއިން ރަހީނު ކޮށްފައިވާ އަސީރުން މިނިވަން ކުރަން މަސައްކަތް ކުރުމަށް. ނަމަވެސް، އެންމެ ފަހުގެ ނިންމުން ނިންމާނީ އޭނާ {ޔަހޫދީ ބޮޑުވަޒީރު ބެންޖަމިން ނަތަންޔާހޫ}. އަހަރެން އެ ކަމަށް ބާރެއް ނާޅަން. ހަމައެކަނި އެ ކަން ފާހަގަކޮށްލީ،" ބައިޑަން ވިދާޅުވިއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.