ޔަހޫދީން ފަލަސްޠީނުގެ ޣައްޒާއަށް ދެމުންގެންދާ ޙަމަލާތަކުގެ ސަބަބަން ޙާލަތު ގޯސްވެފައިވާ ޣައްޒާގެ ހޮސްޕިޓަލްތަކަށް ފެނާ ކަރަންޓު ނުލިބުމުގެ ސަބަބުން އެތަން ތަނުގެ މަސައްކަތް ހުއްޓިއްޖެއެވެ.
ހޮސްޕިޓަލުތަކުގެ ޙާލަތު ބަޔާންކުރަމުން މީޑިއާ ރިޕޯޓުތައް ބުނެފައިވަނީ ކަރަންޓު ނެތުމުގެ ސަބަބުން ހޮސްޕިޓަލްތަކުގައި އޮޕަރޭޝަން ކުރަނީ ފޯނުން އަލިކޮށްގެން ކަމަށާއި، ޒަޚަމްވެފައިވާ ތަންތަން ސާފުކުރަނީ ވިނެގާ ބޭނުންކޮށްގެންކަމަށެވެ. އަދި ސިއްޙީ ފަރުވާދޭން އެކަށީގެންވާ ސާމާނާއި ބޭސް ނެތުމުން، ހަލާކުވެފައި ތަންތަން ފަހަނީވެސް އެއްވެސް ވަރަކަށް އައްސި ނުކޮށް ކަމަށްވެސް ހޮސްޕިޓާތަކުން ރިޕޯޓުކޮށްފައިވާކަމަށް ރިޕޯޓުތަކުގައި ބުނެފައިވެއެވެ.
ހޮސްޕިޓަލުތަކުގައި މިވަގުތި ތިބީ ހަމައެކަނި ޒަޚަމްވެފައިވާ ތިބި މީހުންނެއް ނޫނެވެ. އެތަންނުގައި ޔަހޫދީން ޣައްޒާއަށް ދެމުންގެންދާ ޙަމަލާތަކުގައި ގެދޮރު ގެއްލިފައިވާ އެތައްހާސް ބަޔަކު ހިޔާވަހިކަން ހޯދައިގެން އެބަތިއްބެވެ. މިކަމުގެ ސަބަބުން ޒަޚަމްވެފައި ތިބި މީހުންނަށް ފަރުވާ ދިނުމަށް ދަތިވާކަމަށް ހޮސްޕިޓަލުތަކުން ބުނެއެވެ. ކަން މިހެން އޮތް އިރު، ޣައްޒާގެ މެދުތެރޭގައާއި އުތުރުގައި ހުރި ޚިދުމަތްދޭ 20 ހޮސްޕިޓަލް ހުސްކުރުމަށް ޔަހޫންދީން ވަނީ އަންގާފައެވެ. ނަމަވެސް މީހުން ހުސްކުރުމަކީ ކުރެވޭނެ ކަމެއް ނޫން ކަމަށް ޑޮކްޓަރުންނާ ހަވާލާދީ މީޑިއާ ރިޕޯޓުތައް ބުނެއެވެ.
"އަޅުގަނޑުމެންގެ އަތުގައި ސްޓޭންޑްބައި ޖަނަރޭޓަރުތައް ހިންގާނެ ތެލެއް ނެތް. ކަރަންޓު ނެތުމުން އެންމެ ފުރަތަމަ އަސަރުކުރާ މީހުންނަކީ އޮޕަރޭޝަން ރޫމްތަކާއި އިންޓެންސިވް ކެއާ ޔުނިޓްތަކާއި އިމަޖެންސީ ރޫމްތަކުގައި ތިބި މީހުން" ޣައްޒާގެ ސިއްހީ ވުޒާރާގެ ޑިރެކްޓަރު ޖެނެރަލް ޑރ. މެދަތު އައްބާސް ވިދާޅުވިއެވެ.
ހޮސްޕިޓަލުތަކުގައި މީހުން ގިނަވުމުގެ ސަބަބުން، މުވައްޒަފުން މަސައްކަތްކޮށްކޮށް ވަރުބަލިވެފައިވާކަމަށާ ކުރިން އެއް މަސް ދުވަހު ބޭނުންކުރާ މިންވަރުގެ ތަކެތި މިހާރު އެންމެ ދުވަހަކުން ހުސްވާކަމުގައި އޭނާ ފާހަގަކުރެއްވިއެވެ. އަދި ބައެއް ބަލިމީހުންގެ އޮޕްރޭޝަންތައް ކުރިއަށް ގެންދަނީ ހޮސްޕިޓަލްގެ ކޮރިޑޯގައި ކަމަށް އައްބާސް ވިދާޅުވިއެވެ.
މިސްރާއި ޣައްޒާ ގުޅޭ ރަފާހް ބޯޑަރު ހުރަސްކޮށް ޣައްޒާއަށް އިންސާނީ އެހީ ފޯރުކޮށް ދިނުމުގެ ހުއްދަ އިސްރާއީލުން ދީފައި އޮތް ނަމަވެސް އެންމެ ގިނަ ހޮސްޕިޓަލުތައް ހުންނަ އުތުރަށް ސިއްޙީ އެހީ ފޯރުކޮށްދިނުމަށް ޔަހޫދީން އަންނަނީ ހުރަސް އަޅަމުންނެވެ. ޔަހޫދީން ބޭނުންވަނީ ޣައްޒާގެ އުތުރު އެއްކޮށް ހުސްކުރާށެވެ.
މީގެ އިތުރުން، ޣައްޒާއަށް އިންސާނީ އެހީ ފޯރުކޮށްދިނުމުގެ ހުއްދަ ދިން ނަމަވެސް ޣައްޒާއަށް މިވަގުތު އެންމެ ބޭނުންވާ ތެޔޮ އެތެރެކުރުން ޔަހޫދީން އޮތީ މަނާކޮށްފައެވެ. ހަނގުރާމައަށް ދެ ހަފްތާ ވެގެން ދިޔައިރު، ޣައްޒާގައި ތިބި އޮފިޝަލުން އުއްމީދުކޮށްގެން ތިބީ އެ ތަނަށް ތެޔޮ ލިބޭނެ ކަމަށެވެ. ނަމަވެސް ޣައްޒާއަށް ތެޔޮ އެތެރެކޮށްފިނަމަ، އޮޕަރޭޝަންތަކުގައި ހަމާސް އިން އެ ތެޔޮ ބޭނުންކުރާނެ ކަމަށް ބުނެ ޣައްޒާއަށް ތެޔޮ އެތެރެނުކުރޭވޭނެ ކަމަށް ޔަހޫދީން ވަނީ ބުނެފައެވެ.
ޔަހޫދީން އަންނަނީ ހޮސްޕިޓަލްތަކުގައި މަސައްކަތްކުރާ ޑޮކްޓަރުންނަށް ޙަމާލާތައް އަމާޒުކުރަމުންނެވެ. އެގޮތުން ޙަމަލާތަކުގައި މިހާރުވެސް 55 ޑޮކްޓަރުން ޝަހީދުކޮށްލާފައިވާކަމަށް ރިޕޯޓުތައް ބުނެއެވެ.