ސޫރިޔާގައި ހަރަކާތްތެރިވާ އީރާނުގެ އަސްކަރިއްޔާގެ އަމާޒުތަކަށް އެމެރިކާއިން ވައިގެ ހަމަލަތަކެއް ދީފިއެވެ. އެމެރިކާގެ ދިފާޢީ އިދާރާ ޕެންޓެގަނުން ބުނީ ސޫރިޔާގައި ހުންނަ އީރާނުގެ އިސްލާމިކް ރިވޮލޫޝަނަރީ ގާޑްސް ކޯ (އައި.އާރް.ޖީ.ސީ)ގެ ދެ އަސްކަރީ މަރުކަޒަށް މިސައިލް ހަމަލަތަކެއް ދީފައިވާނެ ކަމުގައެވެ. މިއީ، އިރާޤާއި ސޫރިޔާގައި ހުންނަ އެމެރިކާގެ އަސްކަރީ މަރުކަޒުތަކަށް ދީފައިވާ ހަމަލަތަކެއްގެ ރައްދުގައި ދީފައިވާ ހަމަލަތަކެއް ކަމުގައި ޕެންޓެގަނުން ބުނެއެވެ.
އީރާނުގެ އަމާޒުތަކަށް އެމެރިކާއިން ހަމަލަތަކެއް ދީފައި މި ވަނީ، ޔަހޫދީ ފައުޖުތަކުން ޣައްޒާގެ ރައްޔިތުންނާ ދެކޮޅަށް ލާއިންސާނީ ގަތުލުއާންމެއް ހިންގަމުންދާ ދަނޑިވަޅެއްގައެވެ. މި ގަތުލުއާންމުގައި މިހާތަނަށް 7,028 މީހުން ޝަހީދު ކޮށްލާފައިވާއިރު، 17,400 އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. ޝަހީދު ކޮށްލާފައިވާ މީހުންގެ ތެރޭގައި 3,000 އަށްވުރެ ގިނަ ތުއްތުކުދިންނާއި ކުޑަކުދިން ހިމެނެއެވެ.
އޮކްޓޫބަރު 17 އާއި 24އާ ދެމެދު އިރާޤާއި ސޫރިޔާގައި ހަރަކާތްތެރިވާ އެމެރިކާ ސިފައިންގެ ފައުޖުތަކާ ދެކޮޅަށް ގިނަ ޢަދަދެއްގެ ޑްރޯން އަދި ރޮކެޓް ހަމަލަ ދީފައިވާ ކަމުގައި އެމެރިކާއިން ބުނެއެވެ. އަދި، މި ހަމަލަތައް ރާވާފައި ވަނީ އައި.އާރް.ޖީ.ސީން ކަމަށް ޕެންޓެގަނުން ތުހުމަތު ކުރެއެވެ. އަދި، އެ ހަމަލަތައް ދިނުމުގައި އަމަލީ ގޮތުން ހަރަކާތްތެރިވެފައި ވަނީ އައި.އާރް.ޖީ.ސީއަށް ވާގިވެރިވާ ހަތިޔާރުއެޅި ޖަމާޢަތްތަކުން ކަމުގައި ވެސް އެމެރިކާއިން ބުނެއެވެ.
އެ ހަމަލަތަކުގެ ބަދަލު ހިފާނެ ކަމުގައި އިންޒާރު އެމެރިކާގެ ރައީސް ޖޯ ބައިޑަން މީގެ ކުރިން ދެއްވާފައިވާއިރު، އެ ޤައުމުގެ ދިފާޢީ ވަޒީރު ލޮއިޑް އޮސްޓިން ވިދާޅުވީ، އީރާނުގެ އަސްކަރީ އަމާޒުތަކަށް ހަމަލަ ދީފައި މި ވަނީ އައު ހަމަނުޖެހުންތައް ފެށުމުގެ ނިޔަތުގައި ނޫން ކަމުގައެވެ. ނަމަވެސް، އައި.އާރް.ޖީ.ސީން ވާގިވެރިވެގެން އެމެރިކާގެ ސިފައިންނާ ދެކޮޅަށް ދެމުންދާ ހަމަލަތައް ހުއްޓުވަން ޖެހޭ ކަމުގައެވެ.
"އީރާނުން އުޅެނީ އެމެރިކާގެ ސިފައިންނަށް ހަމަލަ ދިނުމުގައި އެ ޤައުމުން ބައިވެރިވެފައިވާ ކަން ސިއްރު ކުރަން. އެ އަމަލުތަކުން ބަރިއްޔަވާން. އެ ކަން އެ ގޮތަށް ވިޔަކަ ނުދޭނަން. އީރާނުން ވާގިވެރިވާ ޖަމާޢަތްތަކުން އެމެރިކާގެ ސިފައިންނަށް ހަމަލަދޭ ނަމަ، އެއީ އީރާނުގެ ބައިވެރިވުމާ އެކު ދޭ ހަމަލަތަކެއްގެ ގޮތުގައި ބަލާނަން. އަދި، އެ ކަން ހުއްޓުވަން ކުރަން ޖެހުނު މަސައްކަތްކަތްތައް ކުރާނަން،" އޮސްޓިން ވިދާޅުވިއެވެ.
ސޫރިޔާގައިވާ އީރާނުގެ އަސްކަރީ އަމާޒުތަކަށް ދީފައިވާ ހަމަލަތަކަކީ އެމެރިކާގެ ދިފާޢުގައި ދީފައިވާ ހަމަލަތަކެއް ކަމުގައި ވެސް އޮސްޓިން ވިދާޅުވިއެވެ. އަދި، މި ކަމާ ޔަހޫދީ ފައުޖުތަކުން ޙަމާސް ޖަމާޢަތާ ދެކޮޅަށް ކުރަމުންދާ ހަނގުރާމައާ އެއްވެސް ގުޅުމެއް ނެތް ކަމުގައި ވެސް އޭނާ ވިދާޅުވިއެވެ. ނަމަވެސް، ފާހަގަ ކޮށްލަން ޖެހޭ ކަމަކީ، ޔަހޫދީ ހިންގަމުންދާ ލާއިންސާނީ ޖަރީމާތަކަށް އެމެރިކާއިން ހިތްވަރު ދެމުންދާ ކަމެވެ. އަދި، އަސްކަރީ ގޮތުންނާއި މާލީ ގޮތުން އެހީތެރިކަން ފޯރުކޮށްދެމުންދާ ކަމެވެ.
ފާއިތުވި މަހެއްހާ ދުވަހުގެ ތެރޭގައި އިރާޤާއި ސޫރިޔާގައި ތިބި އެމެރިކާގެ ފައުޖުތަކަށް އަމާޒުކޮށް 16 ފަހަރެއްގެ މަތިން ހަމަލަތަކެއް ދީފައިވާ ކަމުގައި އެމެރިކާގެ ޑިޕާޓްމަންޓް އޮފް ޑިފެންސުން ބުނެއެވެ. އެ ހަމަލަތަކުގައި އެމެރިކާ ސިފައިންގެ 21 މީހުން ޒަޚަމުވެފައިވާ ކަމުގައި ވެސް އެ އިދާރާއިން ބުންޏެވެ. އޭގެ ތެރެއިން ގިނަ މީހުންގެ ސިކުނޑިއަށް ގެއްލުންވެފައިވާ ކަމުގައި ރިޕޯޓުތައް ބުނެއެވެ.
އެ ހަމަލަތަކުގެ ފަހަތުގައި ތިބީ އީރާނުން ވާގިވެރިވާ ހަތިޔާރު އެޅި ޖަމާޢަތްތައް ކަމަށް ތުހުމަތުކޮށް، ބަދަލު ހިފާނެ ކަމުގައި ވައިޓް ހައުސްގެ ޤައުމީ ސަލާމަތާ ބެހޭ މުޝީރު ޖޯން ކަރބީ ވިދާޅުވެފައިވެއެވެ. ބައިޑަން ވެސް ވަނީ އީރާނުގެ ޒައީމް އާޔަތުالله ޢަލީ ޚާމަންއީއަށް އިންޒާރު ދެއްވާފައެވެ. "އަހަރެން އާޔަތުاللهއަށް މި ދެނީ އިންޒާރެއް. އަހަރެމެންގެ ފައުޖުތަކާ ދެކޮޅަށް ހަމަލަދޭ ނަމަ އަހަރުމެން މަޑަކުން ނުތިބޭނަން. އާޔަތުالله ތައްޔާރަށް ހުންނަންވާނެ،" ބައިޑަން ވިދާޅުވިއެވެ.