ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާގެ ދަށުން އެ ސަރަހައްދުން މުވާސަލާތީ ޚިދުމަތްތައް ކަނޑައިލާ، ހަމަލަތައް އިތުރު ކޮށްފިއެވެ. ޔަހޫދީން ވަނީ ޣައްޒާއިން ފޯނާއި އިންޓަރނެޓުގެ ޚިދުމަތްތައް ކަނޑައިލާފައެވެ. ޣައްޒާއިން މުވާސަލާތީ ޚިދުމަތްތައް ކަނޑައިލާފައި މި ވަނީ، އެއްގަމު މަގުން ޣައްޒާއަށް އަރައި، ގަތުލުއާންމު އިތުރަށް ފުޅާ ކުރަން ތައްޔާރުވުމުގެ ގޮތުން ކަމަށް ބެލެވޭ ކަމުގައި މަޞްރަހު ދިރާސާ ކުރާ ފަރާތްތަކުން ބުނެއެވެ.
އޮކްޓޫބަރު 27 ވަނަ ދުވަހު އިރު އޮއްސުމާ އެކު ޔަހޫދީ ފައުޖުތަކުން ޣައްޒާއަށް ދެމުންދާ ވައިގެ ހަމަލަތަކުގެ ޢަދަދު ވަނީ އިތުރު ކޮށްފައެވެ. ޣައްޒާގެ ބަލައިލި ކޮންމެ ދިމާލަކުން މިހާރު ފެންނަމުން ދަނީ ޔަހޫދީ ސިފައިންގެ މިސައިލް ހަމަލަތަކާ ގުޅިގެން ރޯވެ، އަނދަމުންދާ ޢިމާރާތްތައް ކަމުގައި މަސްރަޙު ދިރާސާ ކުރާ ފަރާތްތަކާއި އެ ސަހަރުގައި ހަރަކާތްތެރިވާ ނޫސްވެރިން ބުނެއެވެ.
ޣައްޒާއިން މުވާސަލާތީ ޚިދުމަތް މެދުކަނޑައިލާފައިވާ ކަން ރެޑް ކްރެސެންޓުން ވެސް ކަށަވަރު ކޮށްދެއެވެ. އެ ޖަމުޢިއްޔާއިން ބުނީ، ޣައްޒާގެ ހޮސްޕިޓަލްތަކުގެ އިތުރުން، އެ ސަހަރުގައި ހަރަކާތްތެރިވާ އެ ޖަމުޢިއްޔާގެ ޓީމުތަކާ ގުޅޭނެ ގޮތެއް ނެތް ކަމުގައެވެ.
މި ކަމާ ގުޅޭ ގޮތުން އެމެރިކާއިން ވާގިވެރިވާ ޔަހޫދީ ފައުޖުތަކުން ބުނީ ޣައްޒާއަށް ދެމުންދާ ހަމަލަތައް އިތުރަށް ވަރުގަދަ ކޮށްފައިވާ ކަމުގައެވެ. އަދި، ޣައްޒާގައި ހިންގަމުންދާ ލާއިންސާނީ ޖަރީމާތައް އިތުރަށް ފުޅާ ކޮށްފައިވާ ކަމުގައެވެ. ޣައްޒާގެ ދެކުނުގައިވާ ސަރަޙައްދުތަކަށް ބަދަލުވާން، ޣައްޒާ ސިޓީގައި ދިރިއުޅޭ ޢާންމު ރައްޔިތުންނަށް އަންގާފައިވާނެ ކަމުގައި ވެސް ޔަހޫދީ އަސްކަރިއްޔާއިން ބުނެއެވެ.
ޣައްޒާގެ ހާލަތު ރިޕޯޓު ކުރަމުންދާ އަލް ޖަޒީރާގެ ނޫސްވެރިން ބުނީ، ޣައްޒާއަށް ދެމުންދާ މިސައިލާއި އާޓިލަރީ ބަޑީގެ ހަމަލަތައް ޔަހޫދީ ފައުޖުތަކުން އިތުރު ކޮށްފައިވާ ކަމުގައެވެ. ބަލައިލި ކޮންމެ ދިމާލަކުން ފެންނަނީ އަލިފާން ރޯވެ، އަނދަމުންދާ ޢިމާރާތްތައް ކަމަށާއި، މެދުކެނޑުމެއް ނެތި އިވެމުން ދަނީ ބޮންތަކާއި މިސައިލްތައް ގޮވާ އަޑު ކަމުގައި ވެސް އެ ނޫހުގެ ރިޕޯޓަރުން ބުނެއެވެ.
ޣައްޒާގައި މުވާސަލާތީ ޚިދުމަތްތައް ފޯރުކޮށްދޭން ކުންފުނި – ޖައްވާލުން ވެސް ބުނީ އެ ސަހަރުން މޮބައިލް ފޯނާއި އިންޓަރނެޓުގެ ޚިދުމަތް ކެނޑިފައިވާ ކަމުގައެވެ. އެއްވެސް މޯބައިލް ފޯނަކަށް ރޭންޖު ނުލިބޭ ކަމުގައި ވެސް އެ ކުންފުނިން ބުނެއެވެ. އެއްގަމު މަގުން ޣައްޒާއަށް އަރައި ގަތުލުއާންމު ފުޅާ ކުރާނެ ކަމުގެ އިންޒާރު ޔަހުދީ ފައުޖުތަކުން ދީފައިވާއިރު، މިއީ އެ ކަން ފެށުމުގެ ކޮޅުމަތި ކަމަށް މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
"ޔަހޫދީ ފައުޖުތަކުން އަޅަމުންދާ ބޮންތަކާއި ދެމުންދާ މިސައިލް ހަމަލަތަކުގައި އެތަކެއް ސަތޭކަ ބަޔަކު ދަނީ ޝަހީދުވަމުން. ކުރިއަށް އޮތް ދުވަސްތަކުގައި ޣައްޒާގެ އިތުރު ބަޔަކު ޝަހީދު ކޮށްލާނެ. އޭގެ ތެރެއިން ގިނަ ބަޔަކު ޝަހީދުވާނީ ޣައްޒާގެ ފުރަބަންދާ ގުޅިގެން. ކާބޯތަކެއްޗާއި ފެން ނުލިބިގެން، ހައިހޫނު ކަމުގައި. ޒަރޫރީ ޚިދުމަތްތަކަށް ބޭނުންވާ ސާމާނު ހުސްވެއްޖެ. ބޭސްފަރުވާއަށް ބޭނުންވާ ސާމާނު ހުސްވެއްޖެ. މަގުތަކުގައި ނަޖިސް ފެތުރެން ފަށައިފި،" ފަލަސްޠީނުގެ ރެފިއުޖީންނާ ބެހޭ އ.ދގެ އިދާރާ – ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)ގެ ކޮމިޝަނަރ ޖެނެރަލް ފިލީޕް ލަޓްޒަރީނީ ވިދާޅުވިއެވެ.
އެއްގަމު މަގުން ޔަހޫދީ ފައުޖުތަކުން ޣައްޒާއަށް އަރައިފިނަމަ، ޣައްޒާގައި ޝަހީދުވަމުންދާ މުސްލިމުންގެ ޢަދަދު އެތަކެއް ގުނައަކަށް އިތުރުވެގެން ދާނެ ކަމުގައި އ.ދއިން ބުނެއެވެ. އޮކްޓޫބަރު 7 ވަނަ ދުވަހުން ފެށިގެން އެމެރިކާގެ އެހީތެރިކަމާ އެކު ޔަހޫދީ ފައުޖުތަކުން ހިންގަމުންދާ ލާއިންސާނީ ޖަރީމާތަކުގައި މިހާތަނަށް ފަލަސްޠީނުގެ 7,326 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި 3,000 ޅަކުދިންނާއި ކުޑަކުދިން ހިމެނެއެވެ. އަދި، 17,400 އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އޭގެ ތެރޭގައި 2,000 ކުޑަކުދިންނާއި 1,400 އަންހެނުން ހިމެނެއެވެ.