ފަލަސްޠީނުގެ ޢައްޒާއަށް ޔަހޫދީ ފައުޖުތައް ވަދެއްޖެނަމަ ވަރުގަދަ ރައްދު ޙަމަލާތަކަކާ ކުރިމަތިލާން ޖެހޭނެކަމަށާއި އެއްވެސް ޔަހޫދީ ސިފައިންގެ މީހަކަށް ސަލާމަތެއް ނޯންނާނެކަމުގެ އިންޒާރު ޙަމާސް ޖަމާޢަތުން ދީފިއެވެ. ފަލަސްޠީނުގެ މިނިވަންކަމަށް ޖިހާދުކުރާ ޙަމާސުން ބުނީ ޔަހޫދީ ފައުޖުތަކާ ކުރިމަތިލާނީ އެ ޖަމާޢަތުގެ ފުރިހަމަ ބާރާއެކުކަމަށެވެ.
ޣައްޒާގެ މުވާސަލާތީ ވަޞީލަތްތަކަށް ޙަމަލާދީ ޚިދުމަތް ކަނޑާލުމަށްފަހު އެ ސަރަޙައްދަށް އެއްގަމުން އެރުމަށް ޔަހޫދީ ސިފައިންވަނީ މަސައްކަތްކޮށްފައެވެ. އެ ގޮތުން އެއްގަމުންނާއި ކަނޑުމަގުންނާއި ވައިގެމަގުން ޔަހޫދީންވަނީ ޢައްޒާއަށް ވަރުގަދަ ޙަމަލާތަކެއް ދީފައެވެ. ނަމަވެސް އެ ޙަމަލާތައް ދެމުންދިޔަ ވަޤުތުވެސް ޙަމާސުންވަނީ ޔަހޫދީންގެ އާބާދީތަކަށް ވަރުގަދަ ރޮކެޓު ޙަމަލާތަކެއް ދީފައެވެ. އަދި އެއްގަމުން ޣައްޒާއަށް އެރުމަށް މަސައްކަތްކުރި ޔަހޫދީންނާ ދެކޮޅަށް ރޮކެޓާއި ބަޑިން ޙަމަލާދީ އެ ފައުޖުތައްވަނީ ހުއްޓުވައިފައެވެ. ޙަމާސުން ނެރުނު ބަޔާނެއްގައި ބުނެފައިވަނީ ޣައްޒާގައި ޔަހޫދީންނަށް އެއްވެސް ކާމިޔާބެއް ހޯދޭނެ ފުރުޞަތެއް ނުލިބޭނެކަމަށެވެ.
ޔަހޫދީ ފައުޖުތަކުން ޣައްޒާއަށް ޙަމަލާތައް ދެމުންދިޔަ ވަޤުތު ލުބުނާނުގެ ޙިޒްބުﷲ ޖަމާޢަތުންނާއި ޔަމަނުގެ ހޫޘީންނާއި ސޫރިޔާގެ ހަނގުރާމަވެރި ޖަމާޢަތަކުންވެސްވަނީ ޔަހޫދީ އަސްކަރީ މަޤާމުތަކަށް މިސައިލް ޙަމަލާދީފައެވެ. އަދި ޢިރާޤާއި ސޫރިޔާގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށްވެސް ރޮކެޓު ޙަމަލާތަކެއްވަނީ ދީފައެވެ.